Union Budget 2026 | ఫోన్లు, ఎల‌క్ట్రానిక్స్ వ‌స్తువుల ధ‌ర‌లు త‌గ్గుతాయా..? నిర్మ‌ల‌మ్మ ఏం చెప్పారు..?

Union Budget 2026 | కేంద్ర ఆర్థిక శాఖ మంత్రి నిర్మ‌లా సీతారామ‌న్ ఆదివారం (ఫిబ్ర‌వ‌రి 1, 2026) లోక్‌స‌భ‌లో బ‌డ్జెట్ 2026ను ప్ర‌వేశ‌పెట్టిన విష‌యం విదిత‌మే. ఈ క్ర‌మంలోనే రానున్న రోజుల్లో కొన్ని వ‌స్తువుల ధ‌ర‌లు పెర‌గ‌డంతోపాటు ప‌లు వ‌స్తువుల ధ‌ర‌లు త‌గ్గ‌నున్నాయి. అయితే ఫోన్లు, టీవీలు, ఇత‌ర ఎల‌క్ట్రానిక్ వ‌స్తువ‌ల ధ‌ర‌లు త‌గ్గుతాయా..? అని చాలా మందికి సందేహాలు వ‌స్తున్నాయి. బ‌డ్జెట్‌లో ప్ర‌త్యేకంగా ఆయా వ‌స్తువుల ధ‌ర‌లు త‌గ్గుతాయా, లేదా అన్న వివ‌రాల‌ను ప్ర‌స్తావించ‌రు. కానీ ఆయా రంగాల‌కు జ‌రిగే కేటాయింపులు, అందించే ప్రోత్సాహ‌కాల‌ను బట్టి వ‌స్తువుల ధ‌రలు పెరిగేదీ, త‌గ్గేదీ తేలుస్తారు. ఈ క్ర‌మంలోనే నిర్మ‌లా సీతారామ‌న్ త‌న బ‌డ్జెట్ ప్ర‌సంగంలో లిథియం-అయాన్ బ్యాటరీ సెల్స్, మైక్రోవేవ్ ఓవెన్ భాగాల తయారీలో ఉపయోగించే ముడిసరుకులపై కస్టమ్స్ డ్యూటీల్లో మార్పులు చేశామని తెలిపారు. దీంతో ఆయా వస్తువుల ధ‌ర‌లు త‌గ్గుతాయ‌ని భావిస్తున్నారు.

త‌గ్గుద‌ల వెంట‌నే ఉండ‌దా..?

అయితే బడ్జెట్‌లో ప్రకటించిన మార్పుల‌ను మొద‌టిసారిగా గ‌మ‌నిస్తే, వినియోగదారులకు ఊరటనిచ్చేలా కనిపించినప్పటికీ, వాస్తవ పరిస్థితి అంత సులభంగా లేదని నిపుణులు చెబుతున్నారు. లోక్‌సభలో మాట్లాడిన ఆర్థిక మంత్రి, ఈ చర్యల ప్రధాన లక్ష్యం దిగుమతులపై ఆధారాన్ని తగ్గించి, దేశీయ తయారీని బలోపేతం చేయడమేనని స్పష్టం చేశారు. కానీ వాస్తవ ప‌రిస్థితులు ఇందుకు భిన్నంగా ఉండేలా అవ‌కాశం ఉంద‌ని నిపుణులు చెబుతున్నారు. లిథియం-అయాన్ బ్యాటరీల తయారీకి అవసరమైన ముఖ్యమైన క్యాపిటల్ గూడ్స్‌పై బేసిక్ కస్టమ్స్ డ్యూటీ (BCD) మినహాయింపును పొడిగించడం, కీలక ఖనిజాలపై డ్యూటీ రాయితీలు, అలాగే ఎలక్ట్రానిక్స్ కాంపోనెంట్ తయారీ పథకానికి అదనంగా రూ.40వేల‌ కోట్ల కేటాయింపుల‌ను ప్రభుత్వం ప్రకటించింది. ఈ చర్యల వల్ల ఎలక్ట్రానిక్స్ తయారీదారుల ఖర్చులు తగ్గే అవకాశం ఉందని విశ్లేషకులు అంచనా వేస్తున్నారు. దాంతో భవిష్యత్తులో కొన్ని ఉత్పత్తుల ధరలు తగ్గే అవకాశమూ ఉంది. అయితే ఈ తగ్గుదల వెంటనే జరగదని, అలాగే ప్రతి గ్యాడ్జెట్ ధర తగ్గుతుందని హామీ ఇవ్వలేమని వారు స్పష్టం చేస్తున్నారు. అందువ‌ల్ల ఫోన్లు లేదా ఇత‌ర ఎల‌క్ట్రానిక్ వ‌స్తువుల ధ‌ర‌లు త‌గ్గుతాయ‌ని ఆశించ‌లేమ‌ని వారు పేర్కొంటున్నారు.

