HYDRAA Hyderabad | దేశం దృష్టిని ఆకర్షిస్తున్న ‘హైడ్రా’.. ఐఏఎస్ అధికారులకే పాఠాలు చెప్పిన కమిషనర్ రంగనాథ్

HYDRAA Hyderabad | త్రినేత్ర.న్యూస్ : దేశవ్యాప్తంగా నగరాలను ముంచెత్తుతున్న వరదలకు (Urban Floods) చెక్ పెట్టేందుకు హైదరాబాద్‌లో ఏర్పాటైన 'హైడ్రా' (HYDRAA) చేస్తున్న కృషి ఇప్పుడు జాతీయ స్థాయిలో చర్చనీయాంశమవుతోంది. మంగళవారం ముస్సోరీలోని లాల్ బహదూర్ శాస్త్రి నేషనల్ అకాడమీ ఆఫ్ అడ్మినిస్ట్రేషన్ (LBSNAA)లో జరిగిన శిక్షణా కార్యక్రమంలో హైడ్రా కమిషనర్ ఏవీ రంగనాథ్ పాలుపంచుకున్నారు. వివిధ రాష్ట్రాలకు చెందిన పౌర సంబంధాల, టౌన్ ప్లానింగ్ ఐఏఎస్ అధికారులకు (IAS Officers) విపత్తు నిర్వహణ, వ్యూహాలు అనే అంశంపై ఆయన పవర్ పాయింట్ ప్రజెంటేషన్ ద్వారా పలు ఆసక్తికర విషయాలు వివరించారు.

కాంక్రీట్ కాలువలతోనే అసలు ముప్పు

సహజసిద్ధమైన చెరువులు, కుంటలు, వాననీటి కాలువలను కబ్జా చేసి వాటి స్థానంలో కాంక్రీట్ కాలువలు (Concrete drains) నిర్మించడం వల్లే ప్రధాన నగరాలు నీట మునుగుతున్నాయని రంగనాథ్ స్పష్టం చేశారు. బెంగుళూరులో 80-90 శాతం భూభాగం కాంక్రీటీకరణ కావడం, ముంబైలో డ్రైనేజీ వ్యవస్థ సామర్థ్యం మించిపోవడం, ఢిల్లీలో యమునా నది వరద మైదానాల ఆక్రమణలు లాంటి ఉదాహరణలతో ఆయన ఈ సమస్య తీవ్రతను కళ్లకుకట్టారు.

హైదరాబాద్‌లో 'హైడ్రా' యాక్షన్ ప్లాన్

హైదరాబాద్ కూడా ఈ ఆక్రమణల ముప్పుకు మినహాయింపు కాదని.. అయితే గొలుసుకట్టు చెరువుల పరిరక్షణే లక్ష్యంగా హైడ్రా గట్టి చర్యలు తీసుకుంటోందని ఆయన ఐఏఎస్‌లకు తెలిపారు. తొలి దశలో 6 చెరువులను పునరుద్ధరించి, 75 ఎకరాల ఆక్రమణలను తొలగించామని చెప్పారు. ఇన్‌లెట్లు, ఔట్‌లెట్లను అభివృద్ధి చేశామని ఆయన పేర్కొన్నారు. ప్రస్తుతం మరో 14 చెరువుల్లో ఆక్రమణల తొలగింపు ద్వారా దాదాపు 150 ఎకరాలకు పైగా భూమిని కాపాడుతున్నట్లు వెల్లడించారు. వలస వచ్చిన వాన నీటిని తొలగించడానికి హైడ్రా డిజాస్టర్ రెస్పాన్స్ టీమ్‌లు, మాన్‌సూన్ టీమ్‌లు ప్రత్యేకంగా పని చేస్తున్నాయని తెలిపారు.

ఐఏఎస్‌ల ఆశ్చర్యం.. ప్రశంసల జల్లు

కేవలం రెండేళ్ల వ్యవధిలో 2471 ఎకరాల కబ్జాలను (480 ఎకరాల చెరువులు, నాలాలు) తొలగించడం పట్ల శిక్షణలో ఉన్న ఐఏఎస్ అధికారులు ఆశ్చర్యం వ్యక్తం చేస్తూ అభినందించారు. ఎఫ్‌టీఎల్ (FTL) నిర్ధారణలో టెక్నాలజీ వాడకం, కోర్టు కేసులు, రాజకీయ ఒత్తిళ్లను (Political pressure) ఎలా ఎదుర్కొంటున్నారో వారు ఆసక్తిగా రంగనాథ్ ద్వారా అడిగి తెలుసుకున్నారు. సికింద్రాబాద్ లాంటి రద్దీ ప్రాంతంలో ప్యాట్నీ నాలా ప్రక్షాళన ద్వారా 8 కాలనీలకు వరద ముప్పు తప్పించామని, అమీర్‌పేటలో పూడిపోయిన భూగర్భ పైప్‌లైన్లు క్లీన్ చేసి వరదలు రాకుండా చేశామని ఆయన చెప్పారు. ఆక్రమణల తొలగింపులో నగరవాసుల నుంచి కూడా హైడ్రాకు పూర్తి స్థాయి మద్దతు లభిస్తోందని కమిషనర్ రంగనాథ్ సగర్వంగా తెలిపారు.