Navaratri Brahmotsavam | బ్రహ్మోత్సవాల వేళ.. సప్తగిరుల ప్రత్యేకతలు తెలిస్తే ఆశ్చర్యపోవాల్సిందే!

• ఏడుకొండలపై కొలువైన కలియుగ దైవం..
• ప్రతి కొండకూ ఓ ప్రత్యేకత
• శేషుడి నుంచి ఆంజనేయుడి వరకు.. ఆధ్యాత్మిక వైభవానికి ప్రతీకలు
• తలనీలాల సమర్పణ వెనుక నీలాదేవి త్యాగం..
• గరుడసేవలో దాగిన విశిష్టత

Navaratri Brahmotsavam | బ్రహ్మాండ నాయకుడు వేంకటేశ్వరస్వామి కొలువైన తిరుమల క్షేత్రం భక్తి, పురాణ వైభవాలకు నిలయం. ఏటా జరిగే బ్రహ్మోత్సవాల సమయంలో సప్తగిరులు గోవింద నామస్మరణతో మార్మోగుతాయి. ఇక్క‌డి కొండకొండకు ఓ చరిత్ర.. గిరిగిరికీ ఓ పురాణగాథ.. ఇలా సప్తగిరుల వెనుక ఎన్నో ఆధ్యాత్మిక విశేషాలు దాగి ఉన్నాయి. స్వామివారి దివ్యధామానికి చేరుకునే భక్తులకు ఈ కొండలు ప్రకృతి సౌందర్యాన్ని మాత్రమే కాదు.. సనాతన సంప్రదాయాల గొప్పతనాన్ని కూడా చాటిచెబుతాయి. ఇంతకీ ఆ ఏడు కొండల పేర్ల వెనుక ఉన్న విశేషాలేంటో తెలుసుకుందాం రండి..!

శేషుడి పేరుతో శేషాద్రి

శ్రీమహావిష్ణువు ఆదిశేషుడిపై పవళిస్తాడన్నది వైష్ణవ సంప్రదాయంలో విశిష్టమైన భావన. ఆ ఆదిశేషుడి దివ్య స్వరూపంతో తిరుమల పర్వతాలకు అనుబంధం ఉందని పురాణాలు పేర్కొంటున్నాయి. దీంతో ఈ పర్వతశ్రేణికి శేషాచలం అనే పేరు ప్రసిద్ధి చెందింది. శేషుడి పేరుతో వెలసిన శేషాద్రి.. స్వామివారికి, ఆయన నిత్యసేవకుడైన ఆదిశేషుడికి మధ్య ఉన్న అవినాభావ సంబంధాన్ని గుర్తుచేస్తుంది.

గరుడుడి పేరిట గరుడాద్రి

విష్ణుమూర్తి వాహనమైన గరుత్మంతుడికి వైష్ణవ సంప్రదాయంలో ప్రత్యేక స్థానం ఉంది. స్వామివారిని తన భుజాలపై మోసే గరుడుడు భక్తి, సేవానిరతికి ప్రతీకగా నిలుస్తాడు. పురాణ కథనం ప్రకారం.. శ్రీహరి ఆదేశంతో గరుడుడు ఈ పర్వతాన్ని ఇక్కడకు తీసుకొచ్చినట్లు చెబుతారు. బ్రహ్మోత్సవాల్లో నిర్వహించే గరుడసేవకు ఉన్న ప్రాధాన్యం కూడా స్వామివారితో గరుత్మంతుడికి ఉన్న విడదీయలేని అనుబంధాన్ని చాటుతుంది. ఈ కారణంగానే ఈ కొండ గరుడాద్రిగా ప్రసిద్ధి పొందింది.

స్వామివారి నిలయమే వేంకటాద్రి

సప్తగిరుల్లో అత్యంత ప్రాధాన్యం సంతరించుకున్నది వేంకటాద్రి. ఎందుకంటే.. ఈ కొండపైనే శ్రీవారి ప్రధాన ఆలయం కొలువుదీరింది. స్వామి పుష్కరిణికి దక్షిణ దిశలో ఉన్న ఈ దివ్యక్షేత్రం నిత్యం లక్షలాది భక్తుల ఆరాధనకు కేంద్రంగా నిలుస్తోంది. వేంకటాద్రిపై వెలసిన శ్రీనివాసుడు వేంకటేశ్వరుడిగా, ఏడుకొండలవాడిగా భక్తుల హృదయాల్లో చెరగని స్థానం సంపాదించుకున్నాడు.

భక్తుడి తపస్సుతో నారాయణాద్రి

తిరుమల క్షేత్రానికి నారాయణాద్రి పేరు రావడం వెనుక ఓ భక్తుడి తపస్సు ఉందని పురాణాలు పేర్కొంటున్నాయి. నారాయణుడు అనే భక్తుడు స్వామివారి అనుగ్రహం కోసం పుష్కరిణి సమీపంలో తపస్సు ఆచరించాడని ప్రతీతి. అతడి భక్తికి మెచ్చిన శ్రీనివాసుడు అనుగ్రహించడంతో ఆ ప్రాంతం నారాయణాద్రిగా పేరొందినట్లు కథనం. భగవంతుడిని చేరుకునేందుకు భక్తి, నిష్ఠలే మార్గాలని ఈ గాథ చాటుతుంది.

