Daily SIP | డైలీ ఎస్ఐపీ వ‌ర్సెస్ మంత్లీ ఎస్ఐపీ.. ఏది బెస్ట్? రాబడిలో తేడా ఎంత?

Daily SIP | మ్యూచువల్ ఫండ్లలో రోజువారీ (డైలీ), నెలవారీ (మంత్లీ) ఎస్ఐపీల ద్వారా పెట్టుబడి పెట్టడం వల్ల రాబడుల్లో ఎంత తేడా ఉంటుందనే సందేహం చాలామంది ఇన్వెస్టర్లలో ఉంటుంది. పెట్టుబడి పెట్టే మొత్తం, మార్కెట్ కదలికలు, పెట్టుబడి కొనసాగించే కాలవ్యవధి ఆధారంగా ఫలితాలు మారుతాయి. అయితే ఎక్కువసార్లు పెట్టుబడి పెట్టినంత మాత్రాన అధిక లాభాలు వస్తాయని హామీ లేదు. దీర్ఘకాలంలో ఈ రెండు విధానాల మధ్య రాబడుల వ్యత్యాసం పరిమితంగానే ఉంటుంది.

ఎస్ఐపీల‌పై పెరుగుతున్న ఆస‌క్తి..

పెట్టుబడిదారులకు ఎస్ఐపీ అనేది మ్యూచువల్ ఫండ్లలో పెట్టుబడి పెట్టేందుకు అనువైన మార్గంగా మారింది. నిర్ణీత వ్యవధిలో చిన్న మొత్తాలను పెట్టుబడి పెట్టే అవకాశం ఉండడంతో కొత్త ఇన్వెస్టర్ల నుంచి అనుభవజ్ఞుల వరకు చాలామంది ఈ విధానాన్ని అనుసరిస్తున్నారు. ప్రస్తుతం నెలవారీ ఎస్ఐపీలకు ఎక్కువ ఆదరణ ఉన్నప్పటికీ, రోజువారీ ఎస్ఐపీలపై కూడా ఆసక్తి పెరుగుతోంది. నెలవారీ ఎస్ఐపీలో ప్రతినెలా నిర్ణీత తేదీన రూ.5వేలు పెట్టుబడి పెడితే ఏడాదికి రూ.60వేలు అవుతుంది. అదే రోజువారీ ఎస్ఐపీలో ఏడాదికి సుమారు 250 ట్రేడింగ్ రోజులను పరిగణనలోకి తీసుకుంటే రోజుకు దాదాపు రూ.240 చొప్పున పెట్టుబడి పెట్టాల్సి ఉంటుంది. ఈ రెండు విధానాల్లోనూ రూపీ కాస్ట్ యావరేజింగ్ ప్రయోజనం లభిస్తుంది. మార్కెట్ ధరలు తగ్గినప్పుడు ఎక్కువ యూనిట్లు, ధరలు పెరిగినప్పుడు తక్కువ యూనిట్లు కొనుగోలు చేసే అవకాశం ఉంటుంది.

రాబడుల విషయంలో ఏది మెరుగైనది?

రోజువారీ ఎస్ఐపీలో నెలలోని వివిధ రోజుల మార్కెట్ ధరల వద్ద పెట్టుబడి యూనిట్ల‌ను కొనుగోలు చేయవచ్చు. దీంతో మార్కెట్ ఒక్కసారిగా పడిపోవడానికి ముందు మొత్తం నెలవారీ మొత్తాన్ని పెట్టుబడి పెట్టే ప్రమాదం కొంత తగ్గుతుంది. నెలవారీ ఎస్ఐపీలో మాత్రం నిర్ణీత తేదీన మొత్తం ఇన్వెస్ట్ అవుతుంది. ఆ తర్వాత మార్కెట్ పడిపోయినా, తదుపరి నెల వరకు కొత్త పెట్టుబడి జరగదు. అయితే రోజువారీ ఎస్ఐపీ ద్వారా తప్పనిసరిగా అధిక రాబడులు వస్తాయని చెప్పలేం. పెట్టుబడి మొత్తం, పెట్టుబడి కొనసాగించే కాలవ్యవధి సమానంగా ఉన్నప్పుడు కేవలం పెట్టుబడి చేసే తరచుదనం కారణంగా వచ్చే రాబడుల వ్యత్యాసం దీర్ఘకాలంలో చాలా పరిమితంగా ఉంటుంది. మ్యూచువల్ ఫండ్ పనితీరు, మార్కెట్ పరిస్థితులు, పెట్టుబడి కొనసాగించే సమయం తుది రాబడిపై ఎక్కువ ప్రభావం చూపుతాయి.

ఎందులో పెట్టుబ‌డులు పెట్టాలి..

సౌకర్యం పరంగా చూస్తే నెలవారీ ఎస్ఐపీ ఉద్యోగులకు అనుకూలంగా ఉంటుంది. ప్రతినెలా జీతం అందుకున్న తర్వాత నిర్ణీత మొత్తాన్ని ఆటోమేటిక్‌గా పెట్టుబడి పెట్టేలా ఏర్పాటు చేసుకోవచ్చు. రోజువారీ లేదా వారానికొకసారి ఆదాయం పొందేవారికి డైలీ ఎస్ఐపీ సౌకర్యవంతంగా ఉంటుంది. చిన్న మొత్తాలుగా పెట్టుబడి పెట్టడం వల్ల వారికి ఆర్థిక నిర్వహణ సులభమవుతుంది. అయితే ఏ విధానాన్ని ఎంచుకున్నా కనీస పెట్టుబడి పరిమితులు, బ్యాంకింగ్ ఏర్పాట్లు, ఆటోమేటిక్ లావాదేవీల సంఖ్య వంటి అంశాలను ముందుగా పరిశీలించాలి. రోజువారీ, నెలవారీ ఎస్ఐపీలలో ఏది ఎంచుకోవాలనేది వ్యక్తిగత ఆదాయ విధానం, నగదు లభ్యత, పెట్టుబడి క్రమశిక్షణపై ఆధారపడి ఉంటుంది.