Kodagu Coffee Estates | 60 ఏళ్ల వర్షం, ఒక డైరీ: కొడగు కాఫీ రైతుల అద్భుతమైన రికార్డులు

Kodagu Coffee Estates | త్రినేత్ర.న్యూస్ : కర్ణాటకలోని కొడగు (Coorg) జిల్లా అనగానే పచ్చని కాఫీ తోటలు గుర్తొస్తాయి. అయితే ఇక్కడ వర్షం కురిస్తే అది కేవలం వాతావరణంలో మార్పు కాదు, వ్యవసాయాన్ని నిర్ణయించే ఒక కచ్చితమైన లెక్క. అక్కడి కాఫీ ఎస్టేట్ (Coffee estate) కుటుంబాలు 60 ఏళ్లకు పైగా ప్రతిరోజూ కురిసిన వర్షాన్ని చేతితో డైరీల్లో రాసుకుంటున్నారు. ఒకప్పుడు సాధారణ అలవాటుగా మొదలైన ఈ ఆచారం, నేడు వాతావరణ సీజన్లను అర్థం చేసుకోవడానికి, తోటల్లో పనులను ప్లాన్ చేసుకోవడానికి దిక్సూచిగా మారింది.

కొడగులో వర్షమే వ్యవసాయ పనులను శాసిస్తుంది. ఈ కొండ ప్రాంతంలోని రైతులకు ప్రతి చినుకూ ముఖ్యమే. ఒక్క అంగుళం వర్షపాతం కూడా కాఫీ సీజన్ గతిని మార్చేస్తుంది. నేలలోని తేమ, పూత రావడం ఇవన్నీ వర్షం మీదే ఆధారపడి ఉంటాయి. అందుకే, ఇక్కడ ఎవరైనా ఒక ఎస్టేట్‌ను కొనుగోలు చేయాలనుకుంటే, ముందుగా అడిగేది ఆ ఎస్టేట్‌కు సంబంధించిన పాత వాతావరణ రికార్డులనే.

తరతరాలుగా వస్తున్న డైరీలు

కొడగు అంతటా అనేక కుటుంబాలు దశాబ్దాలుగా వర్షపాతాన్ని రికార్డ్ చేస్తున్నాయి. కొన్ని రికార్డులు 1950లు, 60ల నాటివి కూడా ఉన్నాయి. ఒకప్పుడు వ్యవసాయంలో భాగంగా మొదలైన ఈ పని, క్రమంగా ఒక తరం నుంచి మరో తరానికి వారసత్వంగా మారింది.

దీని వెనుక ఉన్న ప్రాసెస్ చాలా సింపుల్. ప్రతిరోజూ 'రెయిన్ గేజ్' (Rain gauge) చూసి ఆ రోజు కురిసిన వర్షాన్ని ఒక నోట్‌బుక్‌లో ఎంటర్ చేస్తారు. అలా రోజువారీగా రాసిన చిన్న అంకెలు.. ఏళ్లు గడిచేకొద్దీ ఏ ఏడాది ఎంత వర్షం పడింది? కరువు ఎప్పుడు వచ్చింది? అనే పూర్తి చరిత్రను కళ్లకు కడతాయి. ఎన్నో ఏళ్లుగా ఒక్క రోజు కూడా మిస్ అవ్వకుండా ఈ లెక్కలు రాస్తున్న కుటుంబాలు ఇక్కడ ఎన్నో ఉన్నాయి.

గార్వాలే గ్రామంలో 60 ఏళ్ల లెక్కలు

మడపూర్ సమీపంలోని గార్వాలేలో పండండ విజయ్ దేవాహ్ (Pandanda Vijai Deviah) కుటుంబం 60 ఏళ్లకు పైగా ఈ వాతావరణ వివరాలను పక్కాగా నమోదు చేస్తోంది.

"మా నాన్నగారు 1965లో వర్షపాతాన్ని రికార్డ్ చేయడం ప్రారంభించారు, దాన్ని నేను ఇప్పుడు కొనసాగిస్తున్నాను" అని విజయ్ చెప్పుకొచ్చారు.

