Pink Victory Run Hyderabad | పింక్ విక్టరీ రన్ 10వ వార్షికోత్సవం: మహిళల ఆరోగ్యంపై శ్రద్ధ పెట్టండి.. చిన్నజీయర్ స్వామిజీ, వైద్య నిపుణుల పిలుపు

Pink Victory Run Hyderabad | త్రినేత్ర న్యూస్ : కుటుంబ సంక్షేమం కోసం అహర్నిశలు శ్రమించే మహిళలు తమ సొంత ఆరోగ్యంపై కూడా సమానంగా దృష్టి సారించాలని, వ్యాయామాన్ని దైనందిన జీవితంలో భాగం చేసుకుని క్రమం తప్పకుండా వైద్య పరీక్షలు చేయించుకోవాలని ప్రముఖులు పిలుపునిచ్చారు. ఆదివారం హైదరాబాద్‌లో ఘనంగా జరిగిన 10వ ఎడిషన్ ‘పింక్ విక్టరీ రన్’ (Pink Victory Run) ఉత్సాహభరిత వాతావరణంలో సాగింది. ఈ కార్యక్రమంలో మహిళలు, పురుషులు, చిన్నారులు, వృద్ధులతో సహా దాదాపు 2,000 మందికి పైగా పాల్గొని సందడి చేశారు.

కుటుంబానికి పునాది మహిళే: డాక్టర్ గీతా నాగశ్రీ

ఈ కార్యక్రమానికి ముఖ్య నిర్వాహకురాలిగా వ్యవహరించిన మెడికవర్ క్యాన్సర్ ఇన్‌స్టిట్యూట్ సీనియర్ సర్జికల్ ఆంకాలజిస్ట్ డాక్టర్ గీతా నాగశ్రీ మాట్లాడుతూ.. తమ కుటుంబ ఆరోగ్యం కోసం నిరంతరం తపించే మహిళలు, తమ వ్యక్తిగత ఆరోగ్యాన్ని మాత్రం తరచూ నిర్లక్ష్యం చేస్తుంటారని గుర్తుచేశారు.

Also Read | ఫుడ్ డెలివ‌రీ ఆల‌స్య‌మైంద‌ని.. డెలివ‌రీ బాయ్‌పై దంప‌తుల దాడి.. వీడియో

"ఆరోగ్యవంతమైన మహిళే దృఢమైన కుటుంబానికి పునాది. మహిళల ఆరోగ్యం అనేది కేవలం వారి ఒక్కరి బాధ్యత మాత్రమే కాదు.. అది యావత్ కుటుంబ బాధ్యత. అందుకే మహిళలతో పాటు పురుషులు, పిల్లలు కూడా ఈ రన్‌లో పెద్ద ఎత్తున భాగస్వామ్యం కావడం ప్రశంసనీయం. మహిళలు ఎలాంటి సంకోచం లేకుండా రెగ్యులర్ చెకప్‌లు చేయించుకునేలా కుటుంబ సభ్యులు ప్రోత్సహించాలి." అని డాక్టర్ గీతా నాగశ్రీ అన్నారు.

సంకోచాన్ని వీడండి: చిన్నజీయర్ స్వామిజీ పిలుపు

ఈ రన్‌ను శ్రీశ్రీశ్రీ త్రిదండి చిన్నజీయర్ స్వామిజీ ముఖ్య అతిథిగా విచ్చేసి జెండా ఊపి ప్రారంభించారు. అనంతరం సభను ఉద్దేశించి ప్రసంగిస్తూ.. మహిళల్లో తమ ఆరోగ్యం పట్ల అవగాహన, సకాలంలో స్క్రీనింగ్ పరీక్షల ప్రాముఖ్యతపై దిశానిర్దేశం చేశారు. కుటుంబం కోసం స్వార్థం లేకుండా పాటుపడే మహిళలు, తమకు ఏదైనా అనారోగ్య సమస్య వస్తే మాత్రం బయటకు చెప్పేందుకు మొహమాటపడుతుంటారని, ఈ ధోరణి మారాల్సిన అవసరం ఉందని స్పష్టం చేశారు.

Also Read | మా హోట‌ల్‌ను తిరుప‌తిరెడ్డి లాక్కోవాల‌ని చూస్తున్న‌డు

క్యాన్సర్ మహమ్మారి తీవ్రత పెరుగుతున్న నేపథ్యంలో ఏ క్యాన్సర్‌నూ తేలిగ్గా తీసుకోకూడదని, సరైన సమయంలో స్క్రీనింగ్ చేయించుకోవడం ద్వారా క్యాన్సర్‌ను ప్రాథమిక దశలోనే గుర్తించి నివారించవచ్చని స్వామిజీ వివరించారు. ఈ సందర్భంగా 'మహిళా వికాస్', 'ఆరోగ్య తరంగిణి' సంస్థల కృషిని ప్రస్తావిస్తూ.. ఇప్పటివరకు 10 లక్షల మందికి పైగా మహిళలకు స్క్రీనింగ్ నిర్వహించి, 50 లక్షల మందిలో ఆరోగ్య స్పృహ కల్పించామని పేర్కొన్నారు.

సమాజ నిర్మాణంలో మహిళలే కీలకం

మహిళా సాధికారత సామాజిక పురోగతికి చోదకశక్తి అని ఫిక్కీ ఫ్లో (FICCI FLO) చైర్‌పర్సన్ సీతా రెడ్డి స్పష్టం చేశారు. మహిళల ఆరోగ్యం, ఆత్మవిశ్వాసం బలమైన సమాజ నిర్మాణానికి తోడ్పడతాయన్నారు. అలాగే రోటరీ డిస్ట్రిక్ట్ గవర్నర్ ఉదయ్ పిలానీ మాట్లాడుతూ.. మొబైల్ బస్సుల ద్వారా పల్లెలు, పట్టణాల్లో నిర్వహిస్తున్న హెల్త్ క్యాంపులను వివరించారు. ప్రతిరోజూ ఉదయం వ్యాయామం, సానుకూల దృక్పథంతో దినచర్యను ప్రారంభించాలని సీనియర్ రోటేరియన్ ఝాన్సీ ప్రేమానంద్ సూచించారు.

ఇదీ చదవండి | వరుణ యాగం చేసి జనాల ఖర్మకు వదిలేశాడు

10కే రన్, 5కే రన్, 3కే వాక్ విభాగాల్లో నిర్వహించిన ఈ ఈవెంట్‌లో మొదటిసారి పరుగు తీసిన నవ యువకులు, సీనియర్ సిటిజన్లు ప్రత్యేక ఆకర్షణగా నిలిచారు. ఇది కేవలం ఓ క్రీడా ఈవెంట్ మాత్రమే కాదని, ఆరోగ్యకరమైన స్త్రీలతోనే ఆరోగ్యకరమైన కుటుంబాలు, ఆరోగ్యకరమైన సమాజం రూపుదిద్దుకుంటాయని ఈ 10వ పింక్ విక్టరీ రన్ మరోసారి చాటిచెప్పింది.