Janhvi Kapoor | సౌత్‌లో జాన్వీ స్పీడ్‌కు బ్రేక్.. ఇక పాత్రే ముఖ్యం!

Janhvi Kapoor | బాలీవుడ్ భామ జాన్వీ కపూర్‌ సౌత్ సినిమాల విషయంలో ఇప్పుడు ఆచితూచి అడుగులు వేస్తున్నట్లు తెలుస్తోంది. వరుసగా భారీ చిత్రాల్లో అవకాశాలు వస్తున్నా.. వచ్చిన ప్రతి ఆఫర్‌కు ఓకే చెప్పకుండా కథ, పాత్రకు ప్రాధాన్యం ఇస్తున్నట్లు సినీ వర్గాల్లో చర్చ జరుగుతోంది. ముఖ్యంగా స్టార్ హీరోల సరసన కనిపించడం ఒక్కటే లక్ష్యంగా కాకుండా.. తెరపై తన పాత్రకు తగినంత ప్రాధాన్యం, నటనకు ఆస్కారం ఉంటేనే కొత్త ప్రాజెక్టులకు గ్రీన్ సిగ్నల్ ఇవ్వాలని ఆమె నిర్ణయించుకున్నట్లు సమాచారం.  ప్రస్తుతం అల్లు అర్జున్‌ కథానాయకుడిగా తెరకెక్కుతున్న పాన్‌ ఇండియా చిత్రం ‘రాకా’లో జాన్వీ కపూర్‌ నటిస్తున్నారనే ప్రచారం గట్టిగానే సాగుతోంది. ఈ సినిమాలో ఆమె కథానాయికగా కనిపించనున్నారనే వార్తలు కొంతకాలంగా చక్కర్లు కొడుతున్నాయి.

అయితే, దీనిపై చిత్రబృందం అధికారికంగా ప్రకటించలేదు. దీంతో ఈ వార్తలకు తెరపడాలంటే మేకర్స్‌ నుంచి స్పష్టత ఇవ్వాల్సిందే. ప్రస్తుతానికి ‘రాకా’ మినహా మరో దక్షిణాది చిత్రానికి జాన్వీ సంతకం చేసినట్లు సమాచారం లేదు. అయితే, జాన్వీ ఇలా సెలెక్టివ్‌గా మారడానికి ‘పెద్ది’ అనుభవం కూడా ఓ కారణమనే టాక్‌ వినిపిస్తోంది. సినిమాలో తన పాత్రను తీర్చిదిద్దిన విధానం పట్ల ఆమె అంతగా సంతృప్తి చెందలేదని అప్పట్లో వార్తలు వచ్చాయి. కథలో తన క్యారెక్టర్‌కు మరింత ప్రాధాన్యం ఉంటుందని భావించినా.. తెరపై ఆ స్థాయిలో స్కోప్ కనిపించలేదనే అభిప్రాయం ఆమెకు ఉన్నట్లు సినీ వర్గాలు చెబుతున్నాయి. సినిమా విడుదల తర్వాత కూడా మీడియా ముందుకు జాన్వీ పెద్దగా రాకపోవడం ఈ ప్రచారానికి మరింత బలం చేకూర్చింది.

నిజానికి జాన్వీకి టాలీవుడ్ కొత్తేమీ కాదు. ‘దేవర’, ‘పెద్ది’ చిత్రాలతో ఇప్పటికే తెలుగు ప్రేక్షకులకు చేరువయ్యారు. ముఖ్యంగా స్టార్ హీరోల సినిమాల్లో అవకాశం దక్కించుకోవడం ద్వారా సౌత్‌లోనూ తన మార్కెట్‌ను పెంచుకునే దిశగా అడుగులు వేశారు. అయితే ఇకపై మాత్రం కేవలం క్రేజీ కాంబినేషన్‌ అనే కారణంతో సినిమాలను ఎంచుకోకూడదని నిర్ణయించుకున్నట్లు సమాచారం. తన క్యారెక్టర్‌ కథలో ఎంత కీలకం? సన్నివేశాల్లో నటనకు ఎంత అవకాశం ఉంది? ప్రేక్షకులపై ఆ పాత్ర ఎలాంటి ముద్ర వేయగలదు? అనే అంశాలనే ప్రధానంగా పరిగణనలోకి తీసుకుంటున్నారట. గ్లామర్‌ పరంగా ఇప్పటికే జాన్వీకి మంచి గుర్తింపు ఉంది. కానీ, నటిగా మరింత బలమైన ముద్ర వేయాలంటే వైవిధ్యమైన పాత్రలు అవసరమని భావిస్తున్నట్లు తెలుస్తోంది. అందుకే భారీ బడ్జెట్ సినిమాల్లో కేవలం పాటలు, గ్లామర్ సన్నివేశాలకు పరిమితం అయ్యే పాత్రల కంటే.. కథలో భాగమయ్యే క్యారెక్టర్ల వైపు మొగ్గుచూపుతున్నారట. భావోద్వేగాలు పలికించే సన్నివేశాలు, నటనా ప్రతిభను ప్రదర్శించడానికి అవకాశం ఉన్న పాత్రలు దొరికితే భాషతో సంబంధం లేకుండా చేయడానికి సిద్ధంగా ఉన్నట్లు సమాచారం.

మరోవైపు బాలీవుడ్‌లోనూ జాన్వీ తన లైనప్‌పై ప్రత్యేక దృష్టి పెట్టారు. ప్రస్తుతం హిందీలో అంగీకరించిన ప్రాజెక్టులను పూర్తి చేయడంతో పాటు.. కొత్త కథలను కూడా వింటున్నట్లు తెలుస్తోంది. అక్కడ కూడా ఒకే తరహా పాత్రలకు పరిమితం కాకుండా విభిన్నమైన క్యారెక్టర్లను ఎంచుకోవాలనే ఆలోచనలో ఉన్నారట. సౌత్ నుంచి వస్తున్న అవకాశాలను కూడా పరిశీలిస్తున్నప్పటికీ.. తొందరపడి నిర్ణయం తీసుకోకుండా పూర్తి కథ విన్న తర్వాతే ముందుకు వెళ్లాలని భావిస్తున్నట్లు సమాచారం. ఈ క్రమంలో ‘రాకా’లో జాన్వీ నటిస్తున్నారనే వార్త ఆసక్తిని రేకెత్తిస్తోంది. అల్లు అర్జున్‌ వంటి పాన్‌ ఇండియా స్టార్‌ సరసన ఆమె కనిపిస్తే.. ఈ కాంబినేషన్‌పై ప్రేక్షకుల్లోనూ అంచనాలు పెరగడం ఖాయం. అయితే, మేకర్స్‌ అధికారికంగా ప్రకటించే వరకు మాత్రం జాన్వీ కాస్టింగ్‌పై కొనసాగుతున్నది ప్రచారమే. మొత్తానికి సౌత్‌లో అవకాశాల విషయంలో జాన్వీ ఇప్పుడు స్పీడ్‌ కంటే సెలక్షన్‌కే ప్రాధాన్యం ఇస్తున్నట్లు కనిపిస్తోంది. సంఖ్య పెంచుకోవడం కంటే.. గుర్తుండిపోయే పాత్రలతో తన స్థానాన్ని బలోపేతం చేసుకోవాలన్నదే జాన్వీ తాజా వ్యూహంగా భావిస్తున్నారు.