Traffic Diversion | సైబ‌ర్ గేట్ వ‌ద్ద కుంగిన రోడ్డు.. కీల‌క సూచ‌న‌లు చేసిన ట్రాఫిక్ పోలీసులు

Traffic Diversion | మాదాపూర్ సైబర్ గేట్ వద్ద రోడ్డు ఇటీవ‌ల కుంగిపోయింది. రోడ్డు ప‌క్క‌నే ఉన్న అండర్​ గ్రౌండ్​ డ్రైనేజీ పైప్​లైన్​ నుంచి మురుగునీరు లీక్ కావ‌డంతో రోడ్డు కుంగిన‌ట్లుగా భావిస్తున్నారు. రోడ్డుకు అధికారులు మ‌ర‌మ్మ‌తులు చేప‌ట్టారు. అయితే, ఐకియా నుంచి సైబర్ టవర్స్, జేఎన్‌టీయూ వైపు వెళ్లే వాహన రాకపోక‌ల‌కు ఇబ్బంది క‌లుగుతున్న‌ది. తాత్కాలికంగా మ‌ర‌మ్మ‌తులు చేప‌ట్టినా ట్రాఫిక్ సజావుగా కొనసాగేందుకు మాదాపూర్ ట్రాఫిక్ పోలీసులు ప్రత్యామ్నాయ చ‌ర్య‌లు తీసుకున్నారు. రానున్న ఐదు రోజుల పాటు ఐకియా నుంచి సైబర్ టవర్స్, జేఎన్టీయూ వైపు వెళ్లే వాహనదారులు ప్రత్యామ్నాయ మార్గాలు, డైవర్షన్స్‌ను అనుసరించాలని పోలీసులు సూచించారు. డైవర్షన్‌లో భాగంగా ఐకియా నుంచి వచ్చే వాహనాలను లెమన్ ట్రీ హోటల్, రాయదుర్గం మెట్రో స్టేషన్ వద్ద ఎడమ వైపు మ‌ళ్లించ‌నున్న‌ట్లు తెలిపారు. మహీంద్రా–సీఐఐ జంక్షన్ మార్గంగా సైబర్ టవర్స్ వైపు మ‌ళ్లించ‌నున్నారు. అక్కడి నుంచి సాధారణ మార్గంలో జేఎన్‌టీయూ వైపు వెళ్లవచ్చని పోలీసులు పేర్కొంటున్నారు. ట్రాఫిక్ నియంత్రణలో భాగంగా వాహ‌న‌దారులు స‌హ‌క‌రించాల‌ని మాదాపూర్ ట్రాఫిక్ పోలీసులు విజ్ఞ‌ప్తి చేశారు.