EPFO | ఇనాక్టివ్‌ ఖాతాలపై ఈపీఎఫ్‌వో కీలక నిర్ణయం.. క్లెయిమ్ లేకుండానే డబ్బులు ఖాతాల్లోకి..

EPFO | ఉద్యోగుల భవిష్యనిధి సంస్థ (EPFO) ఇనాక్టివ్‌ ఖాతాల్లో నిలిచిపోయిన క్లెయిమ్ చేయని నిధుల పునరుద్ధరణపై ప్రత్యేక దృష్టి సారించింది. ఈ నేపథ్యంలో క్లెయిమ్ దాఖలు చేయకుండానే ఇనాక్టివ్‌ EPFO ఖాతాలను ఆటోమేటిక్‌గా సెటిల్ చేసే కొత్త వ్యవస్థను ప్రారంభించేందుకు సిద్ధమవుతోంది. ఈ విధానం అమల్లోకి వస్తే, సభ్యుల ఆధార్‌తో లింక్ చేసిన బ్యాంక్ ఖాతాల్లోకి నిధులు నేరుగా జమ కానున్నాయి. ఆధార్ ద్వారా ధ్రువీకరించబడిన ఇనాక్టివ్‌ ఖాతాల్లో దాదాపు 25 శాతం ఖాతాలకు సంబంధించిన నిల్వ నిధులను పరిష్కరించే దిశగా EPFO అడుగులు వేస్తోంది. కొత్త ఆటో సెటిల్‌మెంట్ ఫీచర్ ద్వారా ఖాతాదారులు క్లెయిమ్ చేయకుండానే తమ డబ్బులను నేరుగా బ్యాంక్ ఖాతాల్లో పొందగలరని టైమ్స్ ఆఫ్ ఇండియా నివేదిక పేర్కొంది.

8.10 ల‌క్ష‌ల ఇనాక్టివ్ ఖాతాల‌కు సెటిల్‌మెంట్‌..

ఈ సదుపాయం సుమారు 8.10 లక్షల ఆధార్ ధ్రువీక‌రించ‌బ‌డిన‌ ఇనాక్టివ్‌ ఖాతాలకు అందుబాటులోకి రానుంది. వీటిలో మొత్తం సుమారు రూ. 5,200 కోట్ల నిధులు ఉన్నాయి. ఇందులో దాదాపు 14వేల‌ ఖాతాల్లో రూ. 5 లక్షలకు పైగా క్లెయిమ్ చేయని నిధులు ఉన్నాయి. అలాగే రూ. 1 లక్ష నుంచి రూ. 5 లక్షల మధ్య నిధులు ఉన్న 38వేల‌ ఖాతాలు, రూ. 50వేల‌ నుంచి రూ. 1 లక్ష మధ్య నిధులు ఉన్న మరో 41వేల‌ ఖాతాలు ఉన్నాయి. గత సమావేశంలో సెంట్రల్ బోర్డ్ ఆఫ్ ట్రస్టీస్ (CBT) రూ.1వేయి లేదా అంతకంటే తక్కువ క్లెయిమ్ చేయని నిల్వ ఉన్న ఇనాక్టివ్‌ ఖాతాలను నమోదు చేసిన బ్యాంక్ ఖాతాలకు ఆటో సెటిల్ చేయడానికి ఆమోదం తెలిపింద‌ని అధికారులు తెలిపారు.

మొత్తం ఇనాక్టివ్ ఖాతాలు 31.8 ల‌క్ష‌లు..

ఇనాక్టివ్‌ EPFO ఖాతా అంటే, వడ్డీ పొందడం ఆగిపోయిన ఖాతాను సూచిస్తుంది. సాధారణంగా 55 సంవత్సరాల వయస్సు పూర్తయ్యాక పదవీ విరమణ చేసిన సభ్యులు, మూడు సంవత్సరాల పాటు ఎలాంటి చందాలు చెల్లించకపోతే ఆ ఖాతా ఇనాక్టివ్‌గా మారుతుంది. అయితే 55 సంవత్సరాల కంటే తక్కువ వయస్సు ఉన్నవారికి, వారు 58 ఏళ్ల వయస్సు చేరుకునే వరకు ఖాతాపై వడ్డీ కొనసాగుతుంది. 2026 ఫిబ్రవరి నాటికి మొత్తం 31.8 లక్షల ఇనాక్టివ్‌ ఖాతాలు ఉండగా, వాటిలో రూ. 10,181 కోట్ల నిధులు క్లెయిమ్ చేయకుండా మిగిలి ఉన్నాయి. వీటిలో సుమారు 7 లక్షల ఖాతాలు 20 సంవత్సరాలకు పైగా పాతవి కాగా, 1.8 లక్షల ఖాతాలు 10 నుంచి 20 సంవత్సరాల మధ్య ఏజ్‌ కలిగి ఉన్నాయి. అలాగే సుమారు 13 లక్షల ఖాతాలు 5 నుంచి 10 సంవత్సరాల మధ్య కాలానికి చెందినవిగా గుర్తించారు.

ఇక EPF 3.0 కింద తీసుకున్న తాజా మార్పుల ప్రకారం, ఉద్యోగం మారినప్పుడు EPF ఖాతా బదిలీ ప్రక్రియను మరింత సులభతరం చేశారు. 2025 జనవరి 19 నుంచి అమల్లోకి వచ్చిన ఈ మార్పుల ప్రకారం, ట్రాన్స్‌ఫర్ అభ్యర్థనలను మాన్యువల్‌గా సమర్పించాల్సిన అవసరం తగ్గించారు. KYC పూర్తిచేసిన ఖాతాలకు యజమాని అనుమతి అవసరం లేకుండా, అనేక సందర్భాల్లో బదిలీలు ఆటోమేటిక్‌గా పూర్తవుతున్నాయి.