Arrive Alive Campaign | హెల్మెట్‌ ఉంటేనే ఇంటికి.. ఎరైవ్‌ అలైవ్‌లో ట్రాఫిక్‌ పోలీసుల అవగాహన

Arrive Alive Campaign | రహదారి భద్రతపై అవగాహన పెంచేందుకు హైదరాబాద్‌ ట్రాఫిక్‌ పోలీసులు చేపట్టిన ‘ఎరైవ్‌ అలైవ్‌’ కార్యక్రమంలో భాగంగా ఎన్టీఆర్‌ జంక్షన్‌లో హెల్మెట్ల పంపిణీ కార్యక్రమం నిర్వహించారు. జూబ్లీహిల్స్‌ జోన్‌ ట్రాఫిక్‌ పోలీసులు, తారక్‌ ట్రస్ట్‌ సంయుక్త ఆధ్వర్యంలో జరిగిన ఈ కార్యక్రమంలో ద్విచక్ర వాహనదారులు, పిలియన్‌ రైడర్లకు 200 ఐఎస్‌ఐ ముద్ర కలిగిన హెల్మెట్లను అందజేశారు. జూబ్లీహిల్స్‌ ట్రాఫిక్‌ ఏసీపీ కే హరి ప్రసాద్‌, బంజారాహిల్స్‌ ట్రాఫిక్‌ పోలీస్‌ స్టేషన్‌ ఎస్‌హెచ్‌ఓ కే సునీల్‌ పాల్గొని వాహనదారులకు హెల్మెట్‌ ప్రాధాన్యాన్ని వివరించారు. ప్రమాదాల సమయంలో తలకు తీవ్ర గాయాలు కాకుండా ఉండేందుకు ప్రతి ఒక్కరూ హెల్మెట్‌ ధరించడం తప్పనిసరి అని సూచించారు.

ఈ సందర్భంగా పోలీసులు వాహనదారులతో మాట్లాడి ట్రాఫిక్‌ నిబంధనలపై అవగాహన కల్పించారు. రాంగ్‌ సైడ్‌ డ్రైవింగ్‌, వాహనం నడుపుతూ మొబైల్‌ ఫోన్‌ వినియోగించడం, మైనర్లకు వాహనాలు ఇవ్వడం వంటి నిర్లక్ష్యపు చర్యలు ప్రమాదాలకు కారణమవుతున్నాయని తెలిపారు. డ్రైవింగ్‌ సమయంలో అప్రమత్తంగా ఉండాలని, నిబంధనలు పాటించాలని కోరారు. రహదారి భద్రతపై ప్రజల్లో మార్పు తీసుకురావడమే లక్ష్యంగా ‘ఎరైవ్‌ అలైవ్‌’ కార్యక్రమాన్ని నిర్వహిస్తున్నట్లు ట్రాఫిక్‌ పోలీసులు తెలిపారు. హెల్మెట్ల పంపిణీ కార్యక్రమానికి వాహనదారుల నుంచి మంచి స్పందన లభించింది.