KTR Speech Khairatabad | తలాపున పారుతుంది గోదారి.. నీ చేను, నీ చెలక ఎడారి

• 1,000 టీఎంసీల నీళ్లు సముద్రం పాలు
• ఇది కాంగ్రెస్ తెచ్చిన కరువే
• కేటీఆర్ సంచలన వ్యాఖ్యలు
• కేసీఆర్ జ్ఞాపకశక్తిపై ఆసక్తికర పోలిక

KTR Speech Khairatabad | త్రినేత్ర న్యూస్ : తెలంగాణలో ప్రస్తుతం నెలకొన్న కరువు పరిస్థితులు ప్రకృతి తెచ్చినవి కావు.. ముమ్మాటికీ కాంగ్రెస్ పాలకుల వికృతి తెచ్చినవేనని బీఆర్ఎస్ వర్కింగ్ ప్రెసిడెంట్ కేటీఆర్ తీవ్రస్థాయిలో ధ్వజమెత్తారు. హైదరాబాద్ ఖైరతాబాద్‌లోని మోక్షగుండం విశ్వేశ్వరయ్య భవన్‌లో తెలంగాణ వికాస సమితి ఆధ్వర్యంలో నిర్వహించిన ప్రముఖ కవి, రచయిత ‘మల్లావఝుల సదాశివుడు’ స్మారక పురస్కార ప్రదానోత్సవంలో ఆయన ముఖ్య అతిథిగా ప్రసంగించారు. గోదావరి, కృష్ణా నదుల్లో సమృద్ధిగా నీళ్లు ఉన్నప్పటికీ.. కేవలం రాజకీయ కక్షసాధింపుతో పంపులు ఆన్ చేయకుండా రైతులను నిలువునా ముంచారని ఆగ్రహం వ్యక్తం చేశారు.

వెయ్యి టీఎంసీల నీళ్లు సముద్రం పాలు

ఈ ఏడాది వర్షాలు సమృద్ధిగా కురిసినా పాలకుల నిర్లక్ష్యం వల్ల రైతాంగానికి తీరని అన్యాయం జరిగిందని కేటీఆర్ గణాంకాలతో సహా వివరించారు. "భగవంతుడు అద్భుతంగా నీళ్లిచ్చాడు. గోదావరిలో 750 టీఎంసీలు, కృష్ణాలో 258 టీఎంసీల వరద వచ్చింది. అంటే దాదాపు 1,000 టీఎంసీల నీళ్లు వృథాగా సముద్రంలో కలిసిపోయాయి. కన్నెపల్లి పంప్‌హౌస్ వద్దకు బీఆర్ఎస్ బృందం వెళ్లి లక్షల క్యూసెక్కుల నీళ్లు దిగువకు పోతున్నాయని చూపించాం. ఒక్క స్విచ్ ఆన్ చేసి పంపులు నడిపితే ఆయకట్టుకు నీళ్లందుతాయి, రాజకీయ పగలు తర్వాత తీర్చుకోవచ్చని ప్రాధేయపడినా కాంగ్రెస్ పాలకులు కనికరించలేదు" అని కేటీఆర్ మండిపడ్డారు.

కేసీఆర్ ప్రాజెక్టులపై కక్ష.. రైతులకు శాపం

గతంలో కేసీఆర్ నిర్మించిన కాళేశ్వరం, పాలమూరు-రంగారెడ్డి ఎత్తిపోతల ప్రాజెక్టులపై ఉన్న అక్కసుతోనే నీటిని లిఫ్ట్ చేయలేదని కేటీఆర్ ఆరోపించారు. "కరువు వస్తేనే కాళేశ్వరం ప్రాజెక్టు అసలు విలువ తెలుస్తుందని ఆనాడు కేసీఆర్ గారు ఎప్పుడో చెప్పారు. ఇప్పుడు అదే జరుగుతోంది. 'తలాపున పారుతుంది గోదారి.. నీ చేను నీ చెలక ఎడారి' అని గోరటి వెంకన్న రాసిన పాటను గుర్తుచేస్తూ.. కవులు ఎంతో దూరదృష్టితో రాసిన ఆ మాటలు నేటి కాంగ్రెస్ పాలనలో మళ్లీ నిజమయ్యాయి. ఇది ముమ్మాటికీ ప్రభుత్వ వైఫల్యమే" అని విమర్శించారు.

