Invest Telangana Global Summit 2026 | ఫ్యూచర్ సిటీలో గ్లోబల్ సమ్మిట్ : డిసెంబర్ 7 నుంచి 9 వరకు సమ్మిట్

• ఫ్యూచర్ సిటీ వేదికగా 'ఇన్వెస్ట్ తెలంగాణ' గ్లోబల్ సమ్మిట్
• రక్షా ఎక్స్‌పో, ఇండియా జాయ్
• ఎల్‌నినోపై ప్రత్యేక క్లైమేట్ కాంక్లేవ్
• ప్రతి డెలిగేట్‌కు లైజనింగ్ ఆఫీసర్

Invest Telangana Global Summit 2026 | త్రినేత్ర న్యూస్ : తెలంగాణ రాష్ట్రానికి భారీ ఎత్తున అంతర్జాతీయ పెట్టుబడులను ఆకర్షించడమే లక్ష్యంగా డిసెంబర్ 7 నుంచి 9 వరకు నిర్వహించతలపెట్టిన 'ఇన్వెస్ట్ తెలంగాణ గ్లోబల్ సమ్మిట్–2026' ఏర్పాట్లపై ముఖ్యమంత్రి ఎ. రేవంత్ రెడ్డి సచివాలయంలో మంత్రులు, ఉన్నతాధికారులతో ఉన్నత స్థాయి సమీక్ష నిర్వహించారు. భారత్ ఫ్యూచర్ సిటీలోని 'యంగ్ ఇండియా స్కిల్స్ యూనివర్సిటీ' వేదికగా జరగనున్న ఈ సదస్సును గతంలో ఎన్నడూ లేని రీతిలో అత్యంత ప్రతిష్టాత్మకంగా నిర్వహించాలని సీఎం స్పష్టం చేశారు. నవంబర్ 15 నాటికి ఏర్పాట్లకు సంబంధించిన పూర్తి కార్యాచరణ ప్రణాళికను సిద్ధం చేయాలని అధికారులను ఆదేశించారు.

6 ప్రదర్శనశాలలు.. 52 రంగాలవారీ కీలక సమావేశాలు

గతంలో నిర్వహించిన తెలంగాణ రైజింగ్ సమ్మిట్‌లో ఒకే ఒక ఎక్స్‌పో హాల్ ఉండగా, ఈసారి ఏకంగా ఆరు భారీ ఎగ్జిబిషన్ హాళ్లను ఏర్పాటు చేస్తున్నారు. మూడు రోజుల పాటు సాగే ఈ సమ్మిట్‌లో ఆధునిక సాంకేతికత, సరికొత్త ఆవిష్కరణలు, ఉపాధి కల్పనకు పెద్దపీట వేస్తూ 4 ప్రధాన హాళ్లలో 52 సెక్టోరల్ సమావేశాలను నిర్వహించేలా ప్లాన్ చేశారు. ఈ సదస్సు నిర్వహణ పర్యవేక్షణకు 25 రంగాలవారీ ఎగ్జిక్యూటివ్ కౌన్సిళ్లను ఏర్పాటు చేయడంతో పాటు, ప్రపంచవ్యాప్తంగా దాదాపు 3,500 మంది ప్రతినిధులకు ఇప్పటికే ఆహ్వానాలు పంపారు.

వైమానిక విన్యాసాలు.. స్టార్టప్స్, ఫార్మా, గేమింగ్ హంగామా

సమ్మిట్‌లో ఏర్పాటు చేయనున్న ప్రత్యేక ఎక్స్‌పోలు ప్రధాన ఆకర్షణగా నిలవనున్నాయి.

రక్షా ఎక్స్‌పో: రక్షణ, అంతరిక్షం, ఏరోస్పేస్, సైబర్ సెక్యూరిటీ పరికరాలతో పాటు అత్యాధునిక డ్రోన్లు, రోబోటిక్స్ ప్రదర్శనలు ఉంటాయి. ప్రత్యేకంగా వైమానిక విన్యాసాలు (Air Shows) కూడా నిర్వహించనున్నారు. ఇప్పటికే 49 ప్రముఖ రక్షణ రంగ సంస్థలు ఇందులో భాగస్వామ్యం ఖరారు చేసుకున్నాయి.

