Jamui Police Encounter | బీహార్‌ మైనర్ల వేధింపుల కేసు: పోలీసుల ఎన్‌కౌంటర్‌లో ప్రధాన నిందితుడు అరెస్ట్

Jamui Police Encounter | త్రినేత్ర.న్యూస్ :బీహార్‌లోని జముయి (Jamui) జిల్లాలో ఇద్దరు మైనర్లపై జరిగిన ఘోర అఘాయిత్యానికి సంబంధించి పోలీసులు కీలక పురోగతి సాధించారు. పదో తరగతి విద్యార్థిని, ఆమె స్నేహితుడిని వెంబడించి, దాడి చేసి వేధించిన ఏడుగురు నిందితులలో ప్రధాన నిందితుడైన నందన్ యాదవ్ (Nandan Yadav) పోలీసు ఎన్‌కౌంటర్‌లో గాయపడి అరెస్ట్ అయ్యాడు. మరొక నిందితుడు హరేరామ్ యాదవ్ కూడా ఈ ఆపరేషన్‌లో గాయపడగా, మొత్తం ఐదుగురు నిందితులు పోలీసుల అదుపులోకి వచ్చారు.

అసలు ఏం జరిగిందంటే?

సెప్టెంబర్ 19వ తేదీ సాయంత్రం సమీపంలోని మద్వా పహాడ్ హిల్ స్టేషన్ నుండి స్కూటీపై వస్తున్న ఇద్దరు మైనర్లను ఒక మూక అడ్డగించింది. వారిని బలవంతంగా కిందకు దించి, అసభ్యంగా ప్రవర్తించడమే కాకుండా వారు తప్పించుకోవడానికి ప్రయత్నిస్తే వెంబడించి దాడి చేశారు. ఈ దారుణానికి సంబంధించిన వీడియో సోషల్ మీడియాలో వైరల్ కావడంతో రాజకీయ వర్గాలతో పాటు ప్రజల నుండి తీవ్ర నిరసనలు వ్యక్తమయ్యాయి.

బాధితులు భయం కారణంగా వెంటనే పోలీసులను ఆశ్రయించకపోయినా, వైరల్ అయిన వీడియో ఆధారంగా పోలీసులు ప్రత్యేక దర్యాప్తు బృందాన్ని (SIT) ఏర్పాటు చేసి నిందితులను గుర్తించారు. మరోవైపు, మైనర్ బాధితుల గుర్తింపును బహిర్గతం చేస్తూ సోషల్ మీడియాలో వీడియోలు సర్క్యులేట్ చేసిన సుమారు 120 ప్రొఫైళ్లపై సైబర్ పోలీసులు కేసులు నమోదు చేశారు. ఈ ఘటనపై కాంగ్రెస్ అగ్రనేత రాహుల్ గాంధీ తీవ్రంగా స్పందిస్తూ దోషులను వెంటనే కఠినంగా శిక్షించాలని డిమాండ్ చేశారు.