Actress Divyanka | సినీ ఇండస్ట్రీలో విషాదం.. 30 ఏళ్ల వయసులో గుండెపోటుతో యువనటి మృతి..!

Actress Divyanka | సినిమా ఇండస్ట్రీలో విషాదం అలుముకుంది. యువ హర్యాన్వీ నటి దివ్యాంగ సిరోహి (30) గుండెపోటుతో కన్నుమూసింది. మంగళవారం రాత్రి ఉత్తరప్రదేశ్‌లోని తన నివాసంలో ఉన్న సమయంలో ఆమె అకస్మాత్తుగా కుప్పకూలినట్లు సమాచారం. వెంటనే కుటుంబ సభ్యులు సమీప ఆసుపత్రికి తీసుకెళ్లగా, అక్కడ వైద్యులు ఆమె మృతి చెందినట్లు ప్రకటించారు. దివ్యాంక సిరోహి మరణంపై కుటుంబ సభ్యుల నుంచి ఇప్పటివరకు అధికారిక ప్రకటన వెలువడలేదు. ఈ వార్త తెలిసిన కుటుంబ సభ్యులు, సన్నిహితులు షాక్‌కు గురయ్యారు. ఉత్తరప్రదేశ్‌లోని బులంద్‌షహర్‌కు చెందిన దివ్యాంక ప్రస్తుతం తల్లిదండ్రులు, నానమ్మతో కలిసి ఘజియాబాద్‌లో నివసిస్తున్నారు. ఆమె చౌదరి చరణ్ సింగ్ యూనివర్సిటీలో బీసీఏ పూర్తిచేసి, అనంతరం సిక్కింలో ఎంబీఏ పూర్తి చేసింది. ఆమెకు సోదరుడు హిమాన్షు, అక్కలు దీపాంశు, జస్మీత్ ఉన్నారు.

సోషల్ మీడియా ద్వారా గుర్తింపు పొందిన దివ్యాంక, ఇండస్ట్రీలో తనకంటూ ప్రత్యేక గుర్తింపు పొందింది. గాయకుడు మసూం శర్మతో కలిసి పలు పాటల్లో నటించారు. ఇన్‌స్టాగ్రామ్‌లో 1.3 మిలియన్లకుపైగా ఫాలోవర్లు ఉన్నారు. టిక్‌టాక్‌లో వీడియోలతో సోషల్‌ మీడియాలో వైరల్‌గా మారింది. చిన్ననాటి నుంచే యాక్టింగ్‌, ఆసక్తి ఉన్నట్లు ఒక ఇంటర్వ్యూలో తెలిపింది. ఆమె చివరి ఇన్‌స్టాగ్రామ్ పోస్ట్ మార్చి 19న చేసింది. అందులో బ్లూ-వైట్ ఫ్లోరల్ డ్రెస్‌లో కనిపిస్తూ బీ ప్రాక్, అఫ్సానా ఖాన్ సాంగ్‌ ‘బర్సానా మిలా హై’కు డ్యాన్‌ చేసిన వీడియోను షేర్‌ చేసింది. ప్రస్తుతం సినిమాల్లోనూ అవకాశాలు దక్కించుకుంటున్న తరుణంలో గుండెపోటుతో మృతి చెందింది.