Stock Markets | క్రూడాయిల్ సెగ.. ఐటీ షేర్ల పతనం.. నష్టాల్లో సెన్సెక్స్, నిఫ్టీ..

Stock Markets | దేశీయ స్టాక్ మార్కెట్లు మంగళవారం నష్టాలతో ప్రారంభమయ్యాయి. అంతర్జాతీయ మార్కెట్లో ముడిచమురు ధరలు అధిక స్థాయిలో కొనసాగుతుండడం, ఐటీ షేర్లలో అమ్మకాల ఒత్తిడి పెరగడం మార్కెట్లపై ప్రభావం చూపాయి. దీంతో కీలక సూచీలు సెన్సెక్స్, నిఫ్టీ నష్టాల్లో ట్రేడయ్యాయి. 30 షేర్ల బీఎస్ఈ సెన్సెక్స్ ప్రారంభ ట్రేడింగ్‌లో 281.95 పాయింట్లు నష్టపోయి 73,316.21 వద్దకు చేరింది. మరోవైపు 50 షేర్ల ఎన్ఎస్ఈ నిఫ్టీ 63.15 పాయింట్లు తగ్గి 22,694.60 వద్ద ట్రేడయింది. సెన్సెక్స్‌లోని 30 కంపెనీల్లో ఇన్ఫోసిస్, హిందుస్థాన్ యూనిలీవర్, టాటా కన్సల్టెన్సీ సర్వీసెస్, ఏషియన్ పెయింట్స్, హెచ్‌సీఎల్ టెక్, టెక్ మహీంద్రా షేర్లు ప్రధానంగా నష్టాలను చవిచూశాయి. మరోవైపు భారత్ ఎలక్ట్రానిక్స్, ఎటర్నల్, మారుతీ, ఇంటర్‌గ్లోబ్ ఏవియేషన్ షేర్లు లాభాల్లో ట్రేడయ్యాయి. అంతర్జాతీయ చమురు ప్రమాణమైన బ్రెంట్ క్రూడాయిల్ ధర 0.74 శాతం తగ్గి బ్యారెల్‌కు 115 డాలర్ల వద్ద ట్రేడయింది. అయినప్పటికీ చమురు ధరలు అధిక స్థాయిలో కొనసాగుతుండడం మార్కెట్లకు ప్రతికూలంగా మారింది.

ఆందోళ‌న క‌లిగిస్తున్న చ‌మురు ధ‌ర‌లు..

జియోజిత్ ఇన్వెస్ట్‌మెంట్స్ లిమిటెడ్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయకుమార్ మాట్లాడుతూ.. బ్రెంట్ క్రూడాయిల్ ధర బ్యారెల్‌కు 114 డాలర్లకు పైన కొనసాగుతుండడం, అమెరికా పదేళ్ల ట్రెజరీ బాండ్ ఈల్డ్ సుమారు 4.97 శాతం వద్ద ఉండడం స్వల్పకాలంలో మార్కెట్లకు ప్రతికూల అంశాలని పేర్కొన్నారు. ఈ పరిస్థితుల్లో విదేశీ సంస్థాగత పెట్టుబడిదారులు (ఎఫ్‌ఐఐలు) రిస్క్ తీసుకోవడానికి వెనుకాడే అవకాశం ఉందన్నారు. అయితే రెండో త్రైమాసిక ఆర్థిక ఫలితాల్లో ప్రతిబింబిస్తున్న కంపెనీల మెరుగైన పనితీరు, దేశీయ పెట్టుబడుల నుంచి బలమైన నిధుల ప్రవాహం మార్కెట్లకు మద్దతుగా నిలుస్తాయని వివరించారు. మరోవైపు విదేశీ సంస్థాగత పెట్టుబడిదారులు సోమవారం భారత ఈక్విటీ మార్కెట్ల నుంచి రూ.1,462.49 కోట్ల విలువైన షేర్లను విక్రయించినట్లు ఎక్స్ఛేంజీల గణాంకాలు వెల్లడించాయి.

అప్ర‌మ‌త్తంగా ఉన్న ఈక్విటీ మార్కెట్లు..

ఎన్‌రిచ్ మనీ సీఈఓ పొన్ముడి ఆర్ మాట్లాడుతూ.. ముడిచమురు ధరలు అధిక స్థాయిలో కొనసాగుతున్న నేపథ్యంలో భారత ఈక్విటీ మార్కెట్లు అప్రమత్తంగా కొనసాగే అవకాశం ఉందన్నారు. అమెరికా డబ్ల్యూటీఐ క్రూడాయిల్ ధర బ్యారెల్‌కు 101 డాలర్ల సమీపంలో ట్రేడవుతోందని పేర్కొన్నారు. అమెరికా ఫెడరల్ రిజర్వ్ వడ్డీ రేట్లపై తీసుకోనున్న నిర్ణయానికి ముందు కూడా ఇన్వెస్టర్లు ఆచితూచి వ్యవహరించే అవకాశం ఉందన్నారు. భవిష్యత్తులో వడ్డీ రేట్ల దిశపై ఫెడరల్ రిజర్వ్ ఇచ్చే సంకేతాలు కీలకంగా మారనున్నాయని పొన్ముడి తెలిపారు. అమెరికా విధానంలో మార్పులు చోటుచేసుకుంటే ట్రెజరీ బాండ్ ఈల్డ్స్, డాలర్ విలువపై ప్రభావం పడుతుందని, తద్వారా వర్ధమాన మార్కెట్లలోకి వచ్చే విదేశీ పెట్టుబడుల ప్రవాహం కూడా మారే అవకాశం ఉంటుందని వివరించారు.