కేసీఆర్ మెమరీ కంప్యూటర్ హార్డ్ డిస్క్ లాంటిది

తెలంగాణ ఉద్యమ ప్రస్థానాన్ని, కేసీఆర్ సాహిత్య అభిమానాన్ని ఈ సందర్భంగా కేటీఆర్ నెమరువేసుకున్నారు. కేసీఆర్ ఎంఏ తెలుగు లిటరేచర్ పూర్తి చేశారని, నిరంతరం పుస్తకాలు చదివే అలవాటు ఆయన సొంతమని చెప్పారు. "కంప్యూటర్‌లలో టెరాబైట్లు, మెగాబైట్లు అని హార్డ్ డిస్క్ మెమరీ గురించి చెబుతుంటారు. 72 ఏళ్ల వయసులోనూ కేసీఆర్ జ్ఞాపకశక్తి అంతకంటే అద్భుతంగా ఉంటుంది. వందలాది పద్యాలు, కవిత్వాలు ఆయన నోటి నుంచి నదీ ప్రవాహంలా అలవోకగా వచ్చేస్తుంటాయి" అని ఆసక్తికర వ్యాఖ్యలు చేశారు.

ఉద్యమ నాటి స్ఫూర్తి గీతాన్ని గుర్తుచేసిన కేటీఆర్

2001లో కేసీఆర్ రెండో దశ తెలంగాణ ఉద్యమాన్ని ప్రారంభించినప్పుడు చాలామందిలో రకరకాల అనుమానాలు ఉండేవని కేటీఆర్ గుర్తుచేశారు. ఈ నాయకుడితో ఉద్యమం సాధ్యమేనా, మధ్యలోనే ఆపేస్తారా అని సందేహించిన వారికి ధైర్యం నింపేందుకు కేసీఆర్ స్వయంగా ఒక పాట రాశారని తెలిపారు.

"సిపాయిల తిరుగుబాటు విఫలమయ్యిందని అనుకుంటే... వచ్చేదా దేశానికి స్వాతంత్య్రం? రాజీలేని పోరాటమే విజయం సాధిస్తుంది.. ముమ్మాటికి తెలంగాణ రాష్ట్రం వచ్చి తీరుతుంది!"

ఈ కవితా పంక్తులు ఉద్యమకారుల్లో నూతనోత్తేజాన్ని నింపాయని, చివరికి అనుకున్న లక్ష్యాన్ని సాధించి రాష్ట్రాన్ని సాధించుకున్నామని కేటీఆర్ పేర్కొన్నారు. సాహిత్యానికి, ప్రజా పోరాటాలకు విడదీయరాని సంబంధం ఉందని కొనియాడారు.

నాడు "తలాపున పారుతుంది గోదారి... నీ చేను, నీ చెలక ఎడారి" అన్నట్లుగానే నేడు తెలంగాణలో కుట్రలు జరుగుతున్నాయి.

కేవలం కేసీఆర్ ఆనవాళ్లయిన కాళేశ్వరం, పాలమూరు-రంగారెడ్డి ప్రాజెక్టులపై కాంగ్రెస్ పాలకుల కోపం వల్ల దాదాపు వెయ్యి టీఎంసీల నీళ్లను కిందికి వదిలేశారు.

కరువు వస్తేనే కాళేశ్వరం విలువ తెలుస్తుందని ఆనాడు కేసీఆర్ గారు చెప్పారు. మేం కూడా నీళ్లు ఎత్తమని ఈ ప్రభుత్వానికి ఎంత చెప్పినా వినలేదు.

ఇది కాలం తెచ్చిన కరువు కానే కాదు.. కచ్చితంగా కాంగ్రెస్ తెచ్చిన కరువు.

- బీఆర్ఎస్ వర్కింగ్ ప్రెసిడెంట్ @KTRBRS

— BRS Party (@BRSparty) November 3, 2026

LIVE: తెలంగాణ వికాస సమితి ఆధ్వర్యంలో ప్రముఖ కవి, గీత రచయిత, గోదావరి గొంతుక "మల్లావఝుల సదాశివుడు" స్మారక పురస్కార ప్రదానోత్సవం.

📍మోక్షగుండం విశ్వేశ్వరయ్య భవన్, ఖైరతాబాద్

@KTRBRS

https://t.co/bCSfwiXysL

— BRS Party (@BRSparty) November 3, 2026