Musi Riverfront | మూసీ రివర్‌ఫ్రంట్ పనులను ప‌రిశీలించిన సీఎస్ సంజ‌య్ జాజు

Musi Riverfront | కాంగ్రెస్ ప్ర‌భుత్వం ప్ర‌తిష్టాత్మ‌కంగా చేపట్టిన మూసీ రివర్‌ఫ్రంట్ డెవలప్‌మెంట్ ప్రాజెక్టు తొలి దశ పనులను రాష్ట్ర ప్రధాన కార్యదర్శి సంజ‌య్ జాజు గురువారం క్షేత్రస్థాయిలో పరిశీలించారు. ప్రాజెక్టు పురోగతిని సమీక్షిస్తూ, దీర్ఘకాలిక ప్రయోజనాలను దృష్టిలో ఉంచుకుని ప్రణాళికతో పనులు వేగవంతం చేయాలని అధికారులకు సూచించారు. ఉస్మాన్‌సాగర్, నార్సింగి ఎస్‌టీపీ ప్రాంతం, గాంధీ సరోవర్ ప్రాజెక్టు భూములను ఆయన పరిశీలించారు. ఇవన్నీ రాష్ట్ర ప్రభుత్వం చేపట్టిన సమగ్ర పునరుజ్జీవన, పట్టణ అభివృద్ధి కార్యక్రమంలో కీలక భాగాలని అధికారులు వివరించారు.

ఈ సందర్భంగా ఎంఆర్‌డీసీఎల్‌ (MRDCL) మేనేజింగ్ డైరెక్టర్, జాయింట్ మేనేజింగ్ డైరెక్టర్, హెచ్‌ఎండబ్ల్యూఎస్‌ఎస్‌బీ (HMWSSB) మేనేజింగ్ డైరెక్టర్‌తో పాటు వివిధ శాఖల ఉన్నతాధికారులతో సమీక్ష సమావేశం నిర్వహించారు. వరదల నివారణ చర్యలు, మురుగునీటి శుద్ధి వ్యవస్థల సమన్వయం, భూ అభివృద్ధి పనుల సంసిద్ధత, రివర్‌ఫ్రంట్ కారిడార్‌కు అవసరమైన మౌలిక సదుపాయాల ప్రణాళికపై విస్తృతంగా చర్చించారు. మూసీ రివర్‌ఫ్రంట్ ప్రాజెక్టు పర్యావరణ సమతుల్యతను కాపాడేలా, భవిష్యత్ అవసరాలకు అనుగుణంగా, నగర రూపురేఖలను మార్చేలా అమలు చేయాలని సీఎస్ సూచించారు. అన్ని శాఖలు సమన్వయంతో పనిచేయడంతో పాటు పర్యావరణ, సాంకేతిక ప్రమాణాలను ఖచ్చితంగా పాటించాలని ఆయన స్పష్టం చేశారు. తద్వారా హైదరాబాద్ ప్రజలకు దీర్ఘకాలిక ప్రయోజనాలు అందేలా ప్రాజెక్టును తీర్చిదిద్దాలని సూచించారు. మూసీ, ఈసా నదుల మధ్య గాంధీ సరోవర్ సంగమం వరకు ఉన్న ప్రాంతానికి ప్రత్యేక మాస్టర్‌ప్లాన్ రూపొందించాలని ఎంఆర్‌డీసీఎల్‌, హెచ్‌ఎండీఏ అధికారులకు సూచించారు. రివర్‌ఫ్రంట్ అభివృద్ధితో పాటు మెరుగైన అనుసంధానం, స్థిరమైన పట్టణాభివృద్ధికి దోహదపడుతుందని పేర్కొన్నారు.