వృషభాసురుడి కథతో వృషభాద్రి

వృషభాసురుడు అనే రాక్షసుడు తిరుమల ప్రాంతంలో తపస్సు చేసినట్లు పురాణాలు పేర్కొంటాయి. అనంతరం శివుడితో యుద్ధానికి దిగిన అతడు ఓటమి పాలయ్యాడని, చివరకు శ్రీహరి అనుగ్రహం పొందాడని కథనం. అతడి పేరుతో ఈ పర్వతానికి వృషభాద్రి అనే పేరు వచ్చినట్లు స్థలపురాణం వివరిస్తుంది. సప్తగిరుల ప్రతి పేరులోనూ ఒక పురాణ నేపథ్యం ఉందనేందుకు ఈ గాథ మరో ఉదాహరణ.

తలనీలాల సమర్పణకు మూలం నీలాద్రి

తిరుమలలో తలనీలాలు సమర్పించడం వెనుక నీలాదేవికి సంబంధించిన ఆసక్తికరమైన పురాణగాథ ప్రచారంలో ఉంది. నీలాదేవి శ్రీకృష్ణుడి అష్టమహిషుల్లో ఒకరైన నీలాంబరితో అనుబంధం ఉంద‌ని చెబుతుంటారు. ఒకసారి శ్రీనివాసుడి తలపై గాయం కావడంతో కొంత భాగంలో వెంట్రుకలు తొలగిపోతాయి. దీన్ని గమనించిన నీలాదేవి తన కేశాలను సమర్పించి స్వామివారి రూపానికి లోపం లేకుండా చేసింది. ఆమె భక్తికి సంతోషించిన స్వామివారు.. తన దర్శనానికి వచ్చే భక్తులు తలనీలాలు సమర్పించినప్పుడు ఆ పుణ్యఫలం నీలాదేవికి చెందుతుందని వరమిచ్చినట్లు ప్రతీతి. నేటికీ తిరుమలలో కొనసాగుతున్న తలనీలాల సమర్పణ సంప్రదాయానికి ఈ గాథను భక్తులు అనుసంధానిస్తారు. త్యాగం, అంకితభావాలకు నీలాద్రి ఓ ప్రతీకగా నిలుస్తోంది.

హనుమ జన్మస్థలంగా అంజనాద్రి

రామభక్తుడు ఆంజనేయస్వామి జన్మస్థలానికి సంబంధించిన విశ్వాసాల్లో అంజనాద్రికి ప్రత్యేక స్థానం ఉంది. అంజనాదేవి ఈ పర్వతంపై తపస్సు చేయగా హనుమంతుడు జన్మించాడని పురాణగాథలు చెబుతాయి. బాల్యంలో హనుమంతుడు ఉదయిస్తున్న సూర్యుడిని పండుగా భావించి అందుకోవడానికి ఆకాశంలోకి ఎగిరిన ఘట్టం కూడా ఆయన బాల్యలీలల్లో ప్రముఖమైనది. అంజనాదేవి పేరుతో ఈ కొండ అంజనాద్రిగా ప్రసిద్ధి చెందిందని భక్తులు విశ్వసిస్తారు.

సప్తగిరులే.. శ్రీవారి దివ్య వైభవానికి ప్రతీకలు

శేషాద్రి, గరుడాద్రి, వేంకటాద్రి, నారాయణాద్రి, వృషభాద్రి, నీలాద్రి, అంజనాద్రి.. ఈ ఏడు పర్వతాలు తిరుమల క్షేత్ర ఆధ్యాత్మిక ప్రాశస్త్యాన్ని చాటుతున్నాయి. ప్రతి కొండ వెనుక ఓ పురాణగాథ ఉండగా.. ప్రతి గాథలోనూ భక్తి, తపస్సు, సేవ, త్యాగం వంటి విలువలు అంతర్లీనంగా కనిపిస్తాయి. బ్రహ్మోత్సవాల వేళ సప్తగిరులపై గోవింద నామం మార్మోగుతున్నప్పుడు.. భక్తులు చేసే ‘ఏడుకొండలవాడా వేంకటరమణా.. గోవిందా గోవిందా’ నామస్మరణ కేవలం పిలుపు మాత్రమే కాదు. తరతరాలుగా వస్తున్న విశ్వాసానికి, తిరుమల క్షేత్ర మహాత్మ్యానికి ప్రతిరూపం. అందుకే సప్తగిరులు భక్తుల దృష్టిలో కొండలు మాత్రమే కాదు.. శ్రీవారి దివ్య సన్నిధికి దారి చూపే ఆధ్యాత్మిక చిహ్నాలు.