Asim Munir Donald Trump Call | అందుకే ఇరాన్ మీతో చర్చలకు రావడం లేదు.. అసలు విషయం ట్రంప్‌నకు చెప్పేసిన పాకిస్థాన్ ఆర్మీ చీఫ్ ఆసిమ్

Asim Munir Donald Trump Call | త్రినేత్ర.న్యూస్ : పశ్చిమాసియాలో ఉద్రిక్తతల నడుమ అమెరికా-ఇరాన్ మధ్య దౌత్యపరమైన శాంతి ప్రయత్నాలు ఆటంకాలను ఎదుర్కొంటున్నాయి. పాకిస్థాన్ రాజధాని ఇస్లామాబాద్ వేదికగా జరగాల్సిన రెండో విడత శాంతి చర్చలకు (Talks 2.0) ఇరాన్ దూరంగా ఉన్న నేపథ్యంలో.. పాకిస్థాన్ ఆర్మీ చీఫ్ ఆసిమ్ మునీర్ (Asim Munir) రంగంలోకి దిగారు. ట్రంప్‌కు అత్యంత ఇష్టమైన ఫీల్డ్ మార్షల్‌గా పేరొందిన మునీర్.. అమెరికా-ఇరాన్ చర్చలకు ప్రధాన ఆటంకం ఏమిటో ట్రంప్ దృష్టికి తీసుకెళ్లారు.

ట్రంప్‌తో ఆసిమ్ మునీర్ సంభాషణ

పాకిస్థాన్ భద్రతా వర్గాలను ఉటంకిస్తూ వార్తా సంస్థ 'రాయిటర్స్' తెలిపిన వివరాల ప్రకారం.. జనరల్ ఆసిమ్ మునీర్ అమెరికా అధ్యక్షుడు డొనాల్డ్ ట్రంప్‌ (Donald Trump)తో ఫోన్‌లో మాట్లాడారు. ఇరాన్ ఓడరేవుల వద్ద అమెరికా విధిస్తున్న నావికా దిగ్బంధనమే (US Blockade) ఇస్లామాబాద్‌లో జరగాల్సిన రెండో విడత శాంతి చర్చలకు "ప్రధాన అడ్డంకి" అని ఆయన ట్రంప్‌నకు తెలిపారు. ఈ సలహాను తాను పరిశీలిస్తానని ట్రంప్ బదులిచ్చినట్లు ఆ వర్గాలు పేర్కొన్నాయి.

వైట్ హౌస్ ప్రతినిధి ఖండన

అయితే, ఈ సంభాషణ జరిగిన కొన్ని గంటలకే వైట్ హౌస్ కరస్పాండెంట్ ఒకరు దీనిపై భిన్నమైన ప్రకటన చేశారు. తాను నేరుగా డొనాల్డ్ ట్రంప్‌తో ఈ విషయం గురించి మాట్లాడానని.. పాకిస్థాన్ ఆర్మీ చీఫ్ ఆసిమ్ మునీర్ నావికా దిగ్బంధనానికి సంబంధించి ట్రంప్‌నకు ఎలాంటి సిఫార్సు చేయలేదని పేర్కొనడం గమనార్హం.

ఇరాన్ పర్యటన తర్వాత పాక్ చొరవ

సుమారు రెండు నెలలుగా కొనసాగుతున్న పశ్చిమాసియా యుద్ధంలో కాల్పుల విరమణను పొడిగించే ప్రయత్నాలకు ఇరాన్ నిర్ణయంతో గట్టి ఎదురుదెబ్బ తగిలింది. ఉద్రిక్తతలను తగ్గించే ఉద్దేశంతో ఆసిమ్ మునీర్ ఇటీవల ఇరాన్ రాజధాని టెహ్రాన్‌లో మూడు రోజుల పాటు పర్యటించారు. ఇరాన్ అధ్యక్షుడు, విదేశాంగ మంత్రి సహా పలువురు ఉన్నతాధికారులతో ఆయన భేటీ అయ్యారు.

ఈ నెలాఖరులో ఇరాన్ విదేశాంగ మంత్రి అబ్బాస్ అరాఘ్చీ, పార్లమెంట్ స్పీకర్ మొహమ్మద్ బాఘర్ గలిబాఫ్ తదితరులు అమెరికా ప్రతినిధులతో చర్చల కోసం ఇస్లామాబాద్ రానున్నారు. దశాబ్దాల తర్వాత రెండు దేశాల మధ్య అత్యున్నత స్థాయి ప్రత్యక్ష చర్చలు జరగడం ఇదే తొలిసారి అయినప్పటికీ, తొలి విడత చర్చలు ఎలాంటి పురోగతి లేకుండానే ముగిశాయి.

చర్చలకు ఇరాన్ దూరం.. ట్రంప్ వార్నింగ్

నావికా దిగ్బంధనాన్ని తప్పించుకునేందుకు ప్రయత్నిస్తోందన్న ఆరోపణలతో వారాంతంలో ఇరాన్ జెండాతో ఉన్న ఒక కార్గో నౌకను అమెరికా సీజ్ చేసింది. దీంతో పరిస్థితులు మరింత ఉద్రిక్తంగా మారాయి. అమెరికా చర్యలు దౌత్యపరమైన విశ్వాసాన్ని దెబ్బతీసేలా ఉన్నాయని ఇరాన్ విదేశాంగ మంత్రి అబ్బాస్ అరాఘ్చీ పాకిస్థాన్‌కు తేల్చి చెప్పారు.

వాషింగ్టన్ అహేతుక డిమాండ్లు, మారుతున్న వైఖరి, కొనసాగుతున్న నావికా దిగ్బంధనం కారణాలుగా చూపుతూ ఇస్లామాబాద్ చర్చల నుంచి ఇరాన్ తప్పుకుంది. దీనిపై డొనాల్డ్ ట్రంప్ ఆదివారం 'ట్రూత్ సోషల్' వేదికగా తీవ్రంగా స్పందించారు. అమెరికా ప్రతిపాదిస్తున్న ఒప్పందాన్ని అంగీకరించకపోతే ఇరాన్‌లోని పవర్ ప్లాంట్లు, వంతెనలు సహా పౌర మౌలిక సదుపాయాలను నాశనం చేస్తామని హెచ్చరించారు.

కొనసాగుతున్న ప్రతిష్టంభన

తొలి విడత చర్చలకు నేతృత్వం వహించిన అమెరికా ఉపాధ్యక్షుడు జేడీ వాన్స్ (JD Vance), ఇతర ఉన్నతాధికారుల బృందంతో కలిసి ఇస్లామాబాద్ వెళ్లేందుకు సిద్ధమయ్యారు. కానీ, ఇరాన్ నిరాకరణతో ఈ పర్యటన సందిగ్ధంలో పడింది. తెరవెనుక చర్చలు జరుగుతున్నప్పటికీ.. ఇరాన్ అణు కార్యక్రమం, హిజ్బుల్లా వంటి ప్రాంతీయ ఉగ్రవాద సంస్థలు, హార్ముజ్ జలసంధిపై నియంత్రణ వంటి కీలక అంశాలపై ఇరు దేశాల మధ్య తీవ్రమైన విభేదాలు కొనసాగుతూనే ఉన్నాయి.