HCU | హెచ్‌సీయూపై ఎస్ఎఫ్ఐ జెండా.. స్టూడెంట్ యూనియ‌న్ ఎన్నిక‌ల్లో ప్రెసిడెంట్‌గా దిల్షాదా విజ‌యం

HCU | త్రినేత్ర న్యూస్‌: హైదరాబాద్ సెంట్రల్ యూనివర్సిటీ (HCU) స్టూడెండ్ యూనియ‌న్‌ ఎన్నిక‌ల్లో స్టూడెంట్స్‌‌ ఫెడరేషన్‌‌ ఆఫ్‌‌ ఇండియా (SFI) జెండా ఎగుర‌వేసింది. అధ్య‌క్షురాలిగా ఎస్ఎఫ్ఐ నాయ‌కురాలు దిల్షాదా రైహాన్ (Dilshada Raihan) విజ‌యం సాధించారు. గచ్చిబౌలిలోని హెచ్‌సీయూలో స్టూడెంట్ యూనియన్ ఎన్నికలు (Students Union Election) సోమవారం జరిగాయి. దీనిలో 5,900 ఓట్లకు గానూ 79 శాతం పోలింగ్ జరిగింది. ఈ ఎన్నికల్లో ఎస్ఎఫ్ఐ, ఏఎస్ఏ ప్యాన‌ల్‌, ఏబీవీపీ-ఎస్ఎల్‌వీడీ, ఎన్ఎస్ యూఐ ప్యానెల్స్ పోటీలో నిలిచాయి. అయితే, ఎస్ఎఫ్ఐ, ఏఎస్ఏ, డీఎస్‌యూ, ఏఐఎస్ఎఫ్‌, టీఎఫ్ఎఫ్ విద్యార్థి సంఘాల‌తో కూడిన SFI- ASAప్యానెల్, ABVP-SLVD (సేవలాల్ విద్యార్థి దళ్) మధ్యే హోరాహోరిగా పోరు సాగింది.

మంగళవారం ఉదయం నుంచి ఓట్ల కౌంటింగ్ మొదలైంది. రాత్రి పొద్దుపోయే వ‌ర‌కు ఓట్ల లెక్కింపు సాగింది. తాజాగా ఫ‌లితాల‌ను హెచ్‌సీయూ ప్ర‌క‌టించింది. ప్రెసిడెంట్‌గా ఎస్ఎఫ్ఐ ప్యానెల్ ప్రతినిధి దిల్షాదా.. ఏబీవీపీ ప్రతినిధిపై 221 ఓట్ల మెజార్టీతో విజయం సాధించారు. ఇక ఎన్ఎస్‌యూఐ (NSUI) ప్యానెల్ నుంచి పీడీఎస్ యూ లీడర్ నవీన్ కుమార్ కు 461 ఓట్లు వ‌చ్చాయి.. నోటాకు 217 ఓట్లు పోల్ అవ‌గా మరో 55 ఓట్లు చెల్ల‌కుండా పోయాయి. కాగా, ఉపాధ్యక్షుడిగా TSFకి చెందిన కొర్రా నితిన్ చౌహాన్ (212 ఓట్ల‌తో), జనరల్ సెక్రటరీగా ASAకి చెందిన ప్రతీక్ (177 ఓట్ల‌తో) విజయం సాధించారు.