Vijay | ర‌జ‌నీకాంత్‌, క‌మ‌ల్ సాధించ‌లేనిది.. విజ‌య్‌కి ఎలా సాధ్య‌మైంది..?

Vijay | తమిళనాడు రాజకీయాల్లో సినీతార‌ల పొలిటిక‌ల్ ఎంట్రీ కొత్తేం కాదు. ఎంజీఆర్, జయలలిత వంటి ప్రముఖులు ముఖ్యమంత్రులుగా రాష్ట్రాన్ని పాలించిన చరిత్ర ఉన్న‌ది. అయితే కమల్ హాసన్, రజనీకాంత్ వంటి దిగ్గజాలు తమ అభిమానాన్ని ఓట్లుగా మార్చుకోవడంలో విఫలమయ్యారు. ఈ నేపథ్యంలో తలపతి విజయ్ మాత్రం భిన్నంగా నిలిచి, తన పార్టీ తమిళగ వెట్రి కజగం (టీవీకే)ను రాష్ట్రంలో అతిపెద్ద పార్టీగా నిల‌బెట్టే దిశ‌గా ముందుకు సాగుతున్నాడు.

రాజ‌కీయ నాయ‌కుడిగానే..

విజయ్ విజయానికి ప్రధాన కారణంగా ప్ర‌జ‌ల‌కు ఆయ‌న ఇచ్చిన స్ప‌ష్ట‌మైన సంకేతాలే కార‌ణ‌మ‌ని విశ్లేష‌కులు పేర్కొంటున్నారు. టీవీకే పార్టీని స్థాపించిన స‌మ‌యంలో విజ‌య్ పూర్తిస్థాయిలో రాజ‌కీయ నాయ‌కుడిగానే కొన‌సాగుతాన‌ని స్ప‌ష్టం చేశారు. ఇక‌పై సినిమాలు చేయ‌బోన‌ని వెల్ల‌డించారు. మూడు దశాబ్దాల సినీ ప్రయాణాన్ని పణంగా పెట్టి రాజకీయాల్లోకి రావడం ఓటర్లు, అభిమానుల్లో విశ్వాసాన్ని పెంచింది. ఇదే సమయంలో రజనీకాంత్ విషయంలో స్పష్టత కనిపించలేదని రాజకీయ వర్గాలు చెబుతున్నాయి. దాదాపు పదేళ్ల పాటు రాజకీయ ప్రవేశంపై సంకేతాలు ఇచ్చినప్పటికీ.. చివరకు ఎన్నికల బరిలోకి దిగకుండానే వెనక్కి తగ్గారు. ఇక కమల్ హాసన్ మక్కల్ నీది మయ్యం (ఎంఎన్ఎం) పార్టీని స్థాపించారు. 2019 లోక్‌సభ, 2021 అసెంబ్లీ ఎన్నికల్లో పోటీ చేసినా ఒక్క సీటు కూడా గెలువ‌లేక‌పోయింది. ఆ పార్టీ ప్రభావం ప్రధానంగా పట్టణ ప్రాంతాలకే పరిమితమైంది. ప్రస్తుతం క‌మ‌ల్ డీఎంకే మద్దతుతో రాజ్యసభ స‌భ్యుడిగా కొన‌సాగుతున్నారు.

స్టార్స్‌తో పోలిస్తే భిన్నంగా..

