Stock Markets | ఫెడ్ నిర్ణయంతో మార్కెట్‌ల‌కు ఊరట.. లాభాల్లో సెన్సెక్స్, నిఫ్టీ..

Stock Markets | అమెరికా ఫెడరల్ రిజర్వ్ వడ్డీ రేట్లను యథాతథంగా కొనసాగించడంతో గురువారం దేశీయ స్టాక్ మార్కెట్లు స్వల్ప లాభాల్లోకి వచ్చాయి. ఐటీ షేర్ల కొనుగోళ్లు మార్కెట్‌ల‌కు మద్దతునిచ్చాయి. అయితే ముడిచమురు ధరలు అధిక స్థాయిలో ఉండడం, విదేశీ పెట్టుబడిదారులు నిధులను ఉపసంహరించుకోవడం మార్కెట్‌ల‌కు ప్రధాన ఆందోళనలుగా కొనసాగుతున్నాయి.

గురువారం ఉదయం మార్కెట్లు అప్రమత్తంగా ప్రారంభమైనప్పటికీ, కొద్దిసేపటికే లాభాల్లోకి మళ్లాయి. ఉదయం 9.33 గంటల సమయంలో బీఎస్ఈ సెన్సెక్స్ 159.09 పాయింట్లు (0.22 శాతం) పెరిగి 73,405.12 వద్ద ట్రేడయింది. ఎన్ఎస్ఈ నిఫ్టీ 50 సూచీ 39.65 పాయింట్లు (0.17 శాతం) లాభపడి 22,738.50 వద్ద కొనసాగింది. నిఫ్టీ 22,690.65 వద్ద ప్రారంభం కాగా, సెన్సెక్స్ 73,268.47 వద్ద ట్రేడింగ్‌ను మొదలుపెట్టింది. అంతర్జాతీయ మార్కెట్లో బ్రెంట్ ముడిచమురు ధర బ్యారెల్‌కు 113.97 డాలర్ల వద్ద, డబ్ల్యూటీఐ ముడిచమురు ధర 101.43 డాలర్ల వద్ద కొనసాగాయి. అంతకుముందు ముగింపుతో పోలిస్తే ఇవి వరుసగా 1.17 శాతం, 1.31 శాతం తగ్గాయి. అయినప్పటికీ ముడిచమురు ధరలు అధిక స్థాయిలోనే ఉండడం ఇన్వెస్టర్లను ఆందోళనకు గురిచేస్తోంది.

ఐటీ షేర్ల జోరు..

ప్రారంభ ట్రేడింగ్‌లో ఐటీ షేర్లు మార్కెట్‌ల‌కు ప్రధాన మద్దతుగా నిలిచాయి. నిఫ్టీ ఐటీ సూచీ 0.65 శాతం పెరిగింది. టీసీఎస్ 1.19 శాతం, ఇన్ఫోసిస్ 0.66 శాతం, హెచ్‌సీఎల్‌టెక్ 0.69 శాతం, టెక్ మహీంద్రా 0.39 శాతం చొప్పున లాభపడ్డాయి. అదానీ పోర్ట్స్ 2.33 శాతం, పవర్ గ్రిడ్ 1.47 శాతం, ఎన్టీపీసీ 1.13 శాతం, రిలయన్స్ ఇండస్ట్రీస్ 1.02 శాతం, టైటాన్ 0.95 శాతం చొప్పున పెరిగాయి. మరోవైపు ఎల్ అండ్ టీ 0.82 శాతం, ట్రెంట్ 1.72 శాతం, మారుతీ 0.74 శాతం, బజాజ్ ఫిన్‌సర్వ్ 0.84 శాతం చొప్పున నష్టపోయాయి. విస్తృత మార్కెట్లలో నిఫ్టీ మిడ్‌క్యాప్ 100 సూచీ 0.21 శాతం, నిఫ్టీ స్మాల్‌క్యాప్ 100 సూచీ 0.30 శాతం లాభపడ్డాయి. మార్కెట్ ఒడిదొడుకులను సూచించే ఇండియా విక్స్ 0.58 శాతం తగ్గి 16.15కు చేరింది. రంగాల వారీగా నిఫ్టీ పీఎస్‌యూ బ్యాంక్ 0.66 శాతం, మీడియా 0.58 శాతం, ఫార్మా 0.31 శాతం పెరిగాయి. మెటల్, ఆర్థిక సేవలు, ప్రైవేట్ బ్యాంకుల షేర్లు కూడా లాభాల్లో ట్రేడయ్యాయి. ఆటో, రియల్టీ రంగాలు బలహీనంగా ఉండగా, ఎఫ్ఎంసీజీ, రసాయనాల రంగాల్లో ఒత్తిడి కనిపించింది.