UK Student Visa | యూకే స్టూడెంట్ వీసా నిబంధనల్లో మార్పులు.. భారతీయ విద్యార్థులపై రూ.18 లక్షల భారం..

UK Student Visa | యునైటెడ్ కింగ్‌డమ్‌లో ఉన్నత విద్య అభ్యసించాలనుకునే భారతీయ విద్యార్థులకు కొత్త ఆర్థిక నిబంధనలు అమల్లోకి రానున్నాయి. నవంబర్ 30 నుంచి స్టూడెంట్ వీసా దరఖాస్తుదారులు తమ జీవన ఖర్చుల కోసం ఎక్కువ మొత్తంలో బ్యాంక్ బ్యాలెన్స్ చూపించాల్సి ఉంటుంది. లండన్‌లో చదివేవారు తొమ్మిది నెలలకు రూ.17.97 లక్షలు, ఇతర ప్రాంతాల్లో చదివేవారు రూ.13.77 లక్షలు చూపించాలి.

యూకేలో ఉన్నత విద్యను అభ్యసించాలని లక్షలాది మంది భారతీయ విద్యార్థులు కలలు కంటుంటారు. అయితే విదేశీ విద్య కోసం సిద్ధమవుతున్న విద్యార్థులకు బ్రిటన్ ప్రభుత్వం కీలక మార్పులు తీసుకొస్తోంది. స్టూడెంట్ వీసా పొందేందుకు అవసరమైన జీవన వ్యయాల ఆర్థిక పరిమితిని పెంచింది. యూకే హోమ్ ఆఫీస్ విడుదల చేసిన ఇమ్మిగ్రేషన్ నిబంధనల మార్పుల ప్రకారం, ఈ కొత్త నిబంధనలు నవంబర్ 30 నుంచి అమల్లోకి వస్తాయి. ఈ తేదీ నుంచి దరఖాస్తు చేసుకునే భారతీయ విద్యార్థులు పెంచిన మొత్తాన్ని తమ ఆర్థిక స్థోమతకు ఆధారంగా చూపించాల్సి ఉంటుంది.

ఎంత చూపించాలి..?

లండన్‌లోని యూనివర్సిటీల్లో చదవాలనుకునే విద్యార్థులు ప్రస్తుతం నెలకు సుమారు రూ.1.94 లక్షలు చూపించాల్సి ఉండగా, కొత్త నిబంధనల ప్రకారం ఈ మొత్తం రూ.2 లక్షలకు పెరగనుంది. తొమ్మిది నెలలు లేదా అంతకంటే ఎక్కువ కాలం చదివే విద్యార్థులు జీవన ఖర్చుల కోసం మొత్తం రూ.17.97 లక్షల బ్యాంక్ బ్యాలెన్స్ చూపించాలి. ప్రస్తుతం ఈ మొత్తం రూ.17.50 లక్షలుగా ఉంది. అంటే అదనంగా సుమారు రూ.46,937 అవసరమవుతుంది. లండన్ వెలుపల చదివే విద్యార్థులకు నెలవారీ జీవన వ్యయ పరిమితి రూ.1.49 లక్షల నుంచి రూ.1.53 లక్షలకు పెరుగుతుంది. తొమ్మిది నెలలకు అవసరమైన మొత్తం ప్రస్తుతం రూ.13.41 లక్షలు ఉండగా, కొత్తగా రూ.13.77 లక్షలు చూపించాల్సి ఉంటుంది. కోర్సు వ్యవధిని బట్టి ఈ మొత్తాన్ని లెక్కిస్తారు. అయితే గరిష్ఠంగా తొమ్మిది నెలల జీవన ఖర్చులనే పరిగణనలోకి తీసుకుంటారు.

యూనివ‌ర్సిటీ ఫీజులు వేరే..

మరో ముఖ్యమైన విషయం ఏమిటంటే, ఈ మొత్తాలు కేవలం జీవన ఖర్చులకు మాత్రమే వర్తిస్తాయి. యూనివర్సిటీ ట్యూషన్ ఫీజులు ఇందులో ఉండవు. విద్యార్థులకు జారీ చేసే కన్ఫర్మేషన్ ఆఫ్ యాక్సెప్టెన్స్ ఫర్ స్టడీస్ (సీఏఎస్)లో పేర్కొన్న పెండింగ్ ఫీజులను అదనంగా చెల్లించగలమని నిరూపించాలి. వ్యక్తిగత నిధులను చూపించే విద్యార్థులు సాధారణంగా దరఖాస్తుకు ముందు వరుసగా 28 రోజుల పాటు అవసరమైన మొత్తాన్ని బ్యాంక్ ఖాతాలో నిర్వహించాలి. నవంబర్ 30కు ముందు దరఖాస్తు చేసుకునేవారికి పాత ఆర్థిక పరిమితులే వర్తిస్తాయి. ఆ తేదీ నుంచి దరఖాస్తు చేసుకునేవారు కొత్త పరిమితులను పాటించాలి. అలాగే వీసా దరఖాస్తు రుసుము, ఇమ్మిగ్రేషన్ హెల్త్ సర్‌ఛార్జ్, వసతి ముందస్తు చెల్లింపులు, విమాన ప్రయాణ ఖర్చులను కూడా విద్యార్థులు ప్రత్యేకంగా బడ్జెట్‌లో చేర్చుకోవాలి.

2026-27 విద్యా సంవత్సరానికి సంబంధించి దేశీయ విద్యార్థులకు అందుబాటులో ఉన్న జీవన వ్యయ సహాయాన్ని పరిగణనలోకి తీసుకుని ఈ మార్పులు చేసినట్లు బ్రిటన్ హోమ్ ఆఫీస్ వెల్లడించింది. కాబట్టి యూకేకు వెళ్లాలని ప్రణాళికలు సిద్ధం చేసుకుంటున్న భారతీయ విద్యార్థులు తమ యూనివర్సిటీ సీఏఎస్ వివరాలను పరిశీలించి, దరఖాస్తు తేదీకి అనుగుణంగా అవసరమైన నిధులను ముందుగానే సిద్ధం చేసుకోవాలి. అధికారిక యూకే ప్రభుత్వ వీసా మార్గదర్శకాలను పరిశీలించిన తర్వాతే దరఖాస్తు చేయడం మంచిది.