TTD | బ్ర‌హ్మోత్స‌వాల్లో శ్రీ‌వారి సేవ చేయాల‌నుకుంటున్నారా..? అయితే మీకో గుడ్‌న్యూస్‌..!

TTD | శ్రీవారి బ్రహ్మోత్సవాల సందర్భంగా అక్టోబర్‌ నెల మాసానికి సంబంధించిన సేవా స్లాట్లను టీటీడీ రెండు విడతల్లో ఆన్‌లైన్‌లో విడుదల చేయనుంది. ఈ నెల 26న మధ్యాహ్నం 3 గంటలకు బ్రహ్మోత్సవాల స్లాట్లు అందుబాటులోకి రానున్నాయి. ఒక్కో విడతలో పది రోజుల చొప్పున సేవా స్లాట్లను కేటాయించారు. అక్టోబర్‌ 11 నుంచి 20 వరకు, అక్టోబర్‌ 12 నుంచి 21 వరకు రెండు విడతల్లో బ్రహ్మోత్సవాల స్లాట్లు అందుబాటులో ఉంటాయి. శ్రీ‌వారి చేయాల‌నే ఆస‌క్తి ఉన్న 18 నుంచి 50 ఏళ్ల మధ్య వయసున్న వారే అర్హులు. అలాగే, అక్టోబర్‌ నెలకు సంబంధించిన తిరుమల, తిరుపతిలో జనరల్‌ శ్రీవారి సేవ, నవనీత సేవ, పరకామణి సేవల ఆన్‌లైన్‌ కోటాను 26న సాయంత్రం 4 గంటలకు టీటీడీ విడుదల చేయనుంది. జనరల్‌ సేవకు ఎంపికైన సేవకులు తిరుమల, తిరుపతిలో తమ సేవా బుకింగ్‌ తేదీనే రిపోర్టు చేయాల్సి ఉంటుంది. అయితే, అక్టోబర్‌ 6 నుంచి 11 వరకు ఉన్న స్లాట్‌ ఆరు రోజులకే పరిమితమ‌ని టీటీడీ తెలిపింది. పరకామణి సేవకు ఎంపికైన సేవ‌కులు తమ బుకింగ్‌ తేదీకి ఒక రోజు ముందుగానే తిరుమలలోని సేవా సదన్‌-2లో రిపోర్టు చేయాల్సి ఉంటుంద‌ని తెలిపారు. మధ్యాహ్నం 2 గంటల నుంచి సాయంత్రం 4 గంటల మధ్య రిపోర్టింగ్‌ పూర్తి చేయాలని టీటీడీ సూచించింది.