TGIIC Land Auction 2026 | ఎకరం కనీస ధర రూ.175 కోట్లు.. హైదరాబాద్ నాలెడ్జ్ సిటీలో TGIIC భారీ ఈ-వేలం!

• రాయదుర్గం (నాలెడ్జ్ సిటీ) లోని 10.63 ఎకరాల ప్రైమ్ కమర్షియల్ స్థలాన్ని ఈ-వేలం (E-auction) వేయనున్న TGIIC
• ఎకరం కనీస ధరను రికార్డు స్థాయిలో రూ.175 కోట్లుగా నిర్ణయించిన ప్రభుత్వం
• ఆగస్టు 17, 21 తేదీల్లో వేలం జరగనుండగా, దీని ద్వారా రూ.2,500 కోట్లకు పైగా ఆదాయం వస్తుందని అంచనా
• అన్‌లిమిటెడ్ FSI, సింగిల్-విండో అప్రూవల్స్‌తో వంద శాతం లిటిగేషన్ లేని భూములు

TGIIC Land Auction 2026 | త్రినేత్ర.న్యూస్ : హైదరాబాద్ రియల్ ఎస్టేట్ (Real Estate) మార్కెట్ మరోసారి దేశవ్యాప్తంగా హాట్ టాపిక్‌గా మారింది. ఐటీ కారిడార్‌కు గుండెకాయ లాంటి రాయదుర్గం 'నాలెడ్జ్ సిటీ' (Knowledge City) లో అత్యంత విలువైన 10.63 ఎకరాల కమర్షియల్ భూమిని తెలంగాణ పారిశ్రామిక మౌలిక సదుపాయాల సంస్థ (TGIIC) ఈ-వేలం వేయడానికి సిద్ధమైంది. ఈ ప్రాంతంలో ఉన్న డిమాండ్ దృష్ట్యా ప్రభుత్వం కనీస ధరను రికార్డు స్థాయిలో నిర్ణయించింది.

రెండు ప్లాట్లుగా వేలం.. బేస్ ప్రైస్ ఎంతో తెలుసా?

సర్వే నంబర్ 83/1 లో ఉన్న ఈ ప్రతిష్టాత్మక స్థలానికి ఎకరం బేస్ ప్రైస్ (Base price) ఏకంగా రూ.175 కోట్లుగా నిర్ణయించడం విశేషం. ఈ భూమిని రెండు భాగాలుగా విభజించి బిడ్డింగ్‌కు ఉంచారు.

ప్లాట్ P1: 5.25 ఎకరాలు (దీని బేస్ ప్రైస్ సుమారు రూ.918.75 కోట్లు)

ప్లాట్ P2: 5.38 ఎకరాలు (దీని బేస్ ప్రైస్ సుమారు రూ.941.50 కోట్లు)

టార్గెట్ రూ.2,500 కోట్లు

ఈ ప్రతిష్టాత్మక ఈ-వేలం 2026 ఆగస్టు 17, ఆగస్టు 21 తేదీల్లో జరగనుంది. ఇటీవల రాయదుర్గం ఏరియాలో జరిగిన వేలంలో ఎకరం రికార్డు స్థాయిలో ఏకంగా రూ.237 కోట్లు పలికిన విషయం తెలిసిందే. ఈ నేపథ్యంలో, తాజా వేలం ద్వారా ప్రభుత్వం సులభంగా రూ.2,000 కోట్ల నుంచి రూ.2,500 కోట్లకు పైగా భారీ ఆదాయాన్ని (Target revenue) సాధిస్తుందని అంచనా వేస్తున్నారు.

ఇన్వెస్టర్లకు బంపర్ ఆఫర్.. ఎందుకంటే?

ఈ భూములకు అంత డిమాండ్ ఎందుకు ఉందంటే.. ఇవి వంద శాతం ఎలాంటి లిటిగేషన్ లేని (Litigation-free) క్లియర్ టైటిల్ భూములు.

అన్‌లిమిటెడ్ FSI: ఈ మల్టీ-యూజ్ జోన్‌లో అన్‌లిమిటెడ్ FSI (Floor Space Index) సదుపాయం ఉంది. అంటే నిబంధనలకు లోబడి ఎన్ని అంతస్తులైనా నిర్మించుకోవచ్చు.

సింగిల్-విండో అప్రూవల్స్: అనుమతుల కోసం ఆఫీసుల చుట్టూ తిరగాల్సిన పనిలేకుండా సింగిల్-విండో విధానంలో క్లియరెన్స్ ఇస్తారు.

హైటెక్ సిటీ, గచ్చిబౌలి ఐటీ కారిడార్‌ నడిబొడ్డున ఉండటం దీనికి అదనపు బలం.

ఈ బిడ్డింగ్‌లో పాల్గొనే సంస్థలు కనీస పెంపు (Bid increment) ఎకరానికి రూ.1 కోటిగా వేయాల్సి ఉంటుంది. అలాగే ఈఎండీ (EMD) కింద ప్రతి ప్లాట్‌కు రూ.10 కోట్లు చెల్లించాలని TGIIC నిర్ణయించింది. ఈ అద్భుతమైన అవకాశాన్ని దక్కించుకునేందుకు బడా కార్పొరేట్ సంస్థలు తీవ్రంగా పోటీ పడటం ఖాయంగా కనిపిస్తోంది.