Pink Power Run 3.0 | నెక్లెస్ రోడ్డుపై 35 వేల మందితో పరుగుల పండగ: రొమ్ము క్యాన్సర్‌పై పోరుకు హైదరాబాద్ పింక్ పవర్ రన్ 3.0

Pink Power Run 3.0 | త్రినేత్ర న్యూస్ : ఆదివారం తెల్లవారుజామునే భాగ్యనగరం గులాబీ రంగును పులుముకుంది. రొమ్ము క్యాన్సర్ ముందస్తు గుర్తింపు, మహిళల ఆరోగ్యంపై చైతన్యం తీసుకురావాలనే ఉన్నతమైన ఆశయంతో మేఘా ఇంజినీరింగ్ అండ్ ఇన్‌ఫ్రాస్ట్రక్చర్స్ లిమిటెడ్ (MEIL), సుధా రెడ్డి ఫౌండేషన్ సంయుక్తంగా నిర్వహించిన ‘పింక్ పవర్ రన్ 3.0’ అపూర్వ విజయాన్ని అందుకుంది. హుస్సేన్‌సాగర్ తీరంలోని హెచ్‌ఎండీఏ గ్రౌండ్స్ వేదికగా జరిగిన ఈ భారీ కమ్యూనిటీ రన్‌లో సుమారు 35 వేల మందికి పైగా రన్నర్లు పాల్గొని మహిళా ఆరోగ్య సాధికారతకు మద్దతు పలికారు.

అంతర్జాతీయ స్థాయి పోటీలు.. రూ.75 లక్షల ప్రైజ్ మనీ

ఈ ఈవెంట్‌లో 21K హాఫ్ మారథాన్, 10K, 5K, 3K కేటగిరీలలో పరుగులు నిర్వహించారు. అమెరికా, బ్రిటన్, యూఏఈ, కెన్యా, ఇథియోపియా, టాంజానియాతో సహా 11 దేశాలకు పైగా విదేశీ అథ్లెట్లు పాల్గొనడంతో నెక్లెస్ రోడ్డులో అంతర్జాతీయ మారథాన్ వాతావరణం కనిపించింది.

ఐదేళ్ల చిన్నారుల నుంచి 80 ఏళ్ల వృద్ధులు, దివ్యాంగులు సైతం ఉత్సాహంగా పరుగులు తీశారు. పోటీల్లో అద్భుత ప్రతిభ కనబరిచిన విజేతలకు నిర్వాహకులు మొత్తం రూ.75 లక్షల విలువైన నగదు బహుమతులను ట్రోఫీలతో పాటు అందజేశారు. 21కే హాఫ్ మారథాన్‌లో సునీల్ కుమార్ (పురుషులు), సోనమ్ (మహిళలు) విజేతలుగా నిలిచారు.

జెండా ఊపిన ప్రముఖులు.. సెలబ్రిటీల సందడి

తెలంగాణ పంచాయతీరాజ్ శాఖ మంత్రి దనసరి అనసూయ (సీతక్క), రాష్ట్ర డీజీపీ సీవీ ఆనంద్, ఎంఈఐఎల్ ఎండీ పీవీ కృష్ణారెడ్డి, సుధా రెడ్డి ఫౌండేషన్ అధినేత్రి సుధా రెడ్డి, యూఎస్ కాన్సులేట్ జనరల్ లారా విలియమ్స్, వీవీ లక్ష్మీనారాయణ తదితరులు జెండా ఊపి పరుగును ప్రారంభించారు.

మంత్రి సీతక్క మాట్లాడుతూ.. సమాజంలో మహిళల ఆరోగ్య పరిరక్షణపై ఇలాంటి భారీ కార్యక్రమాలు ఎంతగానో ఉపయోగపడతాయన్నారు. రోజువారీ వ్యాయామం ద్వారా జీవనశైలి వ్యాధులను నివారించవచ్చని పీవీ కృష్ణారెడ్డి స్పష్టం చేశారు. ఫిట్‌నెస్‌కు మొదటి ప్రాధాన్యత ఇవ్వాలని, పింక్ పవర్ రన్‌లో పాల్గొన్న ప్రతి ఒక్కరూ ఒక సెలబ్రిటీయేనని సుధా రెడ్డి ప్రశంసించారు.

ప్రత్యేక ఆకర్షణగా రమాబాయి.. అదిరిపోయిన థమన్ లైవ్ మ్యూజిక్

పిల్లల చదువుల కోసం గతంలో చెప్పులు లేకుండా 5 కి.మీ పరుగెత్తి దేశవ్యాప్తంగా ప్రశంసలు అందుకున్న మహారాష్ట్రకు చెందిన 47 ఏళ్ల రమాబాయి రణ్‌వీర్ ఈ రన్‌లో పాల్గొని అందరిలో స్ఫూర్తి నింపారు.

బాక్సర్ విజేందర్ సింగ్, మాజీ మిస్ వరల్డ్ ఓపల్ సుచేత, హీరో సిద్దు జొన్నలగడ్డ పాల్గొని రన్నర్లలో ఉత్సాహం నింపగా.. ప్రముఖ సంగీత దర్శకుడు ఎస్.ఎస్. థమన్ ఇచ్చిన లైవ్ మ్యూజిక్ షో వేదికను హోరెత్తించింది. స్టార్ యాంకర్ సుమ వ్యాఖ్యాతగా వ్యవహరించిన ఈ మెగా ఈవెంట్.. హైదరాబాద్ నగరంలో ఆరోగ్య స్పృహను కొత్త శిఖరాలకు చేర్చింది.