JD Vance | ఇరాన్ 10-పాయింట్ల శాంతి ప్రతిపాదనను రాసింది చాట్ జీపీటీనే : అమెరికా వైస్ ప్రెసిడెంట్ జేడీ వాన్స్ ఎద్దేవా..!

JD Vance | త్రినేత్ర.న్యూస్ : అమెరికా-ఇరాన్ మధ్య ఉద్రిక్తతల నడుమ శాంతి చర్చలకు సంబంధించి అమెరికా ఉపాధ్యక్షుడు జేడీ వాన్స్ (JD Vance) సంచలన వ్యాఖ్యలు చేశారు. టెహ్రాన్ (ఇరాన్) తమకు మూడు వేర్వేరు 10-పాయింట్ల శాంతి ప్రతిపాదనలను సమర్పించిందని, అందులో ఒకదాన్ని ఆర్టిఫిషియల్ ఇంటెలిజెన్స్ టూల్ అయిన 'చాట్ జీపీటీ' (ChatGPT) సాయంతో రాశారని ఆయన ఆరోపించారు.

తొలి డ్రాఫ్ట్ చెత్తబుట్టలోకే..

సీఎన్ఎన్ (CNN)కి ఇచ్చిన ఇంటర్వ్యూలో జేడీ వాన్స్ మాట్లాడుతూ కీలక విషయాలు వెల్లడించారు. "ఇరాన్ తొలుత పంపిన 10 పాయింట్ల డ్రాఫ్ట్‌ను చూస్తే అది కచ్చితంగా చాట్ జీపీటీ ద్వారా రాసినట్లుగానే అనిపించింది. దానిని స్టీవ్ విట్‌కాఫ్, జారెడ్ కుష్నర్‌లకు సమర్పించగా, వారు దానిని వెంటనే తిరస్కరించి చెత్తబుట్టలో పడేశారు" అని ఆయన తెలిపారు.

ఆ తర్వాత అమెరికా, పాకిస్థాన్, ఇరాన్ ప్రతినిధుల మధ్య జరిగిన సుదీర్ఘ చర్చల అనంతరం రూపొందించిన రెండో వెర్షన్ ప్రతిపాదన "చాలా ఆమోదయోగ్యంగా" ఉందని ఆయన అన్నారు. డొనాల్డ్ ట్రంప్ తన 'ట్రూత్ సోషల్' మీడియా ప్లాట్‌ఫామ్‌లో ప్రస్తావించింది ఈ రెండో ప్రతిపాదన గురించేనని స్పష్టం చేశారు. అయితే, సోషల్ మీడియా ద్వారా తాను మూడో వెర్షన్ గురించి కూడా తెలుసుకున్నానని, అది మొదటి దాని కంటే దారుణంగా ఉందని వాన్స్ పేర్కొన్నారు.

దౌత్యపరమైన విజయం ఏమీ లేదు

ఈ వ్యవహారంలో ఇరాన్‌కు దౌత్యపరమైన విజయం దక్కిందన్న వాదనలను వాన్స్ కొట్టిపారేశారు. తొలి ప్రతిపాదన ఇరాన్‌కు చెందిన ఏ ఒక్క సామాన్యుడో పంపి ఉంటాడని ఆయన ఎద్దేవా చేశారు. వైట్‌హౌస్ ప్రెస్ సెక్రటరీ కరోలిన్ లెవిట్ కూడా ఇదే అభిప్రాయాన్ని వ్యక్తం చేశారన్నారు.

"ఇరాన్ మొదట పంపిన ప్రతిపాదన ఏమాత్రం సీరియస్‌గా లేదు. అది ఆమోదయోగ్యం కాదు. అందుకే అధ్యక్షుడు ట్రంప్, ఆయన బృందం దాన్ని చెత్తబుట్టలో పారేశారు. ఆ ప్రతిపాదన అమెరికాకు ఆమోదయోగ్యంగా ఉందని కొందరు తప్పుగా చెప్పారు." అని వైట్‌హౌస్ ప్రెస్ సెక్రటరీ కరోలిన్ లెవిట్ అన్నారు.

లెబనాన్ దాడులకు, ఒప్పందానికి సంబంధం లేదు

టెహ్రాన్‌పై అమెరికా-ఇజ్రాయెల్ దాడుల అనంతరం అమెరికా, ఇరాన్‌ల మధ్య తాత్కాలిక కాల్పుల విరమణ ప్రకటించిన విషయం తెలిసిందే. ఈ ఒప్పందంలో భాగంగా కీలకమైన గ్లోబల్ ఎనర్జీ రూట్ అయిన హార్ముజ్ జలసంధిని (Strait of Hormuz) ఇరాన్ తిరిగి తెరవాల్సి ఉంది. కానీ, లెబనాన్‌పై ఇజ్రాయెల్ దాడుల నేపథ్యంలో 24 గంటల్లోనే ఆ జలసంధిని మళ్లీ మూసివేసినట్లు వార్తలు వచ్చాయి.

దీనిపై స్పందించిన వాన్స్.. కాల్పుల విరమణ పరిధి విషయంలో ఇరాన్ అపార్థం చేసుకుందన్నారు. "కాల్పుల విరమణ ఒప్పందంలో లెబనాన్ కూడా ఉందని ఇరాన్ భావించి ఉండొచ్చు, కానీ అది నిజం కాదు. మేం ఆ హామీ ఎప్పుడూ ఇవ్వలేదు. వారితో ఏమాత్రం సంబంధం లేని లెబనాన్ కోసం ఇరాన్ ఈ చర్చలను విఫలం చేసుకోవాలనుకుంటే, అది అంతిమంగా వారి ఇష్టమే" అని వాన్స్ హెచ్చరించారు.

తాజా నివేదికల ప్రకారం, లెబనాన్‌లో హిజ్బుల్లాపై ఇజ్రాయెల్ తన సైనిక దాడులను ముమ్మరంగా కొనసాగిస్తోంది. ఈ దాడుల్లో 112 మంది మరణించగా, 837 మంది తీవ్రంగా గాయపడ్డారు.