All India Tiger Estimation 2026 | ఉమ్మడి ఆదిలాబాద్ జిల్లాలో ‘పులుల గణన’ షురూ.. ఆరు రోజుల పాటు భారీ సర్వే

All India Tiger Estimation 2026 | త్రినేత్ర.న్యూస్: వన్యప్రాణుల ఉనికిని అంచనా వేసే అతిపెద్ద ప్రక్రియ 'భారత పులుల గణన 2026' కార్యక్రమం ఉమ్మడి ఆదిలాబాద్ జిల్లా వ్యాప్తంగా మంగళవారం ప్రారంభమైంది. అటవీ శాఖ అధికారులు, వాలంటీర్లు కలిసి ఆరు రోజుల పాటు సాగే ఈ భారీ సర్వేలో పాల్గొంటున్నారు. పులులతో పాటు వాటి ఆహారపు అలవాట్లు, ఇతర జంతువుల లభ్యతను లెక్కించడం ఈ సర్వే ప్రధాన ఉద్దేశం.

పకడ్బందీగా ఏర్పాట్లు

ఈ గణన కోసం అటవీ సిబ్బందితో పాటు వివిధ రాష్ట్రాల నుంచి వచ్చిన వాలంటీర్లకు ఇప్పటికే ప్రత్యేక శిక్షణ ఇచ్చారు. సర్వేలో భాగంగా ప్రతిరోజూ 5 కిలోమీటర్ల మేర 'ట్రాన్సెక్ట్ వాక్' ద్వారా మాంసాహార జంతువులను, రోజుకు రెండుసార్లు 2 కిలోమీటర్ల మేర నడుస్తూ శాఖాహార జంతువుల కదలికలను బృందాలు నమోదు చేస్తున్నాయి.

జిల్లాల వారీగా వివరాలు

కుమ్రం భీం ఆసిఫాబాద్: ఇక్కడ అత్యధికంగా 244 బృందాలు రంగంలోకి దిగాయి. ఆసిఫాబాద్, కాగజ్‌నగర్ డివిజన్లలోని 11 రేంజ్‌ల పరిధిలో 2.42 లక్షల హెక్టార్ల అటవీ ప్రాంతాన్ని ఈ బృందాలు జల్లెడ పడుతున్నాయి.

మంచిర్యాల: మంచిర్యాల, జన్నారం, చెన్నూరు, బెల్లంపల్లి డివిజన్లలోని 195 బీట్లలో సర్వే కొనసాగుతోంది. మొత్తం 150 మంది సిబ్బంది, 90 మంది వాలంటీర్లు ఇందులో పాల్గొంటున్నారు.

ఆదిలాబాద్: జిల్లాలోని 9 రేంజ్‌ల పరిధిలో 171 బృందాలు 1.82 లక్షల హెక్టార్ల అటవీ భూమిలో వన్యప్రాణుల గణన చేపడుతున్నాయి.

నిర్మల్: ఈ జిల్లాలో 122 బృందాలు 1.21 లక్షల హెక్టార్లలో సర్వే నిర్వహిస్తున్నాయి. ఉదయం 6 గంటల నుంచే ప్రారంభమయ్యే ఈ ప్రక్రియ రాత్రి 8.30 గంటల వరకు కొనసాగుతుంది.

రెండు దశల్లో సర్వే

మొదటి మూడు రోజులు పులులు, చిరుతలు వంటి మాంసాహార జంతువుల అడుగుజాడలు, ఉనికిని అంచనా వేస్తారు. మిగిలిన మూడు రోజులు శాఖాహార జంతువులు, వివిధ రకాల పక్షులు, గడ్డి జాతులపై అధ్యయనం చేస్తారు. అడవిలో ఉండే వాలంటీర్లకు అటవీ శాఖ భోజన, వసతి సౌకర్యాలను కల్పిస్తుంది.