FPI Investments | విదేశీ పెట్టుబ‌డిదారుల యూ ట‌ర్న్‌.. ఈ నెల‌లో రూ.84వేల కోట్లు రాక‌.. కార‌ణాలేమిటి..?

FPI Investments | వరుసగా రెండు నెలల పాటు భారత స్టాక్ మార్కెట్ల నుంచి పెట్టుబడులను వెనక్కి తీసుకున్న విదేశీ పోర్ట్‌ఫోలియో ఇన్వెస్టర్లు (ఎఫ్‌పీఐలు) నవంబర్‌లో భారీగా తిరిగి కొనుగోళ్లు ప్రారంభించారు. ఈ నెలలో ఇప్పటివరకు ఏకంగా రూ.84,291 కోట్ల పెట్టుబడులు పెట్టారు. అమెరికా కృత్రిమ మేధ రంగంలోని షేర్లలో అమ్మకాలు, భారత కంపెనీల మెరుగైన క్యూ2 ఆర్థిక ఫలితాలు, ముడి చమురు ధరల తగ్గుదల ఇందుకు ప్రధాన కారణాలుగా నిలిచాయి.

భార‌త్‌కు విదేశీ పెట్టుబ‌డుల వ‌ర‌ద‌..

భారత ఈక్విటీ మార్కెట్లలో విదేశీ పెట్టుబడిదారుల కొనుగోళ్లు మళ్లీ ఊపందుకున్నాయి. నవంబర్‌లో ఇప్పటివరకు విదేశీ పోర్ట్‌ఫోలియో ఇన్వెస్టర్లు (ఎఫ్‌పీఐలు) భారత షేర్లలో రూ.84,291 కోట్ల పెట్టుబడులు పెట్టినట్లు నేషనల్ సెక్యూరిటీస్ డిపాజిటరీ లిమిటెడ్ (ఎన్‌ఎస్‌డీఎల్) గణాంకాలు వెల్లడించాయి. సెప్టెంబర్‌లో రూ.35,861 కోట్ల నికర పెట్టుబడులను వెనక్కి తీసుకోగా, అక్టోబర్‌లోనూ రూ.34,843 కోట్ల మేర అమ్మకాలు జరిపారు. వరుసగా రెండు నెలల పాటు అమ్మకాలకు పరిమితమైన విదేశీ ఇన్వెస్టర్లు నవంబర్‌లో ఒక్కసారిగా కొనుగోళ్ల బాట పట్టడం మార్కెట్ వర్గాల్లో ఆసక్తిని పెంచుతోంది. అమెరికాతోపాటు దక్షిణ కొరియా, తైవాన్, జపాన్ వంటి ఆసియా మార్కెట్లలో కృత్రిమ మేధ (ఏఐ) సంబంధిత షేర్లలో అమ్మకాలు పెరగడం ఈ మార్పునకు ప్రధాన కారణంగా కనిపిస్తోంది.

కార‌ణాలు ఏమిటి..?

అమెరికాలో డేటా సెంటర్లపై భారీగా పెట్టుబడులు పెట్టడంపై రాజకీయంగా వ్యతిరేకత వ్యక్తమవుతుండడం, ఏఐ రంగంలో పెట్టుబడుల భవిష్యత్తుపై ఆందోళనలు పెరగడం అంతర్జాతీయ మార్కెట్లలో ప్రభావం చూపుతున్నాయి. అమెరికా కాంగ్రెస్‌లోని ఉభయ సభల్లో డెమొక్రాట్లు ఆధిపత్యం సాధించడంతో డేటా సెంటర్ల వ్యయంపై మరిన్ని నియంత్రణలు కోరే అవకాశం ఉందన్న అంచనాలు ఇన్వెస్టర్లను అప్రమత్తం చేశాయి. ఈ పరిణామాల నేపథ్యంలో అక్టోబర్‌లో దక్షిణ కొరియా, తైవాన్ మార్కెట్ల నుంచి దాదాపు 45 బిలియన్ డాలర్ల విదేశీ పెట్టుబడులు వెనక్కి వెళ్లాయి. మరోవైపు భారత కంపెనీలు రెండో త్రైమాసికంలో అంచనాలను మించిన ఆర్థిక ఫలితాలను ప్రకటిస్తున్నాయి. అమెరికా బాండ్ ఈల్డ్స్ ఇటీవల గరిష్ఠ స్థాయిల నుంచి తగ్గడం, ముడి చమురు ధరలు దిగిరావడం కూడా భారత మార్కెట్లకు అనుకూలంగా మారాయి.

నిఫ్టీ 26వేల మార్కుకు చేరేనా..?

జియోజిత్ ఇన్వెస్ట్‌మెంట్స్ లిమిటెడ్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయకుమార్ మాట్లాడుతూ.. అమెరికా సహా ఇతర ఏఐ ఆధారిత మార్కెట్లలో అమ్మకాల ఒత్తిడి పెరగడం వల్ల విదేశీ పెట్టుబడిదారులు తమ పెట్టుబడుల వ్యూహాన్ని మార్చుకున్నారని వివరించారు. మరోవైపు అంతర్జాతీయ బ్రోకరేజ్ సంస్థ బీఓఎఫ్‌ఏ సెక్యూరిటీస్ భారత మార్కెట్లపై సానుకూల అంచనాలను కొనసాగించింది. నిఫ్టీ 50 సూచీకి ఏడాది చివరి లక్ష్యాన్ని 26,200గా నిర్ణయించింది. ప్రస్తుత స్థాయిల నుంచి 4.7 శాతం వరకు పెరిగే అవకాశం ఉందని అంచనా వేసింది. భారత కంపెనీల ఆదాయ వృద్ధి క్యూ1 ఆర్థిక సంవత్సరంలో 13 శాతానికి చేరగా, రెండో త్రైమాసికంలో 18 శాతానికి పెరుగుతుందని అంచనా వేసింది. అంతర్జాతీయ మార్కెట్లలో అనిశ్చితి కొనసాగుతున్నప్పటికీ, దేశీయ కంపెనీల ఆర్థిక పనితీరు మెరుగుపడడం భారత ఈక్విటీ మార్కెట్లపై విదేశీ పెట్టుబడిదారుల విశ్వాసాన్ని తిరిగి పెంచుతున్నట్లు తాజా పెట్టుబడుల సరళి సూచిస్తోంది.