V Hanumantha Rao | చంచల్‌గూడ స్టీల్ బ్రిడ్జికి ఆ యోధురాలి పేరు పెట్టండి.. సీఎం రేవంత్‌కు వీహెచ్ లేఖ

V Hanumantha Rao | త్రినేత్ర.న్యూస్ : తెలంగాణ ప్రభుత్వ సలహాదారు (BC Welfare & Development) వి.హనుమంతరావు.. ముఖ్యమంత్రి రేవంత్ రెడ్డికి కీలక విజ్ఞప్తి చేస్తూ ఒక లేఖ రాశారు. హైదరాబాద్‌లోని చంచల్ గూడ ప్రింటింగ్ ప్రెస్ నుంచి సంతోష్ నగర్ వరకు కొత్తగా నిర్మిస్తున్న 'స్టీల్ బ్రిడ్జి'కి ప్రముఖ స్వాతంత్య్ర సమరయోధురాలు, విద్యావేత్త సంగం లక్ష్మీబాయి పేరు పెట్టాలని ఆ లేఖలో ఆయన కోరారు.

స్వాతంత్య్ర పోరాటంలో వీరనారి

1911లో రంగారెడ్డి జిల్లా ఘట్‌కేసర్‌లో జన్మించిన సంగం లక్ష్మీబాయి తెలంగాణ చరిత్రలో చిరస్మరణీయమైన నాయకురాలు. మహాత్మా గాంధీ పిలుపు మేరకు ఉప్పు సత్యాగ్రహం, సైమన్ కమిషన్‌కు వ్యతిరేకంగా జరిగిన ఉద్యమాల్లో పాల్గొని ఆమె జైలు శిక్ష అనుభవించారు. కేవలం బ్రిటిష్ పాలకులపైనే కాకుండా.. నిజాం నిరంకుశ పాలన, రజాకార్లకు వ్యతిరేకంగా కూడా ఆమె వీరోచితంగా పోరాడారు.

రాజకీయ ప్రస్థానం, ప్రజా సేవ

స్వాతంత్య్రం తరువాత రాజకీయాల్లోకి అడుగుపెట్టిన లక్ష్మీబాయి ఎన్నో మైలురాళ్లను అందుకున్నారు. 1952లో అల్వాల్ అసెంబ్లీ నియోజకవర్గం నుంచి తొలిసారిగా ఎమ్మెల్యేగా ఎన్నికయ్యారు. బూర్గుల రామకృష్ణారావు మంత్రివర్గంలో విద్యాశాఖ ఉపమంత్రిగా విశేష సేవలు అందించారు. మెదక్ లోక్‌సభ స్థానం నుంచి వరుసగా మూడుసార్లు ఎంపీగా ఎన్నికై, ఉమ్మడి ఆంధ్రప్రదేశ్ నుంచి పార్లమెంట్‌లో అడుగుపెట్టిన తొలి మహిళగా రికార్డు సృష్టించారు. హైదరాబాద్ సైదాబాద్‌లో 'ఇందిరా సేవా సదన్' (రాధాకిషన్ బాలికల వసతి గృహం) స్థాపించి, నేటికీ వేలాది మంది పేద విద్యార్థినులకు నాణ్యమైన విద్య, ఆశ్రయం కల్పిస్తున్నారు.

ప్రభుత్వానికి మంచి పేరు వస్తుంది: వీహెచ్

బీసీ కమ్యూనిటీ నుంచి, అలాగే వ్యక్తిగతంగా తనకు వస్తున్న విజ్ఞప్తుల మేరకు వి.హెచ్ ఈ ప్రతిపాదనను సీఎం దృష్టికి తీసుకెళ్లారు. ప్రస్తుతం ముఖ్యమంత్రి రేవంత్ రెడ్డి విద్యాశాఖ మంత్రిగా ఉన్నారని.. గతంలో సంగం లక్ష్మీబాయి కూడా విద్యాశాఖ మంత్రిగా సేవలు అందించారని ఆయన తన లేఖలో గుర్తుచేశారు. విద్యారంగానికి, స్వాతంత్య్ర పోరాటానికి ఆమె చేసిన సేవలను దృష్టిలో ఉంచుకుని స్టీల్ బ్రిడ్జికి ఆమె పేరు పెడితే.. తెలంగాణలో కాంగ్రెస్ ప్రభుత్వానికి చాలా మంచి పేరు వస్తుందని వి. హనుమంతరావు ఆశాభావం వ్యక్తం చేశారు.