ఇతర స్టార్‌లతో పోలిస్తే విజ‌యం సాధార‌ణంగా ఉండ‌డం కూడా ఆయనకు ప్లస్ అయిందని భావిస్తున్నారు. కోలీవుడ్‌లో భారీ ఎంట్రీ కాకుండా క్రమంగా ఎదుగుతూ రావ‌డంతో ప్రజలతో అనుబంధం పెరిగింది. టీవీకేను డీఎంకే, ఏఐఏడీఎంకే పార్టీల త‌ర‌హాలో కాకుండా.. భిన్నంగా తీర్చిదిద్దడం విజయ్ తీసుకున్న కీలక నిర్ణయంగా నిలిచింది. ఎన్నికలకు ముందు ఏ కూటమితో పోటీ చేయ‌మ‌ని స్పష్టం చేయడంతో సంప్ర‌దాయ పార్టీల‌కు ప్ర‌త్యామ్నాయంగా నిలిచారు. అవినీతి వ్యతిరేక అజెండాతో యువత, పట్టణ ఓటర్లను ఆకర్షించారు. ఇతర వైపు కమల్ హాసన్, రజనీకాంత్ ఇద్దరూ డీఎంకే, ఏఐఏడీఎంకేలను బహిరంగంగా తీవ్రంగా విమ‌ర్శించ‌డంలో ఆచితూచి వ్య‌వ‌హ‌రించారు. దీంతో ప్రచారానికి ప్రత్యేకత లోపించిందని విశ్లేషణ.

ముందస్తు రాజకీయ వ్యూహం..

పార్టీ స్థాపించ‌డానికి ముందే విజ‌య్ త‌న రాజ‌కీయ భావ‌జాలాన్ని ప్ర‌జ‌ల్లోకి బ‌లంగా తీసుకెళ్లారు. సినిమా ఈవెంట్లు, ఆడియో ఫంక్షన్ల ద్వారా సామాజిక అంశాలపై మాట్లాడటం ప్రారంభించారు. 2019లో పౌరసత్వ సవరణ చట్టంపై విమర్శలు చేయడం ఆయన రాజకీయ సంకేతంగా భావించారు. రాజకీయ విశ్లేషకుల ప్రకారం.. రాష్ట్రవ్యాప్తంగా ఉన్న వేలాది అభిమాన సంఘాలు దాదాపు పదేళ్ల పాటు సామాజిక సేవా కార్యక్రమాలు నిర్వహిస్తూ క్షేత్ర‌స్థాయిలో నెట్‌వ‌ర్క్‌ను బ‌లోపేతం చేశాయి. ఇది ఈ ఎన్నిక‌ల్లో కీల‌క‌పాత్ర పోషించింది.

యువత మద్దతు కీలకం

విజయ్ వయసు సైతం ఆయనకు అనుకూలంగా మారింది. 50 దాటిన యువ నేత‌గా చూస్తున్నారు. తమిళనాడులో 18 నుంచి 39 ఏళ్ల మధ్య వ‌య‌స్కులు ఉన్న ఓటర్లు ఎక్కువ‌గా ఉండ‌డం టీవీకేకు క‌లిసి వ‌చ్చింది. సోషల్ మీడియా వేదికగా ఆయన అభిమానులు చురుగ్గా వ్య‌వ‌హ‌రిస్తూ ప్ర‌చారం చేయ‌డం భారీ ప్ర‌భావం చూపించింది. విజయ్ రాజకీయ ప్రస్థానం కేవ‌లం యాదృచ్ఛికంగా జ‌రిగింద‌ని కాద‌ని.. ముందస్తు ప్రణాళికతో సాగిన‌ట్లుగా దీన్ని ప‌రిశీలిస్తే స్ప‌ష్ట‌మ‌వుతోంది. సంప్రదాయ పార్టీలపై ప్రజల్లో ఉన్న అసంతృప్తి ఒక కారణం అయినప్పటికీ, విజయ్ వ్యూహం, స్పష్టత, క్షేత్ర‌స్థాయిలో బ‌ల‌మైన నెట్‌వర్క్ ఈ విజయానికి ప్ర‌ధాన కార‌ణంగా నిలిచాయి. ఇక త‌మిళ‌నాడు రాజ‌కీయాల్లో స‌రికొత్త ట్రెండ్‌కు ఇది నాంది కావొచ్చ‌ని విశ్లేష‌కులు అభిప్రాయం వ్య‌క్తం చేస్తున్నారు.