Dasoju Sravan | అల‌య్ బ‌ల‌య్‌తో బంధాలు ఇంకింత‌ బ‌ల‌ప‌డాలే

• పూర్వికుల పోరాట స్ఫూర్తి వెంట న‌డ‌వాలే
• బీఆర్ఎస్ ఎమ్మెల్సీ దాసోజు శ్ర‌వ‌ణ్‌ పిలుపు

Dasoju Sravan | త్రినేత్ర న్యూస్: అల‌య్ బ‌ల‌య్‌(Alai-Balai)తో బంధాలు ఇంకింత బ‌ల‌ప‌డాల‌ని బీఆర్ఎస్ ఎమ్మెల్సీ దాసోజు శ్ర‌వ‌ణ్ (Dasoju Sravan) ఆకాంక్షించారు. మాదిగ స‌మాజానికి గొప్ప చ‌రిత్ర ఉంద‌న్నారు. అందరం ఒకే సమాజానికి చెందినవారిగా, ఒకరి కష్టాల్లో మరొకరు తోడుగా నిలుస్తూ, ఒకరి విజయాన్ని మరొకరు మన విజయంగా భావిస్తూ ముందుకు సాగాలని పిలుపునిచ్చారు. ఖైరతాబాద్ నియోజకవర్గంలో ఆదివారం నిర్వ‌హించిన‌ మాదిగల అలయ్ బలయ్ కార్యక్రమం సంద‌ర్భంగా ఆయ‌న ప్ర‌సంగించారు.

విద్య‌నే బ‌లం, ఐక్య‌తే ఆయుధం

అలయ్ బలాయ్ అంటే ఆత్మీయత.. అలయ్ బలాయ్ అంటే ఐక్యత.. అలయ్ బలాయ్ అంటే సోదరభావం. మన పూర్వీకులు ఎన్నో కష్టాలు, ఎన్నో సవాళ్లు ఎదుర్కొన్నారు. ఆత్మగౌరవాన్ని కోల్పోకుండా సమాజ అభివృద్ధి కోసం ఎంతో కృషి చేశారు. వారి పోరాట స్ఫూర్తిని మనం ఆదర్శంగా తీసుకోవాలి. మన సమాజానికి విద్యే బలం.. ఐక్యతే ఆయుధం.. ఆత్మగౌరవమే మన గుర్తింపు.

మన హక్కుల సాధన కోసం ప్రజాస్వామ్య మార్గంలో ఐక్యంగా ముందుకు సాగాలి. సామాజిక న్యాయం, సమాన అవకాశాలు, విద్య, ఉపాధి, గౌరవప్రదమైన జీవనం ప్రతి ఒక్కరికీ అందేలా కృషి చేయాలి. ఈ కార్యక్రమం ద్వారా మన మధ్య ఆత్మీయ సంబంధాలు మరింత బలపడాలి. పరస్పర సహకారం పెరగాలి. సమాజంలో ఐక్యత, చైతన్యం, అభివృద్ధి మరింత విస్తరించాలి అని దాసోజు ఆకాంక్షించారు.

ఈ కార్యక్రమంలో అంజన్న, నవీన్, కుమార్ తదితరులు పాల్గొన్నారు.