Nalgonda X Roads – Owaisi Junction | రేపే న‌ల్ల‌గొండ ఎక్స్ రోడ్ – ఓవైసీ జంక్ష‌న్ కారిడార్ ప్రారంభం

• ఆ మార్గంలో ట్రాఫిక్ సమస్యకు శాశ్వత పరిష్కారం

Nalgonda X Roads - Owaisi Junction | త్రినేత్ర‌.న్యూస్ : హైదరాబాద్ నగరంలో ట్రాఫిక్ రద్దీని తగ్గించి, ప్రజలకు వేగవంతమైన, సౌకర్యవంతమైన ప్రయాణాన్ని అందించేందుకు ప్రజా పాలన ప్రభుత్వం చేపడుతున్న మౌలిక వసతుల అభివృద్ధిలో మరో కీలక ఘట్టం ఆవిష్కృతం కానుంది. నల్గొండ ‘ఎక్స్‌’ రోడ్స్‌ నుంచి సైదాబాద్‌, ఐఎస్‌ సదన్‌ మీదుగా ఓవైసీ జంక్షన్‌ వరకు కాన్‌ఫ్లీక్ట్‌ ఫ్రీ కారిడార్‌గా అభివృద్ధి చేసిన ఈ ప్రాజెక్టును ముఖ్యమంత్రి రేవంత్ రెడ్డి సెప్టెంబర్ 3న ప్రారంభించనున్నారు.

రూ. 620 కోట్ల అంచ‌నా వ్య‌యంతో..

రూ.620 కోట్ల అంచనా వ్యయంతో చేపట్టిన ఈ ప్రాజెక్టు మొత్తం 3.23 కిలోమీటర్ల పొడవు ఉండగా, ప్రధాన వయాడక్ట్‌ 2.53 కిలోమీటర్లు, ఐఎస్‌ సదన్‌ జంక్షన్‌ నుంచి 200 మీటర్ల అప్‌ ర్యాంప్‌ నిర్మించారు. చంచల్‌గూడ, సైదాబాద్‌, ఐఎస్‌ సదన్‌ ప్రాంతాలను కలుపుతూ ఈ కారిడార్‌ నిర్మాణం జరిగింది.

సిగ్న‌ల్ ర‌హిత ప్ర‌యాణం.. 30 నిమిషాలు ఆదా

ఈ కారిడార్‌ ద్వారా నల్గొండ ‘ఎక్స్‌’ రోడ్స్‌ నుంచి ఓవైసీ ఆసుపత్రి వరకు సిగ్నల్‌ రహిత ప్రయాణం సాధ్యమవుతుంది. చంచల్‌గూడ, సైదాబాద్‌, ఐఎస్‌ సదన్‌ ప్రాంతాల్లో ట్రాఫిక్‌ ఇబ్బందులు తగ్గడంతో పాటు ప్రయాణ సమయం సుమారు 30 నిమిషాల వరకు ఆదా అవుతుంది. వాహనాలు నిలిచిపోయే సమయం తగ్గడం వల్ల ఇంధన వినియోగం, వాయు కాలుష్యం కూడా తగ్గుతాయి.