India UPI System | “రోడ్డు పక్కన చాయ్ కొట్టు దగ్గర కూడా అదేనా?”.. భారత్ డిజిటల్ విప్లవానికి యూరప్ పర్యాటకురాలు ఫిదా

India UPI System | త్రినేత్ర.న్యూస్ : ప్రస్తుతం భారతదేశంలో డిజిటల్ చెల్లింపులు ఎంతలా భాగమైపోయాయో ప్రత్యేకంగా చెప్పక్కర్లేదు. జేబులో రూపాయి క్యాష్ లేకపోయినా కేవలం మొబైల్ ఫోన్ ఉంటే దేశంలో ఎక్కడికైనా వెళ్లిపోవచ్చు. తాజాగా భారత్‌లో పర్యటించిన స్లొవేనియా (Slovenia) దేశానికి చెందిన జూలియా అనే విదేశీ పర్యాటకురాలు ఇక్కడి యూపీఐ (UPI) సిస్టమ్ చూసి ముక్కున వేలేసుకుంది. "భారతదేశ డిజిటల్ పేమెంట్స్ వ్యవస్థ ప్రపంచంలోని మిగతా దేశాల కంటే ఎన్నో ఏళ్లు ముందుంది" అంటూ ఆమె ఇన్‌స్టాగ్రామ్ (Instagram) వేదికగా చేసిన పోస్ట్ ఇప్పుడు సోషల్ మీడియాలో విపరీతంగా ట్రెండ్ అవుతోంది.

క్యాష్‌తో పనే లేదు.. అంతా క్యూఆర్ కోడే

వెకేషన్‌లో భాగంగా ఇండియాకు వచ్చిన జూలియా.. ఇక్కడి వినూత్న అనుభవాలను నెటిజన్లతో పంచుకుంది. "భారత్‌లో నన్ను అత్యంత ఆశ్చర్యపరిచిన విషయం ఏంటంటే, నా పర్యటనలో నాకు నగదు (Cash) అవసరమే రాలేదు. రోడ్డు పక్కన ఉండే చిన్న చాయ్ స్టాల్ అయినా, లోకల్ రెస్టారెంట్ అయినా, చివరకు ఏదైనా చిన్న కిరాణా షాప్ అయినా.. పేమెంట్ అనగానే అందరూ క్యూఆర్ కోడ్ (QR Code) వైపే చూపిస్తున్నారు" అని జూలియా రాసుకొచ్చింది.

బ్యాంక్ అకౌంట్ వివరాలు టైప్ చేసే పని లేకుండా, కేవలం మొబైల్ యాప్ ద్వారా క్యూఆర్ కోడ్ స్కాన్ చేస్తే చాలు, కొన్ని సెకన్లలోనే మనీ ట్రాన్స్‌ఫర్ అయిపోతుందని, తాను చూసిన ట్రావెల్ ఎక్స్‌పీరియన్స్‌లోనే ఇది అత్యంత కన్వీనియంట్ (Convenient) సిస్టమ్ అని ఆమె ప్రశంసల వర్షం కురిపించింది.

విదేశీయులకు చిన్న చిక్కులు.. జూలియా ఇచ్చిన సలహా ఇదే

భారతదేశం డిజిటల్‌గా ఎంతో అడ్వాన్స్ అయినప్పటికీ, విదేశీ పర్యాటకులకు అంతర్జాతీయ బ్యాంక్ అకౌంట్లు, కార్డ్ ప్రొవైడర్ల వల్ల కొన్నిసార్లు యూపీఐ నేరుగా పని చేయకపోవచ్చని జూలియా తెలిపింది. అలాంటి సమయంలో ఫోన్‌పే (PhonePe), గూగుల్ పే (Google Pay), పేటీఎం (Paytm), భీమ్ (BHIM) వంటి యాప్స్ ప్రత్యామ్నాయంగా ఉపయోగపడతాయని సూచించింది. అలాగే చిన్న టౌన్లు, మారుమూల ప్రాంతాలకు వెళ్లినప్పుడు లేదా ఇంటర్నెట్ సరిగ్గా లేనప్పుడు ఇబ్బంది పడకుండా ఉండేందుకు డెబిట్, క్రెడిట్ కార్డ్‌లతో పాటు కొద్దిగా క్యాష్ కూడా దగ్గర పెట్టుకోవడం మంచిదని ఇతర పర్యాటకులకు సలహా ఇచ్చింది.

నెటిజన్ల ఫన్నీ కామెంట్లు.. "ఇంటర్నెట్ లేకపోయినా యూపీఐ వాడొచ్చు తెలుసా?"

జూలియా పెట్టిన ఈ పోస్ట్‌పై భారతీయ నెటిజన్లు పెద్ద ఎత్తున స్పందిస్తున్నారు. ఒక యూజర్ స్పందిస్తూ.. "నేను వెస్ట్రన్ దేశాలకు వెళ్లాలంటే రెండు విషయాలకు భయపడతాను. ఒకటి టాయిలెట్ పేపర్, రెండోది అక్కడ యూపీఐ లేకపోవడం!" అంటూ ఫన్నీగా కామెంట్ చేశాడు. మరో నెటిజన్.. "ఇండియాలో ఇంటర్నెట్ లేకపోయినా కూడా యూపీఐ పేమెంట్స్ చేసుకోవచ్చని మీకు తెలుసా?" అంటూ ఆమెకు వివరించాడు. యూపీఐ ద్వారా వచ్చే డబ్బులు నేరుగా బ్యాంక్ అకౌంట్‌లోకి వస్తాయి కాబట్టి, వ్యాపారులు వెంటనే ఆ క్యాష్‌ను వాడుకునే వెసులుబాటు ఉంటుందని మరికొందరు కామెంట్స్ చేశారు.

గ్లోబల్ లెవెల్లో యూపీఐ సంచలనాలు

నేషనల్ పేమెంట్స్ కార్పొరేషన్ ఆఫ్ ఇండియా (NPCI) ద్వారా 2016లో ప్రారంభమైన యూపీఐ.. నేడు భారత ఆర్థిక వ్యవస్థ రూపురేఖలను మార్చేసింది. గణాంకాల ప్రకారం.. జనవరి 2026 నాటికి కేవలం ఒకే ఒక్క నెలలో యూపీఐ ద్వారా ఏకంగా 21.70 బిలియన్ల లావాదేవీలు జరిగాయి. వీటి విలువ సుమారు రూ.28.33 లక్షల కోట్లు కావడం విశేషం.

అంతర్జాతీయ ద్రవ్య నిధి (IMF) సైతం ప్రపంచంలోనే అత్యంత వేగవంతమైన రిటైల్ పేమెంట్ సిస్టమ్‌గా యూపీఐని గుర్తించింది. ప్రపంచవ్యాప్తంగా జరిగే మొత్తం రియల్ టైమ్ డిజిటల్ లావాదేవీలలో దాదాపు 49 శాతం వాటా ఒక్క భారతదేశపు యూపీఐ ద్వారానే జరుగుతోందని అంతర్జాతీయ నివేదికలు స్పష్టం చేస్తున్నాయి.