Osmania University | ఓయూలో తొలిసారిగా ఫాస్మి ద్వైవార్షిక సదస్సు

Osmania University | ఆసియాలో మాలిక్యులర్‌ ఇమేజింగ్‌ రంగంలో పరిశోధనలు, సాంకేతిక అభివృద్ధికి వేదికగా నిలిచే ఫాస్మి (FASMI) ద్వైవార్షిక సదస్సు–2026కు ఉస్మానియా విశ్వవిద్యాలయం ఆతిథ్యమిస్తోంది. ఫెడరేషన్‌ ఆఫ్‌ ఏషియన్‌ సొసైటీస్‌ ఫర్‌ మాలిక్యులర్‌ ఇమేజింగ్‌ (FASMI), మాలిక్యులర్‌ ఇమేజింగ్‌ సొసైటీ ఆఫ్‌ ఇండియా (MISI) సంయుక్తంగా నిర్వహిస్తున్న ఈ సదస్సు భారత్‌లో తొలిసారిగా జరుగుతోంది. మంగళవారం ప్రారంభమైన ఈ సమావేశానికి దేశ, విదేశాలకు చెందిన సుమారు 350 మంది శాస్త్రవేత్తలు, వైద్యులు, పరిశోధకులు, పరిశ్రమల నిపుణులు హాజరయ్యారు.

ఓయూకే గ‌ర్వ‌కార‌ణ‌మ‌న్న వీసీ

సదస్సును ప్రారంభించిన ఉస్మానియా విశ్వవిద్యాలయం వైస్‌ చాన్స్‌లర్‌ ప్రొఫెసర్‌ కుమార్‌ మొలుగ‌రం మాట్లాడుతూ.. ఈ అంతర్జాతీయ సదస్సు నిర్వహణ ఓయూకు గర్వకారణమన్నారు. గతంలో తైవాన్‌, ఆస్ట్రేలియా, జపాన్‌ వంటి దేశాల్లో ఈ సమావేశాలు జరిగాయని గుర్తుచేశారు. వైద్యరంగంలో రోగ నిర్ధారణ, చికిత్సలో కచ్చితత్వం ప్రాణాలను కాపాడటంలో కీలకమని పేర్కొన్నారు. ముఖ్యంగా క్యాన్సర్‌, మధుమేహం వంటి వ్యాధుల నియంత్రణకు అధునాతన సాంకేతికతలు అందుబాటులోకి రావాలని ఆకాంక్షించారు. వైద్య సదుపాయాల్లో అంతరాలను తగ్గించడంతోపాటు పరిశోధనలు, ఆవిష్కరణలను ప్రోత్సహించాలని సూచించారు.

వ్యక్తిగత వైద్య సేవలకు మాలిక్యులర్‌ ఇమేజింగ్‌

డ్యూక్‌–ఎన్‌యూఎస్‌ మెడికల్‌ స్కూల్‌కు చెందిన డాక్టర్‌ ఆన్‌–మేరీ చాకో మాట్లాడుతూ.. చికిత్సకు రోగులు ఎలా స్పందిస్తున్నారో అంచనా వేయడంలో మాలిక్యులర్‌ ఇమేజింగ్‌ ప్రాధాన్యం పెరుగుతోందన్నారు. వ్యక్తిగత అవసరాలకు అనుగుణంగా వైద్య సేవలు అందించడంలో ఈ సాంకేతికత కీలక పాత్ర పోషిస్తోందని వివరించారు. యువ పరిశోధకులు అంతర్జాతీయ సహకారంతో పరిశోధనలు చేపట్టాలని పిలుపునిచ్చారు. సదస్సులో భాగంగా మాలిక్యులర్‌ ఇమేజింగ్‌, కృత్రిమ మేధ (ఏఐ) అంశాలపై ప్రత్యేక వర్క్‌షాప్‌ నిర్వహించారు. సెంటర్‌ ఫర్‌ సెల్యులార్‌ అండ్‌ మాలిక్యులర్‌ బయాలజీ (సీసీఎంబీ) డైరెక్టర్‌ డాక్టర్‌ కుమారస్వామి తంగరాజ్‌ కీలకోపన్యాసం చేశారు. ఈసాటే ఇండియా ఎన్‌ఎస్‌ లిమిటెడ్‌ ఆధ్వర్యంలో పోర్టబుల్‌ అల్ట్రాసౌండ్‌ సాంకేతికతపై ప్రాయోగిక శిక్షణ ఇచ్చారు. ఎంఆర్‌ఐ, థెరానోస్టిక్స్‌, అల్ట్రాసౌండ్‌, మల్టీమోడల్‌ ఇమేజింగ్‌, వైద్యరంగంలో ఏఐ వినియోగం వంటి అంశాలపై శాస్త్రీయ సమావేశాలు నిర్వహించారు.