Stock Markets | భారీ లాభాల తర్వాత మార్కెట్లకు బ్రేక్.. నష్టాల్లో సెన్సెక్స్, నిఫ్టీ..

Stock Markets | గత వారం భారీ ర్యాలీతో దూసుకెళ్లిన దేశీయ స్టాక్ మార్కెట్లలో సోమవారం లాభాల స్వీకరణ కనిపించింది. ప్రారంభంలో లాభాలతో మొదలైన మార్కెట్లు క్రమంగా నష్టాల్లోకి జారుకున్నాయి. ఐటీ షేర్లలో అమ్మకాల ఒత్తిడి, హెచ్‌సీఎల్ టెక్నాలజీస్, ఇన్ఫోసిస్, టీసీఎస్ షేర్ల పతనం సూచీలపై ప్రభావం చూపాయి.

నిరాశ ప‌రిచిన ముహూర‌త్ ట్రేడింగ్‌..

భారత స్టాక్ మార్కెట్లు సోమవారం ఉదయం నష్టాల్లో ట్రేడయ్యాయి. బీఎస్ఈ సెన్సెక్స్ 100 పాయింట్లకు పైగా తగ్గి 80,900 స్థాయికి చేరుకోగా, ఎన్ఎస్ఈ నిఫ్టీ 50 సూచీ 24,950 సమీపంలో కదలాడింది. బ్యాంక్ నిఫ్టీ మాత్రం 59,000 పాయింట్ల స్థాయికి పైన కొనసాగింది. గత వారం మార్కెట్లు భారీగా ర్యాలీ చేయడంతో ఇన్వెస్టర్లు లాభాల స్వీకరణకు మొగ్గుచూపారు. ముహూరత్ ట్రేడింగ్‌లోనూ ఆశించిన స్థాయిలో కొనుగోళ్లు లేకపోవడం మార్కెట్ సెంటిమెంట్‌పై ప్రభావం చూపింది. విస్తృత మార్కెట్లలోనూ అమ్మకాల ఒత్తిడి కనిపించింది. నిఫ్టీ స్మాల్‌క్యాప్ 100, నిఫ్టీ మిడ్‌క్యాప్ 100 సూచీలు చెరో అర శాతం మేర నష్టపోయాయి.

భారీ లాభాల్లో బ్యాంకింగ్ షేర్లు..

రంగాల వారీగా చూస్తే నిఫ్టీ పీఎస్‌యూ బ్యాంక్, నిఫ్టీ ఫార్మా, నిఫ్టీ మీడియా, నిఫ్టీ ప్రైవేట్ బ్యాంక్ సూచీలు లాభాల్లో కొనసాగాయి. మరోవైపు నిఫ్టీ ఐటీ, నిఫ్టీ మెటల్, నిఫ్టీ ఆటో, నిఫ్టీ ఎఫ్ఎంసీజీ, నిఫ్టీ రియాల్టీ సూచీలు నష్టాలను నమోదు చేశాయి. ముఖ్యంగా హెచ్‌సీఎల్ టెక్నాలజీస్, ఇన్ఫోసిస్, టీసీఎస్ షేర్లలో అమ్మకాల ఒత్తిడి మార్కెట్లను దిగజార్చింది. అంతర్జాతీయ మార్కెట్లలో ఆసియా సూచీలు ఎక్కువగా లాభాల్లో ట్రేడవగా, గత వారం అమెరికా మార్కెట్లు మిశ్రమంగా ముగిశాయి. నాస్‌డాక్ కాంపోజిట్ వరుసగా నాలుగో వారమూ నష్టాలను నమోదు చేయడం గమనార్హం.

ఈ వారం కీల‌కం..

గత వారం భారత మార్కెట్లు గణనీయమైన ర్యాలీని నమోదు చేశాయి. నిఫ్టీ ఏకంగా 8.6 శాతం పెరిగింది. విదేశీ సంస్థాగత పెట్టుబడిదారులు (ఎఫ్ఐఐలు) తిరిగి కొనుగోళ్లు ప్రారంభించడం, ఆకర్షణీయమైన వాల్యుయేషన్లు, కృత్రిమ మేధ ఆధారిత స్టాక్స్‌లో ప్రపంచవ్యాప్తంగా పెట్టుబడుల కేటాయింపులు మారడం, ముడి చమురు ధరలు తగ్గడం, అమెరికా బాండ్ ఈల్డ్స్ తగ్గడం, రెండో త్రైమాసిక ఆర్థిక ఫలితాలు మెరుగుపడడం మార్కెట్ ర్యాలీకి ప్రధాన కారణాలని జియోజిత్ ఇన్వెస్ట్‌మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ డాక్టర్ వీకే విజయకుమార్ తెలిపారు. అమెరికా ఎన్నికల్లో డెమొక్రాట్ల విజయం కృత్రిమ మేధ రంగంలో పెట్టుబడుల మందగమనంపై అంచనాలను పెంచిందని, దీంతో ఏఐ షేర్లలో భారీ దిద్దుబాటు చోటుచేసుకోవడం కూడా భారత మార్కెట్లకు అనుకూలంగా మారిందని వివరించారు. రానున్న రోజుల్లో ఎఫ్ఐఐల కొనుగోళ్లు కొనసాగితే లార్జ్‌క్యాప్ షేర్లలో మరింత ర్యాలీకి అవకాశం ఉంటుందని ఆయన అభిప్రాయపడ్డారు. ఈ వారంలో భారత్, అమెరికా, చైనా ద్రవ్యోల్బణ గణాంకాలు, అమెరికా-ఇరాన్ యుద్ధ పరిణామాలు, విదేశీ పెట్టుబడుల ప్రవాహాలు, సెప్టెంబర్ త్రైమాసిక ఆర్థిక ఫలితాలపై ఇన్వెస్టర్లు దృష్టి సారించనున్నారు.