Stock Markets | స్టాక్ మార్కెట్‌ల‌లో ఆటో షేర్ల జోరు.. లాభాల్లో ముగిసిన సెన్సెక్స్, నిఫ్టీ..

Stock Markets | దేశీయ స్టాక్ మార్కెట్లు తీవ్ర ఒడిదొడుకుల మధ్య చివరకు లాభాలతో ముగిశాయి. ఆటో రంగ షేర్లలో బలమైన కొనుగోళ్లు కనిపించడంతో విస్తృత మార్కెట్‌ల‌లోని బలహీనతల‌ను అధిగమించి ప్రధాన సూచీలు పాజిటివ్‌గా నిలిచాయి. బీఎస్‌ఈ సెన్సెక్స్ 273.55 పాయింట్లు (0.35 శాతం) పెరిగి 77,928.15 వద్ద ముగియగా, ఎన్ఎస్‌ఈ నిఫ్టీ50 సూచీ 66.95 పాయింట్లు (0.28 శాతం) లాభపడి 24,317.15 వద్ద ముగిసింది. దీంతో నిఫ్టీ 24,300 స్థాయికి పైనే నిలబ‌డింది. గురువారం ట్రేడింగ్‌లో ఆటో రంగం ప్రధాన ఆకర్షణగా నిలిచింది. నిఫ్టీ ఆటో సూచీ 1.6 శాతం ఎగిసి అన్ని రంగాల్లో అత్యుత్తమ ప్రదర్శన కనబరిచింది. మహీంద్రా అండ్ మహీంద్రా, ఐషర్ మోటార్స్, మారుతి సుజుకి, కోల్ ఇండియా, టెక్ మహీంద్రా షేర్లు నిఫ్టీలో అత్యధిక లాభాలు నమోదు చేసిన కంపెనీలుగా నిలిచాయి. మరోవైపు అదానీ పోర్ట్స్, శ్రీరామ్ ఫైనాన్స్, హెచ్‌డీఎఫ్‌సీ లైఫ్, అల్ట్రాటెక్ సిమెంట్, జియో ఫైనాన్షియల్ సర్వీసెస్ షేర్లు అత్యధిక నష్టాల‌ను చవిచూశాయి.

స్వ‌ల్పంగా త‌గ్గిన చ‌మురు ధ‌ర‌లు..

రంగాల వారీగా చూస్తే నిఫ్టీ రియాల్టీ సూచీ 2 శాతం పడిపోవడంతో అత్యంత బలహీన రంగంగా నిలిచింది. ప్రధాన సూచీలతో పోలిస్తే విస్తృత మార్కెట్లు వెనుకబడ్డాయి. నిఫ్టీ మిడ్‌క్యాప్ 100 సూచీ 0.4 శాతం క్షీణించగా, నిఫ్టీ స్మాల్‌క్యాప్ 100 సూచీ 0.6 శాతం తగ్గింది. బ్యాంకింగ్ రంగంలో కూడా ఒత్తిడి కనిపించింది. నిఫ్టీ బ్యాంక్ సూచీ 58 పాయింట్లు ( 0.1 శాతం) నష్టపోయి 57,147.50 వద్ద ముగిసింది. ఆర్థిక రంగ షేర్లలో బలహీన ధోరణి కొనసాగినట్లు ఇది సూచిస్తోంది. విస్తృత మిడ్‌క్యాప్ సూచీ కూడా 220 పాయింట్లు పడిపోయి 62,642 వద్ద ముగియడంతో బ్లూ చిప్ షేర్లకు వెలుపల ఇన్వెస్టర్లు లాభాల స్వీకరణకు మొగ్గుచూపినట్లు కనిపించింది. అంతర్జాతీయ మార్కెట్‌ల‌లో ముడి చ‌మురు ధ‌ర‌లు గురువారం స్వ‌ల్పంగా త‌గ్గాయి. బ్రెంట్ క్రూడ్ ధ‌ర 0.63 శాతం మేర త‌గ్గి బ్యారెల్‌కు 87 డాల‌ర్ల వ‌ద్ద నిల‌వ‌గా, డ‌బ్ల్యూటీఐ క్రూడ్ ధ‌ర 0.49 శాతం మేర త‌గ్గి బ్యారెల్‌కు 84 డాల‌ర్ల వ‌ద్ద స్థిర‌ప‌డింది. ఫారెక్స్ మార్కెట్‌లో రూపాయి ఉద‌యం సెష‌న్‌లో బ‌లాన్ని క‌న‌బ‌రిచినా త‌రువాత క్షీణించింది. అమెరికా డాల‌ర్‌తో పోలిస్తే 0.04 శాతం క్షీణించిన రూపాయి 95.68 వ‌ద్ద నిలిచింది.

ప్ర‌పంచ మార్కెట్ల‌లో మిశ్ర‌మ ధోర‌ణి..

ప్రపంచ మార్కెట్లలో మిశ్రమ ధోరణి కనిపించింది. ఆర్టిఫిషియల్ ఇంటెలిజెన్స్ కంపెనీల భారీ వ్యయాలపై ఆందోళనలు కొనసాగుతుండటంతో ఆసియా మార్కెట్లలో పెట్టుబడిదారులు అప్రమత్తంగా వ్యవహరించారు. దక్షిణ కొరియా కోస్పీ సూచీ శామ్‌సంగ్ ఎలక్ట్రానిక్స్ బలమైన ఆర్థిక ఫలితాలు ప్రకటించినప్పటికీ 1 శాతానికి పైగా పడిపోయింది. మరోవైపు జపాన్ నిక్కీ 225 సూచీ లాభాల్లో ముగిసింది. హాంకాంగ్ హాంగ్ సెంగ్ సూచీ స్వల్ప లాభాలను నమోదు చేయగా, ఆస్ట్రేలియా ఏఎస్‌ఎక్స్ 200, సింగపూర్ ఎఫ్‌టీఎస్‌ఈ స్ట్రైట్స్ టైమ్స్ సూచీలు దాదాపు 1 శాతం మేర నష్టపోయాయి.