PVNR Expressway | పీవీ ఎక్స్‌ప్రెస్‌ వేపై ప్రమాదం.. భారీగా స్తంభించిన ట్రాఫిక్

PVNR Expressway | త్రినేత్ర న్యూస్‌: హైద‌రాబాద్‌లోని పీవీఎన్ఆర్ ఎక్స్‌ప్రెస్ వేపై (PVNR Expressway) ప్ర‌మాదం జ‌రిగింది. దీంతో కిలోమీట‌ర్ల మేర ట్రాఫిక్ జామ్ అయింది. మంగ‌ళ‌వారం ఉద‌యం రాజేంద్రనగర్ (Rajendranagar) ప‌రిధిలోని పిల్లర్ నంబర్ 165 వ‌ద్ద‌ మెహదీపట్నం నుంచి ఆరాంఘర్ వైపు వెళ్తున్న కారు ఒక్క‌సారిగా బ్రేక్ వేశారు. దీంతో వెనుక వస్తున్న మరో కారు దానిని బలంగా ఢీకొట్టింది. ఆ తీవ్రతకు అది అదుపుతప్పి రోడ్డు మధ్యలో ఉన్న డివైడర్ ఎక్క‌డంతో దాని ముందు భాగం పూర్తిగా నుజ్జునుజ్జయింది.

డ్రైవర్ స్వల్ప గాయాలతో బయటపడ్డారు. సీటుబెల్ట్ ధరించడంతోనే పెను ప్రమాదం తప్పినట్లుగా అధికారులు భావిస్తున్నారు. కారు రోడ్డుకు అడ్డంగా ప‌డిపోవ‌డంతో విమానాశ్రయం వైపు వెళ్లే మార్గంలో ఎక్స్‌ప్రెస్‌ వేపై వాహనాలు భారీగా నిలిచిపోయాయి (Traffic Jam). సమాచారం అందుకున్న ట్రాఫిక్ పోలీసులు సంఘటనా స్థలానికి చేరుకుని క్రేన్ సహాయంతో కారును పక్కకు తొలగించారు. ట్రాఫిక్‌ను పునరుద్ధరించ‌డంతో ప్ర‌స్తుతం వాహ‌నాల రాక‌పోక‌లు సాఫీగా సాగుతున్నాయి.