ఏప్రిల్ నెలలో వచ్చే 'బ్లాసమ్ షవర్స్' (పూత కోసం కురిసే వాతావరణ వర్షాలు) దగ్గరి నుంచి రుతుపవనాల వరకు పనులను ప్లాన్ చేయడానికి ఈ రికార్డులే వారికి ఆధారం. ఎరువులు ఎప్పుడు వేయాలి? ఎప్పుడు స్ప్రే చేయాలి? కోతలు ఎప్పుడు మొదలుపెట్టాలి? అన్నది ఈ లెక్కలను బట్టే నిర్ణయిస్తారు.

మూడు తరాలుగా కక్కబే ఎస్టేట్‌లో..

కక్కబేలోని ప్యాలెస్ ఎస్టేట్‌లో అప్పరండ ప్రసాద్ కుశాలప్ప కూడా అచ్చం ఇలాంటి విధానాన్నే పాటిస్తున్నారు. వాళ్ళ నాయనమ్మ మొదలుపెట్టిన ఈ అలవాటును, ఆ తర్వాత ఆయన మామయ్య, ఇప్పుడు ప్రసాద్ కొనసాగిస్తున్నారు. ఈ ఎస్టేట్‌లో 1963 నుంచి ఇప్పటివరకూ ప్రతి వర్షపు చుక్క రికార్డ్ అయ్యే ఉంది.

ఈ పాత నోట్‌బుక్‌లు కేవలం కాగితాలు కావు. గతం కంటే ఇప్పుడు వాతావరణంలో, వర్షాల ప్యాటర్న్‌లో ఎలాంటి మార్పులు వస్తున్నాయో తెలుసుకోవడానికి అవి ఒక అద్దం లాంటివి. వ్యవసాయం తెలియని వారికి వర్షంలో చిన్నపాటి మార్పు పెద్దగా అనిపించకపోవచ్చు, కానీ ఒక కాఫీ రైతుకు ఆ చిన్నపాటి మార్పు వల్ల ఎంతో నష్టం జరగొచ్చు లేదా లాభం రావచ్చు.

పొన్నంపేటకు చెందిన వ్యవసాయ నిపుణుడు దినేష్ మాట్లాడుతూ.. "నాలుగు అంగుళాల వర్షానికి, మూడున్నర అంగుళాల వర్షానికి మధ్య ఎంతో తేడా ఉంటుంది. ఆ అర అంగుళం తేడానే నేలలో తేమను, పూతను, చీడపీడల నియంత్రణను ప్రభావితం చేస్తుంది" అని వివరిస్తున్నారు.

సిరాలో భద్రపర్చిన వాతావరణ చరిత్ర

ఈ రైతులు రాసిన రికార్డుల్లో ఎంత కచ్చితత్వం ఉందంటే, 'కాఫీ బోర్డ్ ఆఫ్ ఇండియా' కూడా అనేక సందర్భాల్లో కొడగు రైతుల డైరీల డేటాను వినియోగించుకుంది. నేటి డిజిటల్ యుగంలో వాతావరణం కోసం ప్రతి ఒక్కరూ స్క్రీన్లు, మొబైల్ ఫోన్లపై ఆధారపడుతున్న వేళ.. ఈ రైతులు మాత్రం తమ చేతి రాతలనే నమ్ముతున్నారు.

ఆ పుస్తకాల్లో ఒక తేదీ, ఒక నంబరు, ఒక చిన్న నోట్.. చూసేందుకు చిన్నగానే అనిపించవచ్చు. కానీ అవన్నీ కలిపితే ప్రకృతితో కాఫీ రైతులకు ఉన్న అనుబంధం, ఎస్టేట్లను కంటికి రెప్పలా కాపాడుకుంటున్న వారి తీరు కనిపిస్తుంది. కొడగులో వర్షం అంటే కేవలం నీరు కాదు.. తరాల కొద్దీ కాగితాలపై సిరాతో లిఖించబడిన చెరగని జ్ఞాపకం!