Suicide Blast at Wedding in Pakistan | పాకిస్థాన్‌లో పెళ్లి వేడుకలో రక్తపాతం.. ఆత్మాహుతి దాడిలో ఐదుగురు మృతి, కూలిన భవనం

Suicide Blast at Wedding in Pakistan | త్రినేత్ర.న్యూస్ : పాకిస్థాన్‌లోని వాయువ్య ఖైబర్ పఖ్తున్ఖ్వా (KP) ప్రావిన్స్‌లో శుక్రవారం రాత్రి ఘోర విపత్తు సంభవించింది. ఒక శాంతి కమిటీ సభ్యుడి నివాసంలో జరుగుతున్న వివాహ వేడుకను లక్ష్యంగా చేసుకుని ఉగ్రవాదులు ఆత్మాహుతి దాడికి పాల్పడ్డారు. ఈ ఘటనలో ఐదుగురు అక్కడికక్కడే మరణించగా, మరో 10 మంది తీవ్రంగా గాయపడ్డారు.

నృత్యం చేస్తుండగా విరుచుకుపడ్డ మృత్యువు

డేరా ఇస్మాయిల్ ఖాన్ జిల్లాలోని ఖురేషీ మోర్ సమీపంలో ఉన్న శాంతి కమిటీ చీఫ్ నూర్ ఆలం మెహసూద్ నివాసంలో ఈ వేడుకలు జరుగుతున్నాయి. అతిథులంతా డ్యాన్స్‌లు చేస్తూ సందడిగా ఉన్న సమయంలో ఆత్మాహుతి బాంబర్ తనను తాను పేల్చుకున్నాడు. ఈ పేలుడు ధాటికి ఆ గది పైకప్పు ఒక్కసారిగా కూలిపోయింది. దీంతో చాలా మంది శిథిలాల కింద చిక్కుకుపోయారు.

సహాయక చర్యలు ముమ్మరం

సమాచారం అందుకున్న వెంటనే రెస్క్యూ టీమ్, ఏడు అంబులెన్సులు, ఫైర్ ఇంజిన్లతో ఘటనా స్థలానికి చేరుకున్నాయి. శిథిలాల కింద చిక్కుకున్న వారిని వెలికితీయడం సవాలుగా మారింది. గాయపడిన వారిని జిల్లా హెడ్ క్వార్టర్ ఆస్పత్రికి తరలించారు. ఈ దాడిలో శాంతి కమిటీ నాయకుడు వహీదుల్లా మెహసూద్ అలియాస్ జిగ్రీ మెహసూద్ కూడా మరణించినట్లు ప్రాథమిక సమాచారం.

ముదురుతున్న ఉగ్రవాద కోణం

ఖైబర్ పఖ్తున్ఖ్వా ముఖ్యమంత్రి సోహైల్ అఫ్రిది ఈ దాడిని తీవ్రంగా ఖండించారు. నిందితులను వదిలే ప్రసక్తే లేదని, ఈ ఘటనపై సమగ్ర నివేదిక ఇవ్వాలని పోలీసులను ఆదేశించారు. కాగా, ఈ ప్రాంతంలో శాంతి కమిటీ సభ్యులే లక్ష్యంగా దాడులు జరగడం ఇది మొదటిసారి కాదు. ఈ నెల మొదట్లో బన్నూ జిల్లాలో నలుగురు శాంతి కమిటీ సభ్యులు హత్యకు గురయ్యారు. 2025 నవంబర్‌లో కూడా ఇలాంటిదే ఒక దాడి జరిగి ఏడుగురు ప్రాణాలు కోల్పోయారు.