Nayanthara | నాకు న‌య‌న‌తార కావాలి..! అన్నాడీఎంకే ఎంపీ వివాదాస్ప‌ద వ్యాఖ్య‌లు..!

Nayanthara | త‌మిళ‌నాడుకు చెందిన ఏఐఏడీఎంకే పార్టీ ఎంపీ చేసిన వ్యాఖ్య‌ల‌పై స‌ర్వ‌త్రా విమ‌ర్శ‌లు వెల్లువెత్తుతున్నాయి. డీఎంకే ప్ర‌భుత్వ హ‌యాంలో మహిళలపై జ‌రుగుతున్న నేరాలు, క్షీణిస్తున్న శాంతిభద్రతలకు వ్యతిరేకంగా ఏఐఏడీఎంకే రాష్ట్రవ్యాప్తంగా నిర‌స‌న‌లు చేప‌ట్టింది. షణ్ముగం తన సొంత నియోజకవర్గమైన విల్లుపురం జిల్లాలో నిర్వ‌హించిన కార్య‌క్ర‌మంలో న‌టి న‌య‌న‌తార‌ను ప్ర‌స్తావిస్తూ చేసిన వ్యాఖ్య‌లు తీవ్ర వివాదానికి దారి తీశాయి. సీఎం స్టాలిన్‌పై విమ‌ర్శ‌లు చేయ‌బోయి ఆయ‌న చేసిన వ్యాఖ్య‌ల‌పై ప‌లువురు ఆగ్ర‌హం వ్య‌క్తం చేస్తున్నారు. ఇటీవ‌ల డీఎంకే పార్టీ చీఫ్‌, సీఎం స్టాలిన్ మాట్లాడుతూ ప్ర‌జ‌లు త‌మ కోరిక‌ల‌ను పంచుకోవాల‌ని.. ప్ర‌భుత్వం వాటిని నెర‌వేర్చేందుకు కృషి చేస్తుంద‌ని తెలిపారు.

నిర‌స‌న కార్య‌క్ర‌మంలో అన్నాడీఎంకే ఎంపీ సీవీ ష‌ణ్ముగం మాట్లాడుతూ అబ్దుల్ క‌లాం గారు క‌ల‌లు క‌న‌మ‌న్నార‌ని, స్టాలిన్ త‌మ క‌ల‌ల‌ను చెప్పాలంటున్నార‌ని, తాను న‌య‌న‌తార కావాలంటే.. స్టాలిన్ త‌న కోరిక‌ను తీరుస్తారా? అంటూ ప్ర‌శ్నించారు. ఎవ‌రైనా వ‌చ్చి న‌య‌న‌తార‌తో పెళ్లి జ‌రిపించాలని అడిగితే చేస్తారా? అంటూ ఆయ‌న వ్యాఖ్యానించారు. అయితే, మ‌హిళ‌ల భ‌ద్ర‌త‌, గౌర‌వానికి కోసం పార్టీ నిర్వ‌హించిన కార్య‌క్ర‌మంలో లైంగిక వేధింపుల త‌ర‌హాలో అవ‌మాన‌క‌ర వ్యాఖ్య‌లు చేయ‌డంపై స‌ర్వ‌త్రా విమ‌ర్శ‌లు వెల్లువెత్తాయి. ఆయ‌న మాట్లాడుతున్న స‌మ‌యంలో పక్కనున్న ఇత‌ర నేత‌లు నవ్వుతూ స్పందించడం మరింత ఆగ్రహానికి కారణమైంది. ఇందుకు సంబంధించిన వీడియో నెట్టింట వైర‌ల్‌గా మారింది. ప‌లువురు ఎంపీ వ్యాఖ్య‌ల‌పై మండిప‌డ్డారు.

మ‌హిళ‌ల ర‌క్ష‌ణ కోసం పోరాటాలు చేస్తామ‌ని మాట్లాడుతార‌ని.. కానీ వేదిక‌పై ఓ మ‌హిళ గురించి అస‌భ్యంగా మాట్లాడ‌డం వారి స్వ‌భావాన్ని చూపిస్తోందంటూ గిరిధ‌ర్ అనే యూజ‌ర్ వ్యాఖ్యానించాడు. వ‌నిత అనే నెటిజ‌న్ స్పందిస్తూ పార్టీ నేత‌లు జ‌య‌ల‌లిత ఫొటోల‌ను జేబులో పెట్టుకుంటార‌ని.. కానీ మాట్లాడేవ‌ని అర్థం లేని మాట‌లేన‌ని విమ‌ర్శించారు. ఈ వ్యాఖ్య‌ల‌పై ప‌లు రాజ‌కీయ పార్టీలు సైతం అభ్యంత‌రం వ్య‌క్తం చేశాయి. ఎంపీపై కేసు న‌మోదు చేయాల‌ని, పార్టీ సైతం క్ర‌మ‌శిక్ష‌ణా చ‌ర్య‌లు తీసుకోవాల‌ని ప‌లువురు డిమాండ్ చేశారు. ఏఐఏడీఎంకే ఇప్పటివరకు అధికారికంగా స్పందించ‌లేదు. అయితే, పేరు చెప్పడానికి ఇష్టపడని ఆ పార్టీ అధికార ప్రతినిధి మాట్లాడుతూ ఇలాంటి వ్యాఖ్యలను సమర్థించడం అధికార ప్రతినిధి ప‌ని కాద‌ని, ఆ వ్యాఖ్యలతో పార్టీకి సంబంధం లేద‌న్నారు.

https://x.com/i/status/2033856812634849550