Petrol Price Under GST | పెట్రోల్‌, డీజిల్‌పై జీఎస్టీ: లీటర్‌ ధర రూ.75 కే.. రూ.34 తగ్గింపు.. ఎలా సాధ్యమౌతుందో తెలుసా?

Petrol Price Under GST | త్రినేత్ర.న్యూస్ : దేశవ్యాప్తంగా సామాన్యులను తీవ్రంగా ఇబ్బంది పెడుతున్న ప్రధాన సమస్యల్లో ఇంధన ధరలు (Fuel prices) ఒకటి. ప్రస్తుతం పలు నగరాల్లో లీటర్ పెట్రోల్ వంద రూపాయలు దాటి మండిపోతోంది. దీంతో పెట్రోల్, డీజిల్‌ను వెంటనే జీఎస్టీ (GST) పరిధిలోకి తీసుకురావాలనే డిమాండ్ మరోసారి బలంగా వినిపిస్తోంది.

ఒకవేళ నిజంగానే ఇంధనాన్ని జీఎస్టీ కిందకు తీసుకొస్తే.. సామాన్యులకు భారం తగ్గుతుందా? అసలు లీటరుకు రూ.30 నుంచి రూ.35 వరకు ధరలు ఎలా తగ్గుతాయో ఎప్పుడైనా ఆలోచించారా? దానికి సంబంధించిన అసలు లెక్కలు, ప్రభుత్వాలు ఈ నిర్ణయం ఎందుకు తీసుకోవట్లేదో ఇప్పుడు తెలుసుకుందాం.

పన్నుల బాదుడు ఎలా ఉందంటే.. (ప్రస్తుత విధానం)

ప్రస్తుతం మనం బంకుల్లో కొనే పెట్రోల్ బేస్ ప్రైస్ (Base Price), రిఫైనింగ్ ఖర్చు లీటరుకు దాదాపు రూ.40 నుంచి రూ.55 వరకు మాత్రమే ఉంటుంది (అంతర్జాతీయ ధరలను బట్టి). కానీ మన చేతికి వచ్చేసరికి వంద దాటుతోంది. దీనికి ప్రధాన కారణం:

అసలు ధర (Base Price)

• కేంద్ర ప్రభుత్వం విధించే ఎక్సైజ్ డ్యూటీ (Excise Duty)
• రాష్ట్ర ప్రభుత్వాలు ఇష్టానుసారంగా వేసే వ్యాట్ (State VAT)
• పెట్రోల్ బంక్ నిర్వాహకులకు ఇచ్చే డీలర్ కమిషన్ (Dealer Commission)

ఈ టాక్స్ స్ట్రక్చర్ వల్ల మనం 'ట్యాక్స్‌పై ట్యాక్స్' (Tax-on-tax) కడుతున్నాం. ఏపీ, తెలంగాణ లాంటి రాష్ట్రాల్లో ప్రతి లీటర్ పెట్రోల్‌పై దాదాపు రూ.45 నుంచి రూ.50 వరకు కేవలం పన్నులు, డీలర్ కమిషన్ల రూపంలోనే వసూలవుతోంది.

జీఎస్టీ వస్తే లెక్కలు ఎలా మారుతాయి?

ఒకవేళ కేంద్ర ప్రభుత్వం ఎక్సైజ్ డ్యూటీని, రాష్ట్రాల వ్యాట్‌ను పూర్తిగా రద్దు చేసి పెట్రోల్‌ను జీఎస్టీ పరిధిలోకి తీసుకొస్తే రేట్లు అమాంతం పడిపోతాయి. జీఎస్టీలో అత్యధిక పన్ను స్లాబ్ అయిన 28% పరిధిలోకి ఇంధనాన్ని తీసుకొచ్చినా వినియోగదారులకు భారీ లాభం ఉంటుంది. అప్పుడు ట్యాక్స్ అనేది బేస్ ప్రైస్ + డీలర్ కమిషన్‌పై మాత్రమే పడుతుంది.

