Balka Suman Arrest | తెలంగాణ భవన్ వద్ద ఉద్రిక్తత.. బాల్క సుమన్ అరెస్ట్‌కు స్కెచ్?

• బీఆర్ఎస్ నేత బాల్క సుమన్‌ను అరెస్ట్ చేసేందుకు తెలంగాణ భవన్ చుట్టూ పోలీసులు భారీగా మోహరించారు.
• సింగరేణి కార్మికుల మీటింగ్‌లో తాను మాట్లాడిన మాటలను కాంగ్రెస్ నేతలు కావాలనే వక్రీకరించారని సుమన్ ఆరోపించారు.
• రాష్ట్రంలో అప్రకటిత ఎమర్జెన్సీ నడుస్తోందని, శ్రీలంక, బంగ్లాదేశ్ తరహాలో తెలంగాణలోనూ కాంగ్రెస్ ప్రభుత్వంపై ప్రజలు తిరగబడతారని ఆయన హెచ్చరించారు.
• తెలంగాణ ఉద్యమంలో తనపై 226 కేసులు ఉన్నాయని, ఇలాంటి అక్రమ కేసులకు, జైలు శిక్షలకు తాను భయపడేది లేదని సుమన్ స్పష్టం చేశారు.

Balka Suman Arrest | త్రినేత్ర.న్యూస్ : రాష్ట్ర రాజకీయాల్లో తీవ్ర ఉద్రిక్త పరిస్థితులు నెలకొన్నాయి. హైదరాబాద్‌లోని తెలంగాణ భవన్‌ చుట్టూ పోలీసులు భారీగా మోహరించారు. బీఆర్ఎస్ (BRS) మాజీ ఎమ్మెల్యే బాల్క సుమన్‌ను (Balka Suman) అరెస్ట్ చేసేందుకు పోలీసులు స్కెచ్ వేసినట్లు తెలుస్తోంది. సింగరేణి మీటింగ్‌లో ఆయన చేసిన వ్యాఖ్యలను వక్రీకరించి అక్రమంగా అరెస్ట్ చేయడానికి కాంగ్రెస్ ప్రభుత్వం కుట్ర పన్నుతోందని బీఆర్ఎస్ శ్రేణులు ఆరోపిస్తున్నాయి. పరిస్థితి ఉద్రిక్తంగా మారడంతో పార్టీ నాయకులు, కార్యకర్తలు పెద్ద ఎత్తున తెలంగాణ భవన్‌కు తరలివస్తున్నారు.

అసలేం జరిగింది?

సింగరేణి కార్మిక సంఘం సమావేశంలో తాను మాట్లాడిన మాటలను మంత్రులు పొన్నం ప్రభాకర్, అడ్లూరి లక్ష్మణ్ ఉద్దేశపూర్వకంగా వక్రీకరించారని బాల్క సుమన్ మీడియా సమావేశంలో మండిపడ్డారు. సింగరేణిలో జరిగిన 40 లక్షల మెట్రిక్ టన్నుల బొగ్గు కుంభకోణం (Scam) గురించి మాజీ మంత్రి హరీష్ రావు బయటపెట్టడంతో.. ప్రజల దృష్టిని మరల్చడానికే తన వ్యాఖ్యలను చీప్ ట్రిక్‌గా వాడుకుంటున్నారని ఆరోపించారు. తనపై కేసు నమోదు చేయాలని కాంగ్రెస్ (Congress) ఎమ్మెల్సీలు డీజీపీకి ఫిర్యాదు చేశారని, మళ్లీ తనను జైలుకు పంపేందుకు స్కెచ్ వేశారని ఆయన ఆవేదన వ్యక్తం చేశారు.

226 కేసులు చూశా.. జైలు నాకు కొత్త కాదు

తనపై కేసులు పెట్టడం కంటే ప్రభుత్వం సింగరేణి (Singareni) సంస్థపై దృష్టి పెట్టాలని సుమన్ హితవు పలికారు. "తెలంగాణ ఉద్యమ సమయంలో నాపై ఏకంగా 226 కేసులు నమోదయ్యాయి. హైదరాబాద్‌లోని అన్ని పోలీస్ స్టేషన్లతో పాటు సీసీఎస్ డార్క్ సెల్‌లో (Dark cell) కూడా ఉన్నాను. నాపై కేసులు పెడితే పెట్టుకోండి. సీఎం ఆఫీస్ డైరెక్షన్‌తోనే నన్ను ఆన్‌లైన్‌లో ట్రోల్ చేస్తున్నారు" అని ఆయన సవాల్ విసిరారు. గతంలో క్యాతనపల్లి మున్సిపల్ ఎన్నికల సమయంలోనూ తనను ఇబ్బంది పెట్టి జైలుకు పంపారని ఆయన గుర్తుచేశారు.

వారిపై కేసులు ఎందుకు పెట్టరు?

తమపై ఇష్టారాజ్యంగా కేసులు పెడుతున్న కాంగ్రెస్ ప్రభుత్వం.. విద్వేషపూరిత వ్యాఖ్యలు చేసిన సొంత పార్టీ ఎమ్మెల్యేలపై ఎందుకు చర్యలు తీసుకోవడం లేదని సుమన్ ప్రశ్నించారు. ఫార్మా కంపెనీని కాలుస్తానన్న జడ్చర్ల ఎమ్మెల్యేపై, అడ్డంగా నరుకుతామన్న రామగుండం ఎమ్మెల్యే మక్కన్ సింగ్ ఠాకూర్‌పై కేసులు ఎందుకు పెట్టలేదని నిలదీశారు. ప్రగతి భవన్‌ను బాంబులతో పేల్చేస్తానన్న ప్రస్తుత సీఎం రేవంత్ రెడ్డిపై (CM Revanth Reddy) కూడా కేసు పెట్టాలని డిమాండ్ చేశారు. దమ్ముంటే సింగరేణి ఏరియాకు, రైతుల కొనుగోలు కేంద్రాలకు వస్తారా అంటూ మంత్రి పొన్నం ప్రభాకర్‌కు సవాల్ విసిరారు.

శ్రీలంక, బంగ్లాదేశ్ తరహాలో తిరుగుబాటు తప్పదు

ప్రస్తుతం తెలంగాణలో అప్రకటిత ఎమర్జెన్సీ (Emergency) నడుస్తోందని బాల్క సుమన్ విమర్శించారు. కాంగ్రెస్ ప్రభుత్వ పాలనలో ఏ ఒక్క వర్గం కూడా సంతోషంగా లేదని అన్నారు. రైతులు, కార్మికుల ఆక్రోశాన్ని తాను పంచుకుంటే దానిపై రాద్ధాంతం చేస్తూ తనను పార్టీ నుంచి సస్పెండ్ చేయాలని మంత్రి అనడం హాస్యాస్పదమన్నారు. "శ్రీలంక, బంగ్లాదేశ్‌లో పాలకులపై ప్రజలు ఎలాగైతే తిరగబడ్డారో.. భవిష్యత్తులో తెలంగాణలోనూ అదే తరహా ప్రజల తిరుగుబాటు (Revolt) రావడం ఖాయం" అని బాల్క సుమన్ తీవ్ర స్థాయిలో హెచ్చరించారు. సీఎం ఆదిలాబాద్ టూర్ ముగిసేలోపు రైతుల సమస్యలు పరిష్కరించాలని ఆయన డిమాండ్ చేశారు.