Bangladeshi Nationals Arrested | హైద‌రాబాద్‌లో అక్ర‌మ నివాసం.. బంగ్లాదేశీయుల అరెస్ట్

Bangladeshi Nationals Arrested | త్రినేత్ర‌.న్యూస్‌: జీడిమెట్ల పోలీస్ స్టేష‌న్ ప‌రిధిలో ఏడుగురు బంగ్లాదేశీయుల‌ను పోలీసులు అరెస్ట్ చేశారు. గాజులరామారం-జీడిమెట్ల ప్రాంతంలోని హెచ్ఏఎల్ ప్రాంతంలో ఉన్న ఓ అద్దె ఇంట్లో కొంతమంది బంగ్లాదేశ్ జాతీయులు అక్రమంగా నివసిస్తున్నట్లు గుర్తించారు. జీడిమెట్ల పీఎస్ ఎస్‌హెచ్‌వో తన బృందంతో కలిసి సోదాలు నిర్వహించి వారిని అదుపులోకి తీసుకున్నారు.

కుత్బుల్లాపూర్ జోన్ డీసీపీ ఎన్. కోటి రెడ్డి ఆదేశాల‌తో విశ్వసనీయ సమాచారం మేర‌కు జీడిమెట్ల పోలీస్ స్టేషన్ సిబ్బంది హెచ్ఏఎల్ ప్రాంతంలో సోదాలు చేప‌ట్టారు. ఏడుగురు బంగాదేశీయులు అక్ర‌మంగా నివాసం ఉంటున్న‌ట్లు పోలీసులు గుర్తించారు. వారిని అదుపులోకి తీసుకొని విచారించ‌గా భారతదేశంలో ఉండేందుకు అనుమతించే పాస్‌పోర్టులు, వీసాలు లేదా ఇతర ప్రయాణ పత్రాలు లేవని తేలింది. భారత్‌లోకి అక్రమంగా ప్రవేశించి దేశంలోని వివిధ ప్రాంతాల్లో చట్టవిరుద్ధంగా నివసిస్తున్నట్లు తేల్చారు. వారిని మెదక్ జిల్లా జోగిపేటలోని డిపోర్టేషన్ సెంటర్‌కు తరలించారు. అక్క‌డ‌ సంబంధిత అధికారులు అవసరమైన లాంఛనాలు పూర్తి చేసి వారిని బంగ్లాదేశ్‌కు తిరిగి పంపించ‌నున్న‌ట్లు పోలీసులు తెలిపారు. ఈ ఆపరేషన్‌లో ఎస్‌వోటీ కూకట్‌ప‌ల్లి జోన్ సిబ్బంది పాల్గొన్నారు.