Varun Batchigari | అమెరికాలో ప్రియురాలిని చంపి ఇండియాకు పారిపోతుండగా.. జర్మనీలో దొరికిపోయిన ఇండియన్ స్టూడెంట్!

• అమెరికాలోని ఆరిజోనాలో జూలిస్సా రూబీ (19) అనే విద్యార్థిని దారుణ హత్య
• ఆమె బాయ్‌ఫ్రెండ్, భారతీయ విద్యార్థి వరుణ్ బచ్చిగారి (20) ఈ హత్య చేసినట్లు పోలీసుల నిర్ధారణ
• హత్య అనంతరం పోలీసుల కళ్లుగప్పి ఇండియాకు పారిపోతుండగా జర్మనీలో అడ్డగించిన పోలీసులు
• నిందితుడిపై ఫస్ట్-డిగ్రీ మర్డర్, కిడ్నాప్ కేసులు నమోదు చేసి అమెరికాకు తరలించేందుకు అధికారుల ఏర్పాట్లు

Varun Batchigari | త్రినేత్ర.న్యూస్ : అమెరికాలోని ఆరిజోనా (Arizona) రాష్ట్రంలో దారుణం జరిగింది. 19 ఏళ్ల తన గర్ల్ ఫ్రెండ్‌ను కిరాతకంగా హత్య చేసి.. ఇండియాకు పారిపోయేందుకు ప్రయత్నించిన ఓ 20 ఏళ్ల భారతీయ విద్యార్థిని అధికారులు సినిమా స్టైల్లో చేజ్ చేసి అరెస్ట్ చేశారు. టక్సన్ (Tucson) నగరంలో ఆగస్టు 6, 2026న వెలుగుచూసిన ఈ ఘటన స్థానికంగా తీవ్ర కలకలం రేపింది.

అసలేం జరిగిందంటే?

ఆరిజోనా యూనివర్సిటీ సమీపంలోని ఓ అపార్ట్‌మెంట్‌లో జూలిస్సా రూబీ సలాజర్ (Julissa Rubi Salazar) అనే 19 ఏళ్ల కాలేజీ స్టూడెంట్ అనుమానాస్పద స్థితిలో శవమై కనిపించింది. ఆమె తన తల్లిదండ్రుల ఫోన్ కాల్స్‌కు స్పందించకపోవడంతో.. వారు పోలీసులకు సమాచారం ఇచ్చారు. పోలీసులు అపార్ట్‌మెంట్‌కు వెళ్లి చూడగా.. ఆమె ఒంటిపై తీవ్రమైన గాయాలున్నట్లు గుర్తించారు. దర్యాప్తు చేపట్టిన పోలీసులు ఈ దారుణానికి పాల్పడింది ఆమె బాయ్ ఫ్రెండ్, స్టూడెంట్ వీసాపై అమెరికా వెళ్లిన భారతీయ యువకుడు వరుణ్ బచ్చిగారి (Varun Batchigari) అని నిర్ధారించారు.

మర్డర్ తర్వాత ఫోన్ డ్రామా

పోలీసుల దర్యాప్తులో విస్తుపోయే నిజాలు వెలుగులోకి వచ్చాయి. జూలిస్సాను హత్య చేసిన తర్వాత.. వరుణ్ ఆమె ఫోన్, క్రెడిట్ కార్డులను దొంగిలించాడు. ఎవరికీ అనుమానం రాకుండా.. ఆ మొబైల్ నుంచే ఆమె తల్లికి, స్నేహితులకు మెసేజ్‌లు పంపాడు. వరుణ్ ప్రవర్తన సరిగా లేకపోవడం, అతనిపై డొమెస్టిక్ వయొలెన్స్ (గృహ హింస) ఆరోపణలు ఉండటంతో జూలిస్సా అతనికి బ్రేకప్ (Breakup) చెప్పాలని నిర్ణయించుకున్నట్లు సమాచారం. ఈ క్రమంలోనే గొడవ జరిగి అతడు ఈ దారుణానికి ఒడిగట్టి ఉంటాడని పోలీసులు భావిస్తున్నారు.

పక్కా ప్లాన్.. కానీ జర్మనీలో లాక్

హత్య అనంతరం అధికారుల కళ్లుగప్పి ఇండియాకు పారిపోయేందుకు వరుణ్ పక్కా ప్లాన్ వేశాడు. వెంటనే టక్సన్ ఇంటర్నేషనల్ ఎయిర్‌పోర్ట్ నుంచి హ్యూస్టన్ వెళ్లి అక్కడి నుంచి జర్మనీకి ఫ్లైట్ (Flight) ఎక్కాడు. యూరప్ మీదుగా నేరుగా ఇండియాకు చేరుకోవాలన్నది అతని స్కెచ్. అయితే, టక్సన్ పోలీసులు.. ఎఫ్‌బీఐ (FBI), అంతర్జాతీయ భద్రతా దళాలను అప్రమత్తం చేశారు. దీంతో వరుణ్ జర్మనీలో ల్యాండ్ అవ్వగానే అక్కడి ఎయిర్‌పోర్ట్ పోలీసులు అతడిని చుట్టుముట్టి అదుపులోకి తీసుకున్నారు.

ప్రస్తుతం వరుణ్ బచ్చిగారిపై ఫస్ట్-డిగ్రీ మర్డర్ (First-degree murder), కిడ్నాప్ వంటి తీవ్రమైన కేసులు నమోదయ్యాయి. నిందితుడిని జర్మనీ నుంచి తిరిగి అమెరికాలోని ఆరిజోనాకు (Extradition) రప్పించేందుకు అధికారులు న్యాయపరమైన ఏర్పాట్లు చేస్తున్నారు.