Tollywood | శేఖ‌ర్ మాస్ట‌ర్ వ‌ర్సెస్ జానీ మాస్ట‌ర్ – డ్యాన్స్ మాస్ట‌ర్ అసోసియేష‌న్‌లో గొడ‌వ‌లు

Tollywood |టాలీవుడ్ డ్యాన్స్ మాస్ట‌ర్ అసోసియేష‌న్‌లో మ‌రోసారి వివాదం రాజుకుంది. అసోసియేష‌న్ బై ఎల‌క్ష‌న్స్ విష‌యంలో శేఖ‌ర్ మాస్ట‌ర్, జానీ మాస్ట‌ర్ గ్రూప్‌లు ఒక‌రిపై మ‌రొక‌రు ప‌ర‌స్ప‌ర విమ‌ర్శ‌లు, ఆరోప‌ణ‌లు చేసుకున్న‌ట్లు స‌మాచారం. హైద‌రాబాద్‌లో అసోసియేష‌న్ కార్యాల‌యం వ‌ద్ద ఆదివారం ఉద్రిక్త‌త నెల‌కొంది. గొడ‌వ‌లు జ‌రిగే అవ‌కాశం ఉండ‌టంతో పోలీసులు రంగ‌ప్ర‌వేశం చేసి ఇరు వ‌ర్గాల‌ను శాంతింప‌జేసిన‌ట్లు స‌మాచారం.

అసంతృప్తి...

డ్యాన్స్ మాస్ట‌ర్ అసోసియేష‌న్‌లో అంత‌ర్గ‌త నిర్ణ‌యాలకు సంబంధించి ఓ వ‌ర్గం ఆధిప‌త్య ధోర‌ణి తీరుపై ప్ర‌త్య‌ర్థి వ‌ర్గం వారు చాలా కాలంగా అసంతృప్తిగా ఉన్న‌ట్లు స‌మాచారం. నిధుల కేటాయింపు, స‌భ్యుల సంక్షేమం విష‌యంలో అభిప్రాయభేదాలు నెలకొన్నట్లు తెలిసింది. అసోసియేష‌న్ వ్య‌వ‌హారాల విష‌యంలో జానీ మాస్ట‌ర్ భార్య, ప్ర‌స్తుతం అధ్య‌క్షురాలు సుమ‌ల‌త ఏక‌ప‌క్షంగా వ్య‌వ‌హ‌రిస్తున్నార‌ని ఆరోపిస్తూ ప‌ది మంది స‌భ్యులు రాజీనామా చేశారు. ఫెడ‌రేష‌న్ అనుమ‌తి లేకుండా సుమల‌త బై ఎల‌క్ష‌న్స్ నిర్వ‌హించ‌డానికి సిద్ధం కావ‌డంతో వివాదం తీవ్ర‌మైంది. ఆదివారం హైద‌రాబాద్‌లో అసోసియేష‌న్ కార్యాల‌యం వ‌ద్ద జానీ మాస్ట‌ర్‌, శేఖ‌ర్ మాస్ట‌ర్ టీమ్ మెంబ‌ర్స్ ఒక‌రిపై మ‌రొక‌రు తీవ్ర‌స్థాయిలో ఆరోప‌ణ‌లు చేసుకున్నారు. రెండు వ‌ర్గాల వాదోప‌వాద‌న‌లు గొడ‌వ‌ల వ‌ర‌కు చేరుకోవ‌డంతో పోలీసులు ఇరు వ‌ర్గాల వారికి స‌ర్ధిచెప్పిన‌ట్లు స‌మాచారం.

ఎన్నిక‌ల్లో...

గ‌త ఏడాది జ‌రిగిన డ్యాన్స్ మాస్ట‌ర్ అసోసియేష‌న్ ఎన్నిక‌ల్లో జానీ మాస్ట‌ర్ భార్య సుమ‌ల‌త అలియాస్ అయేషా ఘ‌న విజ‌యం సాధించింది. ఈ ఎన్నిక‌ల్లో సుమ‌త‌ల‌కు ప్ర‌త్య‌ర్థిగా జోసెఫ్ ప్ర‌కాష్ బ‌రిలో నిలిచారు. అత‌డికి శేఖ‌ర్ మాస్ట‌ర్‌, ర‌ఘు మాస్ట‌ర్‌తో పాటు మ‌రికొంద‌రు స‌పోర్ట్ చేశారు. ఈ ఎన్నిక‌ల నుంచే శేఖ‌ర్‌, జానీ మాస్ట‌ర్ మ‌ధ్య విభేదాలు మొదలైనట్లు స‌మాచారం.