Ola Roadster X+ 9.1 Price Cut | ఓలా ఎలక్ట్రిక్ బైక్‌పై రూ.60,000 భారీ తగ్గింపు: కొత్త ధర, ఫ్లాష్ సేల్స్ వివరాలు ఇవే..!

Ola Roadster X+ 9.1 Price Cut | త్రినేత్ర.న్యూస్ : ఓలా ఎలక్ట్రిక్ (Ola Electric) ఎలక్ట్రిక్ బైక్ ప్రియులకు భారీ శుభవార్త అందించింది. తన ఫ్లాగ్‌షిప్ మోటార్‌సైకిల్ 'రోడ్‌స్టర్ ఎక్స్+ 9.1 కేడబ్ల్యూహెచ్' (Roadster X+ 9.1 kWh) ధరను ఏకంగా రూ.60,000 మేర తగ్గిస్తున్నట్లు గురువారం అధికారికంగా ప్రకటించింది.

ఓలా గిగాఫ్యాక్టరీలో స్వదేశీ పరిజ్ఞానంతో అభివృద్ధి చేసిన '4680 భారత్ సెల్' (4680 Bharat Cell) ఉత్పత్తిని భారీగా పెంచడం వల్లే ఈ తగ్గింపు సాధ్యమైందని కంపెనీ తెలిపింది. బ్యాటరీ సెల్స్ ఉత్పత్తి సామర్థ్యం పెరగడంతో తయారీ ఖర్చులు గణనీయంగా తగ్గాయని, ఆ ప్రయోజనాన్ని నేరుగా కస్టమర్లకు అందిస్తున్నట్లు ఓలా ఒక ప్రకటనలో పేర్కొంది.

కొత్త ధర ఎంతంటే?

గతంలో ఈ రోడ్‌స్టర్ 9.1 kWh ఎలక్ట్రిక్ బైక్ ధర రూ.1,89,999 గా ఉండేది. తాజా తగ్గింపుతో ఈ బైక్ ఇప్పుడు రూ.1,29,999 కే సొంతం చేసుకోవచ్చు.

ఇకపై 'లిమిటెడ్ పర్చేజ్ విండో' విధానం

రోడ్‌స్టర్ X+ 9.1 kWh పై ఉన్న విపరీతమైన డిమాండ్‌ను దృష్టిలో ఉంచుకుని, ఇకపై ఈ మోడల్‌ను ఓపెన్ సేల్స్‌లో విక్రయించబోమని ఓలా స్పష్టం చేసింది. నిర్ణీత సమయాల్లో, పరిమిత సంఖ్యలో మాత్రమే (Limited Purchase Window) వీటిని అందుబాటులో ఉంచనుంది.

మొదటి పర్చేజ్ విండో: ఏప్రిల్ 3 (శుక్రవారం) సాయంత్రం 6:00 గంటల నుంచి రాత్రి 9:00 గంటల వరకు అందుబాటులో ఉంటుంది. ఉత్పత్తి లభ్యత ఆధారంగా తదుపరి సేల్స్ వివరాలను ఎప్పటికప్పుడు ప్రకటిస్తారు.

సింగిల్ ఛార్జ్‌తో 500 కి.మీ రేంజ్

ఓలా ఎలక్ట్రిక్ లైనప్‌లో అత్యుత్తమ పనితీరు కనబరిచే ఈ రోడ్‌స్టర్ బైక్, సింగిల్ ఛార్జ్‌తో గరిష్టంగా 500 కిలోమీటర్ల రేంజ్ ఇస్తుందని కంపెనీ చెబుతోంది. #EndICEAge క్యాంపెయిన్ తర్వాత ఈ బైక్‌కు కస్టమర్ల నుండి అద్భుతమైన స్పందన వచ్చిందని, డిమాండ్ ఏకంగా 5 రెట్లు పెరిగిందని ఓలా ప్రతినిధి ఒకరు తెలిపారు. తాజా ధరల తగ్గింపుతో లాంగ్-రేంజ్ ఎలక్ట్రిక్ ప్రయాణం సామాన్యులకు మరింత చేరువ కానుందన్నారు.

మార్చిలో దూసుకెళ్లిన సేల్స్.. వృద్ధి పథంలో ఓలా

ఓలా గిగాఫ్యాక్టరీ సామర్థ్యాన్ని త్వరలో 6 GWh కు విస్తరించాలని కంపెనీ లక్ష్యంగా పెట్టుకుంది. దీని ద్వారా దేశీయ బ్యాటరీ ఎకోసిస్టమ్‌ను బలోపేతం చేయడమే కాకుండా, భవిష్యత్తులో వాహనాల ధరలను మరింత తగ్గించే అవకాశం ఉందని నిపుణులు భావిస్తున్నారు.

ఇక వ్యాపార పరంగా ఓలా అద్భుతమైన రికవరీ సాధించింది. మార్చి నెలలో ఓలా రిజిస్ట్రేషన్లు 150 శాతం (MoM) పెరిగి 10,117 యూనిట్లకు చేరుకున్నాయి. గత నెల చివరి వారంలో ప్రతిరోజూ 1,000కి పైగా ఆర్డర్లు నమోదయ్యాయి. మెరుగైన కస్టమర్ సర్వీస్, యాజమాన్య అనుభవం కారణంగా మార్కెట్ షేర్‌లో 'V-షేప్డ్' రికవరీని సాధించినట్లు కంపెనీ వెల్లడించింది.