ఇండియా జాయ్–2026: యానిమేషన్, విజువల్ ఎఫెక్ట్స్ (VFX), గేమింగ్, కామిక్స్ రంగానికి అంతర్జాతీయ వేదికను అందించనున్నారు.

స్టార్టప్ పెవిలియన్: 136 స్టార్టప్‌ల వినూత్న పరిష్కారాలను ప్రదర్శించనున్నారు. ప్రజా సమస్యలకు సాంకేతిక పరిష్కారాలు చూపేలా నిర్వహిస్తున్న 'తెలంగాణ ఇన్నోవేషన్ స్టార్టప్ ఛాలెంజ్' దరఖాస్తులకు నవంబర్ 20 వరకు గడువు ఉంది.

ఫార్మా అండ్ అగ్రికల్చర్: 60 ప్రముఖ ఫార్మా, లైఫ్ సైన్సెస్ కంపెనీల ప్రదర్శనతో పాటు, వ్యవసాయ పెవిలియన్‌లో అగ్రి-డ్రోన్లు, ఫుడ్ ప్రాసెసింగ్ రంగాలపై ప్రత్యేక దృష్టి సారించారు.

డిసెంబర్ 8న ‘తెలంగాణ క్లైమేట్ కాంక్లేవ్’: వాతావరణ సవాళ్లకు చెక్

ప్రపంచాన్ని వణికిస్తున్న ఎల్‌నినో ప్రభావం, కరువు పరిస్థితులు, తీవ్ర వేడిని ఎదుర్కొనేందుకు సమ్మిట్‌లో భాగంగా డిసెంబర్ 8న ప్రత్యేకంగా 'తెలంగాణ క్లైమేట్ కాంక్లేవ్' నిర్వహించనున్నారు. దాదాపు 200 మంది వ్యవసాయ శాస్త్రవేత్తలు, రైతులు, పర్యావరణ నిపుణులు ఈ వేదికపై మేధోమథనం జరపనున్నారు. కరువును తట్టుకునే విత్తన వంగడాలు, పశుసంరక్షణ, తాగునీటి భద్రత, వ్యర్థాల నిర్వహణ వంటి అంశాలపై తక్షణ చర్యలతో పాటు దీర్ఘకాలిక విధానాల రూపకల్పనపై సీఎం దిశానిర్దేశం చేశారు.

ఎయిర్‌పోర్టులోనే వెల్‌కమ్.. ప్రతి డెలిగేట్‌కు లైజనింగ్ ఆఫీసర్

సదస్సుకు వచ్చే అంతర్జాతీయ అతిథులు ఎయిర్‌పోర్టుకు చేరుకోగానే రిజిస్ట్రేషన్, అధికారిక పాస్‌ల ప్రక్రియను వెంటనే పూర్తి చేయాలని ముఖ్యమంత్రి అధికారులను ఆదేశించారు. ప్రతి ప్రతినిధికి ఒక లైజనింగ్ ఆఫీసర్‌ను కేటాయించడంతో పాటు, ప్రతి విభాగానికి ప్రత్యేక భద్రతా అధికారిని నియమించాలని స్పష్టం చేశారు. ఇతర రాష్ట్రాల ముఖ్యమంత్రులకు కూడా ఆహ్వానాలు పంపాలని సూచించారు. ఉప ముఖ్యమంత్రి భట్టి విక్రమార్క నేతృత్వంలో మంత్రులు ఉత్తమ్ కుమార్ రెడ్డి, శ్రీధర్ బాబు, వివేక్ వెంకటస్వామితో కూడిన కేబినెట్ సబ్-కమిటీ ఏర్పాట్లను నిరంతరం పర్యవేక్షించనుంది.