ఉదాహరణకు: బేస్ ప్రైస్ రూ.55, డీలర్ కమిషన్ రూ.4 అనుకుంటే.. 28% జీఎస్టీ ప్రకారం పన్ను కేవలం రూ.16 మాత్రమే అవుతుంది.

ఈ లెక్కన చూసుకుంటే.. ఫైనల్‌గా బంకుల్లో లీటర్ పెట్రోల్ ధర రూ.75 నుంచి రూ.80కే లభిస్తుంది. అంటే ప్రస్తుతం ఉన్న రేట్లతో పోల్చుకుంటే నేరుగా రూ.30 నుంచి రూ.34 వరకు సామాన్యుడి జేబులో ఆదా అవుతుంది!

డీజిల్ కూడా అంతే.. దాని అసలు ధర రూ.67 మాత్రమే. కానీ ఎక్సైజ్ డ్యూటీ రూ.7.80, వ్యాట్ రూ.13, డీలర్ మార్జిన్ రూ.3.. ఇవన్నీ కలిపి మనకు తడిసి మోపెడు అవుతోంది. డీజిల్‌పై కేవలం టాక్స్, మార్జిన్ రూపంలో రూ.24 అదనపు భారం పడుతోంది. ఈ లెక్కలు ఢిల్లీలో. ఇక మన దగ్గర అయితే ఆ బాదుడు ఇంకాస్త ఎక్కువే.

మరి ప్రభుత్వాలు ఎందుకు అంగీకరించట్లేదు?

జీఎస్టీ పరిధిలోకి తీసుకురావాలని చాంబర్ ఆఫ్ ట్రేడ్ అండ్ ఇండస్ట్రీ లాంటి సంస్థలు, ప్రజల నుంచి ఎంత డిమాండ్ ఉన్నప్పటికీ.. ప్రభుత్వాలు ఈ విషయంలో వెనకడుగు వేస్తున్నాయి. దీనికి ప్రధాన కారణాలు రెండు:

భారీ ఆదాయ నష్టం (Revenue Loss): ఇంధనంపై విధించే పన్నుల ద్వారా కేంద్ర, రాష్ట్ర ప్రభుత్వాలకు ఏటా లక్షల కోట్ల రూపాయల ఆదాయం వస్తోంది. దీన్ని 28% జీఎస్టీ పరిధిలోకి మారిస్తే ప్రభుత్వ ఖజానాకు భారీ గండి పడుతుంది.

ఆర్థిక నియంత్రణ కోల్పోవడం (Loss of Fiscal Control): ప్రస్తుతం ఉన్న వ్యాట్ విధానంలో.. రాష్ట్ర ప్రభుత్వాలు తమ బడ్జెట్ అవసరాలకు తగ్గట్టుగా ఎప్పుడైనా పన్నులు పెంచుకోవచ్చు లేదా తగ్గించుకోవచ్చు. కానీ జీఎస్టీ అమలైతే ఆ పవర్ చేజారిపోతుంది. ఏ నిర్ణయం తీసుకోవాలన్నా జీఎస్టీ కౌన్సిల్ (GST Council) లో ఏకాభిప్రాయం కుదరాలి.

ప్రస్తుత పరిస్థితి: పెట్రోలియం ఉత్పత్తులను జీఎస్టీలోకి చేర్చేందుకు చర్చలు జరిపేందుకు ఆర్థిక మంత్రిత్వ శాఖ సుముఖత వ్యక్తం చేస్తున్నప్పటికీ, రాష్ట్ర ప్రభుత్వాలు తీవ్రంగా వ్యతిరేకిస్తున్నాయి. తమ ఆదాయ నష్టాన్ని కేంద్రం భర్తీ చేస్తేనే (Compensatory revenue) దీనికి ఒప్పుకుంటామని పట్టుబడుతున్నాయి. ఈ సమస్య కొలిక్కి వచ్చే వరకు.. సామాన్యులకు ఇంధన ధరల మంట తప్పదు.