GST 2.0 Reforms | జీఎస్టీ 2.0 : ఏడాదికి ఒక్కసారే పన్నుల మార్పు.. వ్యాపారులకు ఇక మరింత ఊరట

జీఎస్టీ నిబంధనల్లో కేంద్రం భారీ సంస్కరణలకు శ్రీకారం చుట్టింది. ఇకపై ఏడాదికి ఒక్కసారే పన్ను రేట్ల మార్పులతో పాటు, వేగంగా రీఫండ్స్ ఇచ్చేలా కొత్త ప్రతిపాదనలు సిద్ధమయ్యాయి.

Jagadeesh

Business | Published On Oct 6, 2026, 5.18 pm IST

GST 2.0 Reforms | జీఎస్టీ 2.0 : ఏడాదికి ఒక్కసారే పన్నుల మార్పు.. వ్యాపారులకు ఇక మరింత ఊరట

సంక్షిప్త సారాంశం

జీఎస్టీ పన్ను రేట్లలో మార్పులను ఇకపై తరచూ కాకుండా ఏడాదికి ఒక్కసారి మాత్రమే సమీక్షించి, ప్రతి సంవత్సరం ఏప్రిల్ 1 నుంచి అమలు చేయనున్నారు. ప్రస్తుతం 21 నుంచి 35 రోజులు పడుతున్న జీఎస్టీ రీఫండ్‌ ప్రాసెసింగ్ సమయాన్ని గరిష్ఠంగా 17 రోజులకు తగ్గించే అవకాశం ఉంది. వ్యాపారులకు వేధింపులు తగ్గించే దిశగా చట్టంలోని కఠినమైన అరెస్ట్ నిబంధనలను తొలగించి, భారీగా డీక్రిమినలైజేషన్ చేయాలని కౌన్సిల్ నిర్ణయించింది. అక్టోబర్ 8న జరగనున్న జీఎస్టీ కౌన్సిల్ భేటీలో రేట్ల మార్పుల కంటే "జీఎస్టీ 2.0" ప్రక్రియ సంస్కరణలకే ప్రాధాన్యం ఇవ్వనున్నారు.

GST 2.0 Reforms | త్రినేత్ర న్యూస్ : వస్తు సేవల పన్ను (GST) వ్యవస్థలో వ్యాపార వర్గాలతో పాటు సామాన్యులకు ఊరటనిచ్చేలా కేంద్ర ప్రభుత్వం కీలక సంస్కరణలకు రంగం సిద్ధం చేసింది. ఇకపై ప్రతి కౌన్సిల్ భేటీలో పన్ను రేట్లను మార్చకుండా, ఏడాదికి ఒక్కసారి మాత్రమే సమీక్షించాలని కేంద్రం యోచిస్తోంది. సవరించిన పన్ను రేట్లను ప్రతి ఆర్థిక సంవత్సరం ప్రారంభమైన ఏప్రిల్ 1 నుంచే అమల్లోకి తీసుకురావాలనే సరికొత్త విధానాన్ని ప్రతిపాదించినట్లు ఉన్నత స్థాయి వర్గాలు వెల్లడించాయి.

అక్టోబర్ 8 భేటీలో పన్నుల మార్పు లేదు

ఈ నెల 8న జరగనున్న జీఎస్టీ కౌన్సిల్ కీలక సమావేశంలో పన్ను స్లాబ్‌ల మార్పుపై ఎటువంటి చర్చా ఉండబోదని అధికార వర్గాలు స్పష్టం చేశాయి. ప్రస్తుత పన్ను స్లాబ్‌లు యథాతథంగా కొనసాగుతాయని, రానున్న భేటీలో ప్రధానంగా పాలనాపరమైన ప్రక్రియల సంస్కరణలు (Process Reforms), వ్యాపార సౌలభ్యంపైనే దృష్టి సారించనున్నట్లు తెలిపాయి. పన్నుల మార్పుల వల్ల వ్యాపార వర్గాల్లో నెలకొనే గందరగోళాన్ని నివారించేందుకే ఈ వార్షిక విధానాన్ని తెస్తున్నారు.

ఇదీ చదవండి | పుంజుకున్న స్టాక్ మార్కెట్లు.. భారీ లాభాల్లో ముగిసిన సూచీలు..

17 రోజుల్లోనే రీఫండ్.. అరెస్ట్ నిబంధనలకు చెల్లుచీటీ

ట్యాక్స్ పేయర్లకు అత్యంత ఊరటనిచ్చే మరో ప్రతిపాదన రీఫండ్ ప్రక్రియ. ప్రస్తుతం ఏదైనా రీఫండ్ రావడానికి 21 నుంచి 35 రోజుల సమయం పడుతుండగా, ఇకపై ఆ గడువును గరిష్ఠంగా 17 రోజులకు పరిమితం చేయనున్నారు.

రీఫండ్ క్లెయిమ్ చేసిన 10 రోజుల్లోగా అధికారులు దానిని ధ్రువీకరించాలి.

ఒకవేళ నిర్దేశిత 10 రోజుల్లో రెస్పాన్స్ రాకపోతే, ఆ దరఖాస్తును 'ఆమోదించినట్లుగానే' (Deemed Approved) పరిగణిస్తారు.

దీంతో పాటు చిన్నచిన్న ఉల్లంఘనలకు సంబంధించి జీఎస్టీ చట్టాల్లోని కఠిన అరెస్ట్ నిబంధనలను తొలగించేందుకు (Decriminalisation) కౌన్సిల్ పచ్చజెండా ఊపనుంది.

'జీఎస్టీ 2.0'లో 5 ప్రధాన స్తంభాలు

జీఎస్టీ సంస్కరణలను తదుపరి దశకు చేర్చేందుకు కేంద్రం 5 అంశాలతో కూడిన 'జీఎస్టీ 2.0' ప్రణాళికను సిద్ధం చేసింది.

ప్రక్రియల సంస్కరణలు (Process Reforms)

వ్యవస్థాగత మార్పులు (Structural Reforms)

జీవన సులభతరం (Ease of Living)

సర్వీస్ ఎగుమతులు (Exports of Services)

ఈ-కామర్స్ సంస్కరణలు (E-commerce Reforms)

గత ఏడాది కాలంగా వివిధ రాష్ట్ర ప్రభుత్వాలతో జరిపిన సంప్రదింపుల అనంతరం ఈ మార్పులను రూపకల్పన చేశారు. ఈ సంస్కరణలు అమల్లోకి వస్తే వ్యాపారాలు మరింత పారదర్శకంగా సాగడంతో పాటు, మార్కెట్‌లో ధరల స్థిరత్వం ఏర్పడే అవకాశం ఉంది.

Also Read | జీడీపీ పెరుగుతున్నా.. భార‌త స్టాక్ మార్కెట్లు ఎందుకు ప‌త‌న‌మ‌వుతున్నాయి..?

Find us on