Hyderabad startup CEO | లగ్జరీ కార్పొరేట్ లైఫ్‌కు గుడ్‌బై.. ఒరాకిల్, అమెజాన్ ఉద్యోగాలను వదిలి హైదరాబాద్ స్టార్టప్ సీఈఓగా మారిన తెలుగు టెకీ

Hyderabad startup CEO | త్రినేత్ర.న్యూస్ : సాఫ్ట్‌వేర్ రంగంలో అమెజాన్ (Amazon), ఒరాకిల్ (Oracle) వంటి దిగ్గజ గ్లోబల్ కంపెనీల్లో ఉద్యోగం సంపాదించడం అంటే అంత చిన్న విషయం కాదు. నెలకు లక్షల్లో జీతం, లగ్జరీ లైఫ్ స్టైల్.. ఇలాంటి ఉద్యోగాన్ని వదులుకోవడానికి ఎవరైనా వంద సార్లు ఆలోచిస్తారు. కానీ, హైదరాబాద్‌కు చెందిన ఈ రమేష్ గౌడ్ అనే తెలుగు టెకీ మాత్రం తన 14 ఏళ్ల కార్పొరేట్ కెరీర్‌కు సింపుల్‌గా గుడ్‌బై చెప్పేశారు. కేవలం ఒక ఉద్యోగిగా మిగిలిపోవడం ఇష్టం లేక, ఒక సరికొత్త వ్యాపార సామ్రాజ్యాన్ని నిర్మించి నేడు సగర్వంగా సీఈఓ (CEO) కుర్చీలో కూర్చున్నారు. ఆయన సక్సెస్ జర్నీకి సంబంధించిన ఒక ఇన్‌స్టాగ్రామ్ (Instagram) వీడియో ఇప్పుడు సోషల్ మీడియాలో విపరీతంగా హల్‌చల్ చేస్తోంది.

వైరల్ అవుతున్న ఇన్‌స్టాగ్రామ్ రీల్

హైదరాబాద్ వేదికగా పనిచేస్తున్న నెట్‌వర్కింగ్ కంపెనీ 'తుంగభద్ర నెట్‌వర్క్స్' (TungaBadra Networks) ఇటీవల సోషల్ మీడియాలో ఒక ఆసక్తికరమైన వీడియోను పోస్ట్ చేసింది. ఈ వీడియోలో ఆ కంపెనీ ఫౌండర్, సీఈఓ అయిన ఈ రమేష్ గౌడ్ కారు నడుపుతూ, తన పాత ఒరాకిల్ ఐడీ కార్డ్‌ను (Oracle ID Card) కెమెరాకు చూపిస్తారు. ఆ తర్వాత సీన్ కట్ చేస్తే.. ఆయన తాను సొంతంగా స్థాపించిన కొత్త స్టార్టప్ ఆఫీస్ బిల్డింగ్‌లోకి సీఈఓగా అడుగుపెడతారు.

"గత 14 ఏళ్లుగా ఒక ఉద్యోగిగా పనిచేశాను..! ఇప్పుడు తుంగభద్ర నెట్‌వర్క్స్ సీఈఓగా ప్రమాణ స్వీకారం చేశాను..!" అంటూ ఆ వీడియో క్యాప్షన్‌లో రాసుకొచ్చారు.

నెటిజన్ల రియాక్షన్.. "నాకో ఉద్యోగం ఇస్తారా బ్రో?"

ఈ వీడియో సోషల్ మీడియాలో పోస్ట్ చేసిన కొద్దిసేపట్లోనే వైరల్‌గా మారింది. రమేష్ గౌడ్ సాధించిన విజయానికి నెటిజన్లు, తోటి ఐటీ ఉద్యోగులు అభినందనలు కురిపిస్తున్నారు. "కంగ్రాట్స్ బ్రో, నేను కూడా గతంలో ఒరాకిల్‌లోనే పనిచేశాను" అని ఒకరు కామెంట్ చేయగా, "మీరు భవిష్యత్తులో మరిన్ని మైలురాళ్లను అందుకోవాలి" అని మరొకరు ఆకాంక్షించారు. ఇక నిరుద్యోగులు, ఐటీ కుర్రాళ్లు మాత్రం ఫన్నీగా స్పందిస్తూ.. "బ్రో.. మీ కొత్త కంపెనీలో నాకేమైనా జాబ్ ఓపెనింగ్స్ ఉన్నాయా? ప్లీజ్!" అంటూ వింక్ ఎమోజీలతో కామెంట్లు పెడుతున్నారు.

ఎవరీ ఈ రమేష్ గౌడ్? ఆయన బ్యాక్‌గ్రౌండ్ ఏంటి?

రమేష్ గౌడ్ లింక్డ్‌ఇన్ (LinkedIn) ప్రొఫైల్ ప్రకారం.. ఆయన ఒక సాధారణ మధ్యతరగతి బ్యాక్‌గ్రౌండ్ నుంచి వచ్చారు. ఆదర్శ విద్యామందిర్ హైస్కూల్‌లో టెన్త్ క్లాస్, శ్రీకృష్ణ జూనియర్ కాలేజీలో ఇంటర్మీడియట్ పూర్తి చేశారు. ఆ తర్వాత జేఎన్‌టీయూ అనంతపూర్ (JNTU Anantapur) నుంచి బీటెక్, ఎంటెక్ డిగ్రీలను విజయవంతంగా పూర్తి చేశారు.

ఉద్యోగ విషయానికి వస్తే.. మొదట ఎన్‌ఐఐటీ (NIIT) లో ఒక సాధారణ నెట్‌వర్క్ ఇంజనీర్‌గా రమేష్ తన కెరీర్‌ను ప్రారంభించారు. ఆ తర్వాత వివిధ కంపెనీల్లో అనుభవాన్ని గడిస్తూ 2022లో ప్రముఖ ఈ-కామర్స్ దిగ్గజం అమెజాన్ (Amazon) లో చేరారు. అనంతరం 2024లో ఒరాకిల్‌లో ఉద్యోగం సంపాదించి అక్కడ ఏడాది పాటు పనిచేశారు. మొత్తంగా 14 సంవత్సరాల పాటు వివిధ కార్పొరేట్ కంపెనీల్లో నెట్‌వర్కింగ్ విభాగంలో అపారమైన అనుభవాన్ని సంపాదించిన రమేష్, 2025లో తన సొంత కలల ప్రాజెక్ట్ అయిన 'తుంగభద్ర నెట్‌వర్క్స్'ను ప్రారంభించి సక్సెస్‌ఫుల్ ఎంట్రప్రెన్యూర్‌గా నిలిచారు.