Brahmotsavam 2026 | సూర్యకిరణాల సాక్షిగా శ్రీవారి దివ్య విహారం

• గోవింద నామస్మరణతో మార్మోగిన తిరుమల..
• సూర్యప్రభ వాహనంపై మలయప్పస్వామి దర్శనం

Brahmotsavam 2026 | తిరుమల కొండలు భక్తిరసంతో పులకించాయి.. మాడ వీధులు గోవింద నామస్మరణతో ప్రతిధ్వనించాయి. శ్రీవారి సాలకట్ల బ్రహ్మోత్సవాల్లో భాగంగా ఏడో రోజు సోమవారం ఉదయం సూర్యప్రభ వాహనంపై మలయప్పస్వామివారు భక్తులకు దర్శనమిచ్చారు. ఉదయం 8 గంటలకు సూర్యకిరణాల నడుమ సాగిన వాహనసేవను తిలకించేందుకు పెద్ద సంఖ్యలో భక్తులు తరలివచ్చారు. సూర్యప్రభ వాహనంపై కొలువుదీరిన శ్రీవారు తిరుమాడ వీధుల్లో విహరిస్తుండగా భక్తుల ఆనందానికి హద్దుల్లేకుండా పోయింది. అడుగడుగునా కర్పూర హారతులు ఇస్తూ భక్తులు స్వామివారికి నీరాజనాలు పలికారు. ‘గోవిందా.. గోవిందా..’ అంటూ చేసిన నామస్మరణతో తిరుమల గిరులు మార్మోగాయి. చేతులెత్తి మొక్కుతూ, భక్తిపారవశ్యంలో మునిగిపోతూ వేలాది మంది తిరుమ‌లేశుడిని క‌నులారా ద‌ర్శించుకున్నారు.

చెక్కభజనలు.. కోలాటాలతో సందడి

సూర్యప్రభ వాహనం ముందు భక్తబృందాలు నిర్వహించిన చెక్కభజనలు, కోలాటాలు ప్రత్యేక ఆకర్షణగా నిలిచాయి. మంగళవాయిద్యాల మోత, కళాకారుల భక్తి ప్రదర్శనలతో వాహనసేవకు మరింత వైభవం చేకూరింది. శ్రీవారిని కీర్తిస్తూ కళాకారులు ప్రదర్శించిన కార్యక్రమాలు భక్తులను విశేషంగా ఆకట్టుకున్నాయి. స్వామివారి దివ్యరూపాన్ని కనులారా దర్శించిన భక్తులు ఆధ్యాత్మికానందంలో మునిగిపోయారు.

సూర్యప్రభ వాహ‌న‌సేవ‌ ప్రత్యేక విశిష్టత

బ్రహ్మోత్సవాల్లో సూర్యప్రభ వాహనసేవకు ఆధ్యాత్మికంగా విశేష ప్రాధాన్యం ఉంది. సూర్యుడు ఆరోగ్యం, శక్తి, చైతన్యానికి ప్రతీకగా భక్తులు భావిస్తారు. సకల జీవరాశులకు వెలుగును, జీవశక్తిని అందించే సూర్యభగవానుడిని సూర్యనారాయణుడిగా ఆరాధించే సంప్రదాయం అనాదిగా కొనసాగుతోంది. సూర్యమండల మధ్యలో శ్రీమన్నారాయణుడు కొలువై ఉంటాడనే ఆధ్యాత్మిక విశ్వాసానికి సూర్యప్రభ వాహనసేవ ప్రతీకగా నిలుస్తుందని భక్తులు భావిస్తారు. ఈ వాహనంపై మలయప్పస్వామివారిని దర్శించుకుంటే ఆయురారోగ్యాలు, సుఖసంతోషాలు, ఐశ్వర్యం, సత్సంతానం కలుగుతాయని భక్తుల విశ్వాసం.