Kurmaiahgari Naveen Kumar | ఈదులకుంట భూవివాదం: నాపై బురద జల్లితే లీగల్ యాక్షన్ తప్పదు.. బీఆర్ఎస్ ఎమ్మెల్సీ వార్నింగ్

Kurmaiahgari Naveen Kumar | త్రినేత్ర.న్యూస్ : హైదరాబాద్ కూకట్‌పల్లి శివార్లలోని ఈదులకుంట చెరువు భూముల వ్యవహారం తెలంగాణ రాజకీయాల్లో హాట్ టాపిక్ గా మారింది. ఈ కబ్జా వ్యవహారంలో BRS పార్టీకి చెందిన ఎమ్మెల్సీ హస్తం ఉందంటూ సోషల్ మీడియా, పలు వార్తా ఛానెళ్లలో జోరుగా ప్రచారం జరుగుతోంది. అయితే, ఈ రూమర్స్ పై బీఆర్ఎస్ ఎమ్మెల్సీ కూర్మయ్యగారి నవీన్ కుమార్ స్పందిస్తూ ఒక పత్రికా ప్రకటన విడుదల చేశారు. ఆ వివాదాస్పద భూములతో వ్యక్తిగతంగా తనకు, తన కుటుంబానికి లేదా తన సంస్థలకు ఎలాంటి సంబంధం లేదని ఆయన తేల్చి చెప్పారు

పేరులో పోలికతోనే ఈ కన్ఫ్యూజన్

మీడియాలో ప్రముఖంగా వినిపిస్తున్న "కె. నవీన్ కుమార్" అనే వ్యక్తి ఎవరో తనకు అసలు తెలియదని ఎమ్మెల్సీ స్పష్టం చేశారు. కేవలం పేరులో ఉన్న సిమిలారిటీ (సారూప్యత) కారణంగా కావాలనే తనను ఈ వ్యవహారంతో ముడిపెడుతున్నారని ఆయన ఆవేదన వ్యక్తం చేశారు. రాజకీయంగా తన ఇమేజ్ డ్యామేజ్ చేసేందుకే ఇలాంటి నిరాధారమైన ఆరోపణలు చేస్తున్నారని, ఇది కేవలం తనపై బురద జల్లే ప్రయత్నమేనని మండిపడ్డారు.

క్రాస్ చెక్ చేయకుండా మాట్లాడొద్దు

బాధ్యతాయుతమైన పెద్ద పదవుల్లో ఉన్న వ్యక్తులు కూడా క్రాస్ చెక్ చేసుకోకుండా తన పేరును ప్రస్తావించడం కరెక్ట్ కాదని ఆయన హితవు పలికారు. ఈదులకుంట ఇష్యూలో తనపై తప్పుడు వార్తలు రాసిన మీడియా సంస్థలు వెంటనే వాస్తవాలను పరిశీలించి ఆ తప్పును సరిదిద్దుకోవాలని ఆయన డిమాండ్ చేశారు.

లీగల్ యాక్షన్ తీసుకుంటా

తన ప్రతిష్టకు భంగం కలిగించేలా ఎవరైనా ఫేక్ ప్రచారం కంటిన్యూ చేస్తే ఏమాత్రం ఉపేక్షించేది లేదని ఆయన స్పష్టం చేశారు. సంబంధిత వ్యక్తులు, మీడియా సంస్థలపై ఏమాత్రం వెనకాడకుండా చట్టపరమైన చర్యలు (లీగల్ యాక్షన్) తీసుకుంటానని స్ట్రాంగ్ వార్నింగ్ ఇచ్చారు. కాబట్టి ప్రజలు ఇలాంటి అసత్య ప్రచారాలను గుడ్డిగా నమ్మొద్దని, వాస్తవాలను మాత్రమే విశ్వసించాలని ఎమ్మెల్సీ నవీన్ కుమార్ విజ్ఞప్తి చేశారు.