ATA 19th Conference Baltimore | బాల్టిమోర్‌లో ‘ఆటా’ పండుగ: 19వ మహాసభలకు సర్వం సిద్ధం.. అట్రాక్షన్స్ ఇవే!

ATA 19th Conference Baltimore | త్రినేత్ర.న్యూస్ : అమెరికాలోని తెలుగు వారిని ఒకే వేదికపైకి తెచ్చే ప్రతిష్ఠాత్మక 'అమెరికన్ తెలుగు అసోసియేషన్' (ATA) 19వ మహాసభలకు బాల్టిమోర్ (Baltimore) నగరం ముస్తాబవుతోంది. వేలాది మంది ఎన్ఆర్ఐ ప్రముఖులు, తెలుగు వారు పాలుపంచుకోనున్న ఈ కాన్ఫరెన్స్, యూత్ కన్వెన్షన్ (Youth Convention) జులై 31 నుంచి ఆగస్టు 2 వరకు మూడు రోజుల పాటు అంగరంగ వైభవంగా జరగనున్నాయి. ఈ సభలను నభూతో నభవిష్యతి అన్న రీతిలో నిర్వహించడానికి ఆటా కార్యవర్గం అన్ని ఏర్పాట్లు చేస్తోంది.

35 వసంతాల సేవా ప్రయాణం

1991లో స్థాపించబడిన ఆటా సంస్థ.. గత 35 ఏళ్లుగా ఎన్ఆర్ఐల కోసం ఎన్నో సాంస్కృతిక, సామాజిక కార్యక్రమాలను విజయవంతంగా నిర్వహిస్తోంది. విపత్కర పరిస్థితుల్లో అమెరికాలోని తెలుగు వారికి అండగా నిలవడమే కాకుండా, మాతృభూమిలో వరదలు, కోవిడ్ వంటి విపత్తుల సమయంలో 'ఆటా ఫౌండేషన్' ద్వారా ఎనలేని వైద్య, విద్యా సేవలు అందించింది.

బిజినెస్, మెడికల్ సెమినార్లకు పెద్దపీట

ఈ బాల్టిమోర్ కన్వెన్షన్‌లో బిజినెస్ సెమినార్లు (Business Seminars) హైలైట్‌గా నిలవనున్నాయి. వ్యాపార దిగ్గజాలు, ఇన్వెస్టర్లు, స్టార్టప్ ఫౌండర్ల సమక్షంలో B2B మ్యాచ్ మేకింగ్, ఎగ్జిక్యూటివ్ నెట్‌వర్కింగ్ సెషన్స్ నిర్వహించనున్నారు. జీ టీవీ 5 సహకారంతో 'ఐడియా బాజ్' (Idea Buzz) వంటి వినూత్న కార్యక్రమాలు ఔత్సాహికులకు గొప్ప అవకాశంగా మారనున్నాయి.

అలాగే మెడికల్ కాన్ఫరెన్స్‌లో (CME) వైద్య రంగంలో ఆర్టిఫిషియల్ ఇంటెలిజెన్స్ (AI) ప్రభావం, హృద్రోగ, డయాబెటిస్, క్యాన్సర్ రీసెర్చ్‌పై నిపుణులు కీలక చర్చలు జరపనున్నారు.

కళ్యాణ మహోత్సవం.. వినోదాల వేదిక

ఆధ్యాత్మికతను ప్రతిబింబించేలా నిర్వహించే శ్రీ శివ పార్వతుల కళ్యాణం ఈ సభలకు ప్రత్యేక ఆకర్షణగా నిలవనుంది. నిరావాల్ బ్యాండ్ లైవ్ కాన్సర్ట్, ఫ్యాషన్ షో, ఆటా బ్యూటీ పేజెంట్, యూత్ క్రూయిజ్, అష్టావధానం, లిటరరీ కాన్ఫరెన్సెస్ ప్రేక్షకులను మంత్రముగ్ధులను చేయనున్నాయి.

మరోవైపు అమెరికాలో స్థిరపడిన యువతకు, ఉన్నత చదువులు, ఉద్యోగాల కోసం వచ్చిన వారికి తోడ్పాటు అందించేలా 'ఆటా మాట్రిమోనీ' (వివాహ పరిచయ వేదిక) ఏర్పాటు చేయడం విశేషం. కుటుంబ సమేతంగా వచ్చే వారికి బెస్ట్ షాపింగ్ ఎక్స్‌పీరియన్స్ ఇచ్చేందుకు జ్యువెలరీ, రియల్ ఎస్టేట్, ఎడ్యుకేషనల్ వెండార్ బూత్స్‌తో ఒక మినీ మాల్‌ను సిద్ధం చేశారు.

తెలుగు వారందరికీ ఆహ్వానం

ప్రపంచ నలుమూలల ఉన్న తెలుగు వారి ప్రతిభను ప్రపంచానికి చాటిచెప్పడంలో ఆటా ముందుంటుందని ప్రెసిడెంట్ జయంత్ చల్ల ఉద్ఘాటించారు. సుమారు 70 కమిటీలు, వందలాది వాలంటీర్లు రాత్రింబవళ్లు కష్టపడి ఈ సభల కోసం పనిచేస్తున్నారని తెలిపారు. ఈ ప్రతిష్టాత్మక మహాసభలకు ప్రతి ఒక్కరూ విచ్చేసి కార్యక్రమాలను విజయవంతం చేయాలని కాన్ఫరెన్స్ కన్వీనర్ శ్రీధర్ బాణాల ఒక ప్రకటనలో విజ్ఞప్తి చేశారు.