Stock Markets | తీవ్ర అమ్మ‌కాల ఒత్తిడిలో స్టాక్ మార్కెట్లు.. సెన్సెక్స్‌, నిఫ్టీ డౌన్‌..

Stock Markets | భారత స్టాక్ మార్కెట్లు సోమవారం బలహీనంగా ముగిశాయి. అంతర్జాతీయ మార్కెట్ల నుంచి ప్రతికూల సంకేతాలు రావడంతో దేశీయ మార్కెట్లపై ఒత్తిడి కొనసాగింది. సెన్సెక్స్ 172 పాయింట్లు (0.22 శాతం) నష్టపోయి 77,369 వద్ద ముగిసింది. నిఫ్టీ 50 సూచీ 33 పాయింట్లు (0.14 శాతం) క్షీణించి 24,219.05 వద్ద స్థిరపడింది. నిఫ్టీ మిడ్‌క్యాప్ 150 సూచీ స్వల్పంగా 0.07 శాతం లాభపడగా, స్మాల్‌క్యాప్ 250 సూచీ 0.21 శాతం నష్టపోయింది. అంటే పెద్ద కంపెనీల షేర్లతో పోలిస్తే మిడ్‌క్యాప్ విభాగంలో స్వల్పంగా కొనుగోళ్ల మద్దతు కనిపించింది. సెన్సెక్స్‌పై అత్యధిక ప్రతికూల ప్రభావం చూపిన షేర్లలో రిలయన్స్, బజాజ్ ఫైనాన్స్, ఐసీఐసీఐ బ్యాంక్, భారతి ఎయిర్‌టెల్, ఎస్‌బీఐ, యాక్సిస్ బ్యాంక్ ఉన్నాయి. ఈ షేర్లలో అమ్మకాల ఒత్తిడి సూచీలను దిగువకు లాగింది.

ఎగ‌బాగిన మెట‌ల్ షేర్లు..

అయితే బలహీన మార్కెట్ పరిస్థితులకు భిన్నంగా నిఫ్టీ మెటల్ సూచీ 1.6 శాతం దూసుకెళ్లింది. మెటల్ రంగంలోని షేర్లలో కొనుగోళ్లు పెరగడంతో ఈ సూచీ ఇతర రంగాల సూచీల కంటే మెరుగైన పనితీరు కనబరిచింది. అమెరికా, ఇరాన్ మధ్య కొనసాగుతున్న ఉద్రిక్తతల ప్రభావం దేశీయ మార్కెట్లపై కనిపించింది. మరోవైపు బాండ్ ఈల్డ్స్ పెరుగుతుండటంపై పెట్టుబడిదారుల్లో ఆందోళనలు కొనసాగాయి. ఈ పరిణామాలు మార్కెట్ సెంటిమెంట్‌ను బలహీనపరిచాయి. అయితే చమురు ధరలు తగ్గడం మార్కెట్‌ల‌కు కొంత ఉపశమనం కలిగించింది. ఇటీవలి పెరుగుదల తర్వాత ఇన్వెస్టర్లు లాభాల స్వీకరణకు దిగడంతో చమురు ధరలు తగ్గాయి. అయినప్పటికీ అంతర్జాతీయ ప్రతికూల సంకేతాల కారణంగా దేశీయ ఈక్విటీ మార్కెట్లు నష్టాల్లోనే ముగిశాయి.

క్షీణించిన చ‌మురు ధ‌ర‌లు..

అంత‌ర్జాతీయ మార్కెట్‌లో ముడి చ‌మురు ధ‌ర‌లు సోమ‌వారం భారీగా ప‌త‌న‌మ‌య్యాయి. బ్రెంట్ క్రూడ్ ధ‌ర 1.58 శాతం మేర త‌గ్గి బ్యారెల్‌కు 90 డాల‌ర్ల‌కు చేర‌గా, డ‌బ్ల్యూటీఐ క్రూడ్ ధ‌ర 1.97 శాతం మేర త‌గ్గి బ్యారెల్‌కు 85 డాల‌ర్ల‌కు చేరుకుంది. ఫారెక్స్ మార్కెట్‌లో సోమ‌వారం ఉదయం భార‌త రూపాయి కాస్త బ‌ల‌ప‌డిన‌ట్లు క‌నిపించిన‌ప్ప‌టికీ సెష‌న్ ముగిసే స‌మ‌యానికి 0.05 శాతం మేర న‌ష్ట‌పోయింది. అమెరికా డాల‌ర్‌తో పోలిస్తే 95.73 వ‌ద్ద ముగిసింది.