గ‌ణ‌నీయంగా త‌గ్గ‌నున్న ఖ‌ర్చు..

లోక్ స‌భ‌లో బ‌డ్జెట్ ప్ర‌సంగంలో భాగంగా కేంద్ర మంత్రి నిర్మలా సీతారామన్ మాట్లాడుతూ.. గ్రీన్ మొబిలిటీ, ఎనర్జీ సెక్యూరిటీకి మరింత ఊతమిచ్చే ఉద్దేశంతో, లిథియం-అయాన్ సెల్స్ తయారీకి ఉపయోగించే క్యాపిటల్ గూడ్స్‌పై బేసిక్ కస్టమ్స్ డ్యూటీ మినహాయింపును బ్యాటరీ ఎనర్జీ స్టోరేజ్ సిస్టమ్స్‌కు కూడా విస్తరించాం.. అని తెలిపారు. అలాగే India Semiconductor Mission 2.0 ప్రారంభంతో కలిసి ఈ చర్యలు ఉద్యోగాలు, ఆవిష్కరణలకు తోడ్పడతాయని, దేశీయ సరఫరా చెయిన్‌ను మరింత బలోపేతం చేస్తాయని చెప్పారు. కాగా నిపుణుల అభిప్రాయం ప్రకారం.. బ్యాటరీలు, కొన్ని ఎలక్ట్రానిక్స్ భాగాలకు సంబంధించిన ముడిసరుకులపై పూర్తి స్థాయి కస్టమ్స్ మినహాయింపులు తయారీదారుల ఖర్చును గణనీయంగా తగ్గిస్తాయి. గతంలో అధిక డ్యూటీలు ఉత్పత్తి వ్యయాన్ని పెంచి, తుది ఉత్పత్తుల ధరలు పెరగడానికి కారణమయ్యాయి. ఇప్పుడు కొత్త బడ్జెట్‌తో కీలక యంత్రాలు, ఖనిజాలను తక్కువ పన్నుతో దిగుమతి చేసుకునే అవకాశం లభించనుంది.

త‌యారీ ఖర్చులు త‌గ్గినా..

అయితే తక్కువ తయారీ ఖర్చులు అంటే వెంటనే రిటైల్ మార్కెట్లో ధరలు తగ్గిపోతాయనే అర్థం కాదని విశ్లేషకులు హెచ్చరిస్తున్నారు. ధరలు తగ్గాలంటే దేశీయ తయారీదారులు, దిగుమతిదారులు తమ ధర విధానాలను ఎలా సవరించుకుంటారన్నదానిపై ఆధారపడి ఉంటుంద‌ని పరిశ్రమ వర్గాలు చెబుతున్నాయి. ఈ బడ్జెట్‌లో దీర్ఘకాలిక సామర్థ్య నిర్మాణంపై పెట్టిన దృష్టి Make in India, ISM 2.0, విస్తృత PLI పథకాల లక్ష్యాలకు అనుగుణంగా ఉందని నిపుణులు అభిప్రాయపడుతున్నారు. ఇక్కడ కేవలం పన్ను తగ్గింపులకే కాకుండా, ఇన్‌పుట్ ఖర్చులపై స్థిరత్వం కల్పించడమే అసలైన కీలక అంశంగా ప్రభుత్వం చూస్తోంది. కాగా ఈ బడ్జెట్ ద్వారా తయారీదారులకు పెట్టుబడులపై స్పష్టత, స్థిరత్వం లభిస్తుందని, దీర్ఘకాలంలో బలమైన సరఫరా చెయిన్స్‌ ఏర్పడతాయని, తద్వారా పోటీ ధరలకు అవకాశం కలుగుతుందని నిపుణులు భావిస్తున్నారు. అయితే ఈ ప్రయోజనాలు తక్షణమే వినియోగదారులకు ల‌భించ‌వ‌ని, అందువ‌ల్ల ఈ బ‌డ్జెట్ అనంతరం త‌క్ష‌ణ‌మే లేదా కొన్ని రోజుల‌కు ఆయా వ‌స్తువుల ధ‌ర‌లు త‌గ్గుతాయ‌ని చెప్ప‌లేమ‌ని, కానీ దీర్ఘ‌కాలంలో మాత్రం ఫ‌లితం ఉంటుంద‌ని నిపుణులు చెబుతున్నారు.