Uppal Flyover Delay | ఉప్పల్ ఫ్లైఓవర్‌కు 8 ఏళ్లు.. జూన్ 2027 నాటికైనా గోస తీరేనా? ట్రాఫిక్, దుమ్ములో ప్రజల నిత్య నరకం

• 8 ఏళ్లుగా తీరని గోస
• ట్రాఫిక్, పొల్యూషన్ నరకం
• మారిన కాంట్రాక్టర్లు, తప్పిన హామీలు
• జూన్ 2027 డెడ్‌లైన్

Uppal Flyover Delay | త్రినేత్ర న్యూస్ : ఏళ్లు గడుస్తున్నాయి, పాలకులు మారుతున్నారు, గడువులు దాటిపోతున్నాయి.. కానీ ఉప్పల్ ఫ్లైఓవర్ నిర్మాణం మాత్రం ఒక అంతులేని కథలా మిగిలిపోయింది. హైదరాబాద్ నగరాన్ని వరంగల్ హైవేతో అనుసంధానించే అత్యంత కీలకమైన ఉప్పల్ - నారపల్లి ఎలివేటెడ్ కారిడార్ పనులు 2018లో మొదలై ఎనిమిదేళ్లు పూర్తవుతున్నా ఇప్పటికీ కొలిక్కి రాలేదు. ట్రాఫిక్ రద్దీని తగ్గించాల్సిన ఈ భారీ ప్రాజెక్టే ఇప్పుడు లక్షలాది మంది వాహనదారులకు, స్థానికులకు శాపంగా మారింది.

కొద్ది దూరానికే 45 నిమిషాలు.. వాహనదారుల అవస్థలు

హైదరాబాద్–వరంగల్ జాతీయ రహదారిపై రోజూ వేలాది వాహనాలు రాకపోకలు సాగిస్తుంటాయి. అయితే ఉప్పల్ ఏషియన్ థియేటర్ నుంచి నారపల్లి, ఘట్‌కేసర్ వైపు వెళ్లాలన్నా, లేదా రింగ్ రోడ్డు దాటాలన్నా ఉదయం, సాయంత్రం పీక్ అవర్స్‌లో కనీసం 30 నుంచి 45 నిమిషాల సమయం పడుతోంది. పండుగల సమయాల్లోనైతే ఉప్పల్ క్రాస్‌రోడ్స్ నుంచి నల్లచెరువు కట్ట వరకు కిలోమీటర్ల మేర వాహనాలు నిలిచిపోయి నరకం కనిపిస్తోందని స్థానికులు ఆవేదన వ్యక్తం చేస్తున్నారు.

ఉప్పల్ అంటేనే డస్ట్, పొల్యూషన్.. వ్యాపారుల గగ్గోలు

ట్రాఫిక్ సమస్య ఒక ఎత్తైతే.. నిర్మాణ పనుల వల్ల లేస్తున్న దుమ్ము, ధూళి ప్రజల ఆరోగ్యాన్ని హరిస్తోంది. గాల్లో కాలుష్యం ఢిల్లీ స్థాయికి చేరుకుందని స్థానిక వ్యాపారులు వాపోతున్నారు. రహదారి పక్కన ఉన్న దుకాణాల్లోకి దుమ్ము చేరి వస్తువులు పాడవుతుండటంతో కస్టమర్లు రావడానికే భయపడుతున్నారు. ద్విచక్ర వాహనదారులు, ఆటో ప్రయాణికులు తీవ్ర శ్వాసకోశ సమస్యలు, కంటి ఇన్ఫెక్షన్ల బారిన పడుతున్నారు.

హామీల పర్వం.. మారుతున్న కాంట్రాక్టర్లు

గత బీఆర్ఎస్ ప్రభుత్వ హయాంలో కేంద్ర నిధుల సమన్వయ లోపం, భూసేకరణ సమస్యలతో పనులు మందగించాయి. ఈ క్రమంలో ఇప్పటికే ముగ్గురు కాంట్రాక్టర్లు మారారు. కాంగ్రెస్ ప్రభుత్వం అధికారంలోకి వచ్చిన తర్వాత రోడ్లు, భవనాల శాఖ మంత్రి కోమటిరెడ్డి వెంకట్‌రెడ్డి గత దసరా నాటికే ఫ్లైఓవర్‌ను ప్రారంభిస్తామని గట్టిగా హామీ ఇచ్చినప్పటికీ పనుల్లో ఆశించిన వేగం కనిపించలేదు. తాజాగా రాష్ట్ర ప్రభుత్వం జూన్ 2027 నాటికి ప్రాజెక్టును పూర్తి చేస్తామని సరికొత్త డెడ్‌లైన్ ప్రకటించింది. అయితే గత చేదు అనుభవాల దృష్ట్యా ఈ గడువైనా నిలబడుతుందా అని నగరవాసులు ప్రశ్నిస్తున్నారు.

తాత్కాలిక ఊరటైనా కల్పించరా?

ఫ్లైఓవర్ పూర్తి కావడానికి ఇంకో ఏడాదికి పైగా సమయం పట్టే అవకాశం ఉన్నప్పుడు, అప్పటివరకు ప్రజల కష్టాలను తగ్గించేందుకు కనీస చర్యలు ఎందుకు చేపట్టడం లేదన్న ప్రశ్నలు వినిపిస్తున్నాయి. వర్షం పడితే నల్లచెరువు కట్ట వద్ద నీరు నిలిచిపోయి రాకపోకలు స్తంభించిపోతున్నాయి. కనీసం గుంతలు పూడ్చి సర్వీస్ రోడ్లను మెరుగుపరచడం, దుమ్ము లేవకుండా క్రమం తప్పకుండా నీటిని చల్లడం, పీక్ అవర్స్‌లో ట్రాఫిక్ పోలీసులను అదనంగా మొహరించడం వంటి చర్యలైనా చేపట్టాలని స్థానికులు, వాహనదారులు ముక్తకంఠంతో డిమాండ్ చేస్తున్నారు.